Con pa Mehora Nos Sirbishi: Yuda Bo Compañero

Dicon e Ta Importante: Hesus tabata sa cu ta importante pa predica cu un compañero. Pesey, ora el a manda 70 di su discipelnan pa bay su dilanti pa cuminsa predica, el a manda nan dos dos. (Luc. 10:1) Un publicador por yuda un compañero ora e haya su mes den un situacion dificil of ora e no sa kico pa contesta un persona. (Ecl. 4:9, 10) E publicador por conta e compañero di su experencianan y de bes en cuando dun’e un sugerencia cu por yud’e bira mas capaz den sirbishi. (Prov. 27:17) Ademas, e por anim’e cu su combersacion edificante segun cu nan dos ta bay di un porta pa otro.—Flp. 4:8.

Con pa Hacie:

Presta atencion ora bo compañero ta duna testimonio. (Sant. 1:19) Ora e ta lesa un texto, sigui e lesamento den bo Bijbel. Asina ta mas facil pa dun’e un man si ta necesario.
Uza discernimento pa determina si bo mester drenta den e combersacion y na ki momento. (Prov. 25:11) Si bo ta compaña un publicador na un estudio di Bijbel, lo e aprecia e comentarionan cu bo ta duna de bes en cuando. Sinembargo, ora bo ta predica di cas pa cas, bo compañero lo prefera pa bo lag’e papia ora ta su beurt di predica na un cas. Claro, si e ta un publicador nobo of no ta mucho sigur con pa contesta un pregunta of vence un obhecion, sigur lo e kier pa bo yud’e. Pero sea cu bo ta compaña un publicador di cas pa cas, na un rebishita of un estudio di Bijbel, no interumpie ni tuma e combersacion over of bin cu otro tema.
Cont’e di bo experencianan. Si de bes en cuando bo por duna bo compañero un sugerencia cu por yud’e mehora den su sirbishi, no keda sin hacie. (Prov. 3:27) Na un momento apropia bo por bis’e: “Con bo ta haya e combersacion a bay?” of “Mi por duna bo un sugerencia?” of “Ami sa purba di haci esaki ... ” Tene cuenta cu aunke un publicador lo aprecia pa bo dun’e algun sugerencia de bes en cuando, e por desanima si bo ta hala su atencion riba delaster un cos chikito.

Purba di Haci Esaki Durante e Luna Aki:

Despues cu bo caba di traha cu un ruman den sirbishi, bis’e kico el a bisa of haci cu bo a haya cu tabata hopi util.