Uza e Website jw.org den Sirbishi

Nos website ta un herment valioso pa yuda nos plama e bon noticia “te na e parti mas leu di Tera.” (Echo. 1:8) Pero mayoria di hende no sa mes di jw.org of no sa con pa hay’e. Hopi biaha nan ta haya sa di nos website ora un publicador mustra nan esey.

Un superintendente di circuito a download e video Dicon Analisa Loke Bijbel Ta Bisa? riba su celular y cada biaha cu e haya un chens e ta mustra un hende. Por ehempel, ora di predica di cas pa cas, e ta bisa: “Mi a pasa cerca bo un rato djis pa mustra bo unda bo por haya contesta pa tres pregunta importante di bida: Dicon tin asina tanto problema den mundo? Con Dios lo caba cu nan? Y con nos por trata cu nan tanten? E video cortico aki ta contesta e preguntanan ey.” Anto, e ta primi play y wak con e persona ta reacciona. E video ta asina interesante cu mayoria di hende no ta kita nan bista for di e pantaya sino te ora e caba. Despues e superintendente di circuito ta bisa: “Bo a caba di scucha cu bo por pidi un curso di Bijbel online. Ya cu mi ta aki, mi por mustra bo con e curso ta bay.” Si e persona acepta, e ta uza e foyeto Bon Noticia pa mustr’e con e curso pa yuda hende studia Bijbel ta bay. Si e persona no tin tempo, e ta traha un afspraak pa mustr’e na e siguiente bishita. Ora e tuma un pauze pa bay bebe algo na un luga, e ta cuminsa un combersacion amigabel cu e hende sinta banda di dje y e ta bisa algo parecido. Pues, abo ta uza jw.org den sirbishi?