Mas cu Djis un Compañero den Sirbishi
1. Con nos por imita e actitud di apostel Pablo ora nos ta traha cu otronan den sirbishi?
1 Apostel Pablo a considera e tempo cu el a pasa cu su rumannan den fe como oportunidadnan pa nan por tin “un intercambio di estimulo.” (Rom. 1:12) Ora abo ta traha cu un otro publicador den sirbishi, bo ta probecha di e tempo pa anim’e y yud’e? En bes di keda keto, dicon bo no ta cont’e kico a yuda abo bira un publicador eficaz?
2. Kico nos por haci pa yuda nos compañero bira mas sigur di su mes den sirbishi di veld, y dicon esaki ta importante?
2 Yuda Otronan Bira Mas Sigur di Nan Mes: Algun publicador ta insigur di nan mes y esey ta keda refleha den nan cara of tono di bos. Ora nos duna nan elogio sincero, nan por cuminsa sinti nan mas sigur di nan mes. Tin otro manera cu nos por haci esey? Un superintendente di circuito sa conta su compañero den sirbishi cua ta su temornan y con hopi biaha e ta haci oracion pa pidi Jehova yud’e vence e sintimentonan ey. Un otro ruman homber a menciona kico ta yud’e pa ta mas sigur di su mes. El a bisa: “Tur cos ta cuminsa cu un smile. Tin biaha mi tin cu haci oracion pa yuda mi hasta den esey.” Tin algo cu a yuda abo haya mas confianza den sirbishi? Compartie cu bo compañero den sirbishi di veld.
3. Kico nos por comparti cu nos compañero cu por yud’e bira mas habil den su sirbishi?
3 Comparti Bo Metodonan: Bo a yega di uza algun palabra of pregunta simpel of kisas algo tocante un suceso local cu a hiba na un combersacion? Bo tabatin bon resultado cu un presentacion di Nos Ministerio di Reino cu bo a duna un toke personal? Conta bo compañero. (Prov. 27:17) Ora boso ta bay haci un rebishita, bo por bis’e kico ta bo meta pa cu e bishita y con bo tin pensa pa logr’e. Despues di un estudio di Bijbel, splica bo compañero dicon bo a scoge cierto punto, texto biblico of metodo di siñansa pa yuda e studiante.
4. Dicon nos mester ta interesa den yuda nos rumannan den fe?
4 E predicadornan di prome siglo no solamente tabata interesa den yuda hende cu no tabata creyente, sino tambe nan a mira e importancia di encurasha y fortalece otro. (Echo. 11:23; 15:32) Apostel Pablo a entrena e hoben Timoteo y despues el a anim’e pa e comparti loke el a siña cu otro hende. (2 Tim. 2:2) Si nos tambe comparti loke nos a siña cu nos rumannan ora nos ta den sirbishi, nan lo haya mas goso y bira mas habil. Y riba tur cos, nos ta haci nos Tata celestial contento.—Heb. 13:15, 16.