Sigui Progresa den Bo Sirbishi
1. Menciona algun ehempel di prome siglo cu ta mustra cu nos mester sigui mehora den nos sirbishi.
1 Cristiannan mester haci esfuerso pa mehora den nan sirbishi. Pesey, Hesus a prepara y yuda su siguidornan pa bira mas capaz den nan asignacion di predica. (Luc. 9:1-5; 10:1-11) Akila cu Priscila tambe a haci esey ora nan a invita Apolo na nan cas pa “splic’e e caminda di Dios na un manera mas exacto.” (Echo. 18:24-26) Pablo tambe a anima Timoteo, kende tabata un predicador cu experencia, pa sigui dedica su mes na su siñansa “pa tur hende por mira bon cla” cu el a haci progreso. (1 Tim. 4:13-15) Si, nos mester sigui mehora den nos manera di predica e bon noticia sin importa cuanto tempo nos tin ta sirbi como esclavo pa Señor.
2. Con nos por siña for di otro publicador?
2 Siña for di Otro Publicador: Un manera cu nos por mehora den sirbishi ta door di siña for di otro publicador. (Prov. 27:17) Pesey, ora bo ta den sirbishi presta bon atencion na e manera cu bo compañero ta haci su presentacion. Pidi conseho cerca esnan cu ta predicadornan eficaz y scucha bon loke nan ta sugeri. (Prov. 1:5) Bo ta haya cu ta dificil pa haci rebishita, cuminsa un estudio di Bijbel of participa den un otro rasgo di sirbishi? Tuma iniciativa pa acerca e superintendente di grupo of un publicador cu experencia y pidi nan yudansa. Corda tambe cu spirito santo por yuda nos mehora den nos sirbishi. Pues, regularmente pidi Jehova pa su spirito santo.—Luc. 11:13.
3. Con nos tin cu reacciona si nos haya un conseho, aunke nos no a pidi p’e?
3 Si bo haya conseho tocante con pa mehora bo sirbishi, hasta si bo no a pidi p’e, no sinti bo ofendi. (Ecl. 7:9) Mescos cu Apolo, aprecia y humildemente acepta cualkier yudansa cu nos por haya. Haciendo esey lo bo desplega sabiduria.—Prov. 12:15.
4. Ki bon motibo Hesus a duna nos pa nos sigui mehora den e trabou di predica?
4 Nos Progreso Ta Glorifica Dios: Hesus a uza un ilustracion pa anima su siguidornan pa bira mihor predicadornan di e bon noticia. El a bisa cu e tabata manera un mata di wendruif y cu su siguidornan ungi tabata e ramanan cu su Tata ta snoei “pa nan por duna mas fruta.” (Juan 15:2) Mescos cu doño di un cunucu di wendruif ta desea pa su matanan produci mas fruta, asina tambe Jehova ta desea pa nos produci “e fruta di nos lipnan” y sigui bira mas capaz den nos sirbishi. (Heb. 13:15) Kico nos ta logra ora nos sigui mehora den e trabou di predica? Hesus mes ta duna nos e contesta: “Mi Tata ta ser glorifica den esaki: si boso sigui duna hopi fruta.”—Juan 15:8.