Sigui Enfoca Riba e Trabou di Haci Discipel
1. Kico nos mester haci pa yuda hende haya salbacion?
1 E rapport di sirbishi di aña 2014 ta mustra e celo cu e pueblo di Dios tin y nan determinacion pa predica e bon noticia di Reino. (Mat. 24:14) Pa medio di e predicacion di cas pa cas, campañanan special pa parti tratado y invitacion y e predicacion na luganan publico, nos ta alcansa mas tanto hende cu nunca cu e mensahe di Bijbel. Sinembargo, pa hende haya salbacion, nos mester studia Bijbel cu nan pa yuda nan bira discipel di Hesus.—1 Tim. 2:4.
2. Cua preguntanan ta yuda nos keda alerta pa cuminsa estudio di Bijbel?
2 Keda Alerta pa Cuminsa Estudio di Bijbel: Si un hende mustra interes, bo ta tuma su datonan y ta purba di tuma contacto cu ne mas pronto posibel cu e meta di cuminsa un estudio di Bijbel? Ki dia tabata e ultimo biaha cu bo a demostra na e prome bishita con un estudio di Bijbel ta bay? Bo ta corda e ultimo biaha cu bo a ofrece un estudio di Bijbel na e hendenan cu ta riba bo ruta di revista? Bo a mustra bo colega di trabou, compañero di scol, bisiña, famia y otro conoci e videonan: Dicon Analisa Loke Bijbel Ta Bisa? y Con un Curso di Bijbel Ta Bay? Ora bo ta uza e stand di literatura, bo ta haci esfuerso pa informa e persona cu coy un publicacion di estudio cu e por haya un estudio di Bijbel gratis?
3. Kico nos mester pa siña hende e berdad na un manera eficaz?
3 Yudansa di Jehova y Hesus: Ora Hesus a duna e mandamento pa haci discipel, el a uza e palabra “bay.” Asina el a indica cu nos mester haci esfuerso y tuma iniciativa. Pero, e no a laga nos pa nos cuenta, mas bien el a priminti cu lo e ta cu nos. (Mat. 28:19, 20) Ademas, Jehova ta duna nos tanto su spirito como e hermentnan y e entrenamento cu nos mester pa siña hende e berdad. (Zac. 4:6; 2 Cor. 4:7) Nos por pidi Jehova pa duna nos “tanto e deseo como e poder” pa participa den e trabou importante aki.—Flp. 2:13.
4. Dicon nos mester sigui enfoca riba e trabou di haci discipel?
4 Nos ta haya hopi goso ora nos predica e bon noticia. Sinembargo, nos goso ta aumenta mas ora nos siña un hende e berdad y yud’e join nos riba e caminda “cu ta hiba na bida.” (Mat. 7:14; 1 Tes. 2:19, 20) Mas importante ainda, ora nos ta sigui enfoca riba e trabou di haci discipel nos ta agrada Jehova kende “no ta desea pa ningun hende ser destrui, ma ... pa tur haya chens di arepenti.”—2 Ped. 3:9.