Yuda Otro Hende Obedece Loke Bijbel Ta Siña

“E simiña den bon tera ta esnan cu a tende e palabra cu un curason honesto y bon, y ta retene esaki, y ta duna fruta cu perseverancia.”—LUCAS 8:15.

1, 2. (a) E buki Kico Bijbel Ta Siña Realmente? ta diseña pa ki proposito? (b) Den añanan recien, con Jehova a bendiciona e esfuersonan di su pueblo pa haci discipel?

“EBUKI ta simplemente excelente. Mi studiantenan gust’e un mundo. Ami tambe gust’e un mundo. E buki aki ta yuda bo cuminsa estudio di Bijbel cu hende para na nan porta.” Asina un Testigo di Jehova cu ta pionero regular a bisa di e buki Kico Bijbel Ta Siña Realmente?a Referiendo na e mesun buki, un proclamado di Reino di edad a bisa: “Mi tabatin e privilegio di yuda hopi hende siña conoce Jehova den e 50 añanan cu mi ta activo den e ministerio. Pero mi tin cu bisa cu e publicacion aki pa studia hende ta sobresaliente. E plachinan y ilustracionnan refrescante ta duna bo un gran placer.” Ta asina bo tambe ta sinti relaciona cu e buki Bijbel Ta Siña? E buki aki pa studia Bijbel ta diseña pa yuda bo cumpli cu e mandamento di Hesus: “Bai y haci tur e nacionnan discipel di mi, ... y siña nan pa cumpli cu tur loke mi a ordena boso.”—Mateo 28:19, 20.

² Jehova su curason sin duda ta alegra ora cu e ta mira alrededor di 6,6 miyon di su Testigonan di buena gana ta obedece e instruccion di Hesus pa haci discipel. (Proverbionan 27:11) Ta bisto cu Jehova ta bendicionando nan esfuerso. Por ehempel, durante e aña di sirbishi 2005 nan a predica e bon nobo den 235 pais y nan a conduci un promedio di mas cu 6.061.500 estudio di Bijbel. Como resultado, hopi hende ‘a tende e palabra di Dios y a acept’e, no como palabra di hende, ma pa loke berdaderamente e ta, e palabra di Dios.’ (1 Tesalonicensenan 2:13) Durante e ultimo dos añanan, mas cu mei miyon discipel nobo a adapta nan bida na e normanan di Jehova y a dedica nan mes na Dios.

3. Ki preguntanan relaciona cu uzo di e buki Bijbel Ta Siña nos lo analisa den e articulo aki?

³ Abo recientemente tabatin e goso di conduci un estudio di Bijbel cu un persona? Rond mundo tin hende ainda cu “un curason honesto y bon” y ora nan tende e palabra di Dios lo “retene esaki, y ta duna fruta cu perseverancia.” (Lucas 8:11-15) Laga nos considera con bo por uza e buki Bijbel Ta Siña den e trabou di haci discipel. Nos consideracion lo analisa tres pregunta: (1) Con bo por cuminsa un estudio di Bijbel? (2) Ki metodonan di siña hende ta mas efectivo? (3) Con bo por yuda un persona bira no solamente un studiante, sino tambe un maestro di Dios su Palabra skirbi, Bijbel?

Con Bo Por Cuminsa un Estudio di Bijbel

4. Dicon algun hende kisas ta basila pa studia Bijbel, y con lo bo por yuda nan vence nan duda pa studia?

⁴ Si un hende pidi bo crusa un rooi hancho den un solo salto, probablemente lo bo nenga di hacie. Pero si tabatin varios piedra poni na un distancia for di otro di manera cu bo por a stap riba nan, probablemente lo bo ta mas inclina na purba crus’e. Asina tambe, un persona cu tin hopi cos di haci kisas ta basila pa studia Bijbel. Podise e doño di cas ta pensa cu lo tuma mucho tempo y esfuerso pa studia Bijbel. Con bo por yud’e vence su duda pa studia? Pa medio di un serie di consideracion breve y informativo, lo bo por uza e buki Bijbel Ta Siña pa dirigi e persona na un estudio regular di e Palabra di Dios. Si bo prepara bon, cada rebishita cerca e persona lo bira manera un piedra pa stap ariba cu por yud’e yega na un amistad cu Jehova.

5. Dicon bo tin cu lesa e buki Bijbel Ta Siña?

⁵ Sinembargo, prome cu bo por yuda un otro persona saca beneficio di e buki Bijbel Ta Siña, abo mester ta bon familiarisa cu e buki. Bo a les’e di kaft pa kaft? Un pareha a bai vakantie cu e buki, y a cuminsa les’e mientras cu nan tabata relaha canto di lama. Ora cu un señora local cu tabata bende cos cu turista a acerca nan, el a tuma nota di e titulo Kico Bijbel Ta Siña Realmente? El a bisa e pareha cu apenas un par di ora prome, el a haci oracion tocante netamente e pregunta ei, y a pidi Dios dun’e un contesta. Gustosamente e pareha a duna e señora un ehemplar di e buki. Abo a traha tempo pa lesa e publicacion aki, por ta pa di dos biaha, mientras cu kisas bo tabata warda pa un cita of tabata tuma un pausa na trabou of na scol? (Efesionan 5:15, 16) Si bo hacie, lo bo familiarisa bo mes cu e buki aki pa studia Bijbel y a la bes bo ta crea oportunidad pa papia cu otro hende tocante su contenido.

6, 7. Con bo por uza e buki Bijbel Ta Siña pa cuminsa estudio di Bijbel?

⁶ Ora di ofrece e buki den e ministerio publico, haci bon uzo di e plachinan, textonan biblico y preguntanan cu tin na pagina 4, 5 y 6. Por ehempel, lo bo por cuminsa un combersacion cu e pregunta: “Cu tur e problemanan cu ta confronta humanidad awe, unda bo ta kere nos por haya un guia confiabel?” Despues di scucha bon kico e persona ta bisa, lesa 2 Timoteo 3:16 y 17, y splica cu Bijbel ta ofrece un berdadero solucion pa e problemanan di humanidad. Anto hala atencion di e doño di cas na pagina 4 y 5 y puntr’e: “Di e condicionnan ilustra riba e paginanan aki, cua ta precupa bo mas tanto?” Ora e doño di cas indica un di nan, lag’e tene e buki mientras cu abo ta lesa e texto biblico conecta cu esei for di bo Bijbel. Despues lesa pagina 6 y puntra e doño di cas: “Riba cua di e seis preguntanan menciona na e parti abou di e pagina aki lo bo kier haya un contesta?” Ora e persona scohe un di nan, mustr’e e capitulo cu ta contesta e pregunta ei, laga e buki cu ne y haci areglonan definitivo pa pasa bek y considera e pregunta ei.

⁷ E presentacion cu nos a caba di describi aki lo por tuma mas o menos cinco minuut. Sinembargo, den e par di minuutnan ei bo a haya sa kico ta precupa e doño di cas, bo a lesa y aplica dos texto biblico y a pone e base pa un rebishita. Bo combersacion breve cu e doño di cas lo por ta e experencia mas animante y consolador cu e tabatin den basta tempo. Como resultado, asta un persona cu ta hopi ocupa probablemente lo spera ansiosamente di por papia un par di minuut mas cu bo segun cu bo ta yud’e dal e siguiente stap pa subi “e caminda cu ta hiba na bida.” (Mateo 7:14) Cu tempo, segun cu e interes di e doño di cas ta desaroya, lo bo mester extende e duracion di e estudio. Bo por propone e persona pa cai sinta y amplia e tempo dedica na e estudio.

Metodonan di Siña Hende Cu Ta Mas Efectivo

8, 9. (a) Con bo por prepara bo studiante di Bijbel pa resisti e obstaculonan y pruebanan cu probablemente lo e confronta? (b) Unda nos por haya material cu ta resisti candela pa edifica fe fuerte?

⁸ Unabes un persona cuminsa obedece loke Bijbel ta siña, ta probabel cu lo e confronta obstaculonan cu ta stroba su progreso. Apostel Pablo a bisa: “Tur hende cu ta desea di hiba un bida santo den Cristo Hesus lo wordo persigui.” (2 Timoteo 3:12) Pablo a compara e pruebanan aki cu un candela cu ta destrui material di construccion di calidad inferior pero cu ta laga materialnan manera oro, plata y piedra precioso sin ningun daño. (1 Corintionan 3:10-13; 1 Pedro 1:6, 7) Pa yuda bo studiante di Bijbel desaroya e cualidadnan necesario pa e por resisti e pruebanan cu kisas lo e confronta, bo tin cu yud’e dor di traha cu material cu ta resisti candela.

⁹ E salmista a compara ‘e palabranan di Jehova’ cu “plata refina den un forno di klei, purifica shete biaha.” (Salmo 12:6) Si, Bijbel ta contene tur e materialnan precioso cu nos por uza pa edifica fe fuerte. (Salmo 19:7-11; Proverbionan 2:1-6) Anto e buki Bijbel Ta Siña ta mustra bo con pa bo ta efectivo den uza e Scritura.

10. Con bo por dirigi e studiante su atencion na Bijbel?

¹⁰ Durante e estudio, dirigi e studiante su atencion na e textonan biblico cu tin den cada capitulo cu boso ta considera. Uza pregunta pa yuda e studiante compronde textonan biblico clave y aplica nan personalmente. Tene cuidou pa bo no bis’e kico e tin cu haci. Mas bien, imita e ehempel di Hesus. Ora un homber versa den e Lei a hacie pregunta, Hesus a contesta: “Kico ta para skirbi den Lei? Kico bo ta lesa den dje?” E homber a contesta for di e Scritura, y Hesus a yud’e mira con pa aplica e principio na su mes. Pa medio di un ilustracion, Hesus a yuda e homber mira tambe con e siñansa ei lo mester influenci’e. (Lucas 10:25-37) E buki Bijbel Ta Siña tin hopi ilustracion simpel cu bo por uza pa yuda un studiante aplica principionan biblico na su mes.

11. Cuanto material bo mester cubri durante cada sesion di estudio?

¹¹ E buki Bijbel Ta Siña ta uza un lenguahe simpel y directo pa splica e Palabra di Dios, mescos cu Hesus a transmiti ideanan complica pa medio di expresionnan simpel. (Mateo 7:28, 29) Sigui e ehempel di Hesus. Transmiti e informacion na un manera simpel, cla y exacto. No pasa pura pura dor di e material. Mas bien, laga e capasidad di e studiante y su circunstancianan determina cuanto paragraf lo bo considera durante cada sesion di estudio. Hesus tabata conoce e limitacionnan di su discipelnan y no a carga nan cu mas informacion di loke nan tabatin mester na e tempo ei.—Juan 16:12.

12. Con lo mester uza e apendix?

¹² E buki Bijbel Ta Siña tin un apendix cu ta consisti di 14 topico. Basa riba e necesidad di e studiante, abo como su instructor lo mester por determina cua ta e mihor manera pa uza e material aki. Por ehempel, si un studiante tin dificultad pa compronde un topico of tin pregunta riba asuntonan specifico pa motibo cu anteriormente e tabatin otro creencia, kisas ta suficiente pa mustr’e e seccion apropia di e apendix y lag’e considera e topico riba su mes. Di otro banda, e necesidadnan di e studiante kisas ta exigi pa bo considera e material hunto cu ne. E apendix ta contene topiconan biblico esencial, manera “‘Alma’ y ‘Spirito’—Kico e Palabranan Aki Ta Nifica Realmente?” y “Con pa Identifica ‘Babilonia e Grandi.’” Podise lo bo kier trata e topiconan aki hunto cu bo studiante. Ya cu den e apendix no tin pregunta pa trata e topiconan cu ta ser considera, lo bo mester ta bon na haltura di e informacion pa bo por formula preguntanan significativo.

13. Ki papel oracion ta hunga den fortalece fe?

¹³ Salmo 127:1 ta declara: “Si [Jehova] no traha e cas, ta en vano esnan cu ta trah’e ta traha cansa curpa.” P’esei, segun cu bo ta prepara pa conduci un estudio di Bijbel, pidi Jehova su yudansa den oracion. Laga e oracionnan cu bo ta haci na comienso y na final di cada estudio refleha bo relacion intimo cu Jehova. Anima e studiante pa pidi Jehova den oracion pa dun’e sabiduria pa compronde Su Palabra y e fortalesa pa aplica su conseho. (Santiago 1:5) Si e studiante haci esei, lo e haya e fortalesa pa wanta prueba y lo sigui crece bira fuerte den fe.

Yuda Studiantenan di Bijbel Bira Maestro

14. Ki progreso studiantenan di Bijbel tin cu haci?

¹⁴ Pa nos studiantenan di Bijbel obedece “tur loke” Hesus a ordena su discipelnan, nan tin cu progresa for di ta un studiante di e Palabra di Dios y bira siñado of maestro di e Palabra di Dios. (Mateo 28:19, 20; Echonan 1:6-8) Kico bo por haci pa yuda un studiante cu e tipo di progreso spiritual ei?

15. Dicon lo bo mester anima bo studiante di Bijbel pa asisti na e reunionnan cristian?

¹⁵ For di e prome sesion di estudio, invita e studiante pa asisti na e reunionnan di congregacion hunto cu bo. Splic’e cu ta na e reunionnan abo ta haya bo entrenamento como maestro di e Palabra di Dios. Durante varios siman, tuma un par di minuut na final di cada estudio di Bijbel pa describi e programa di instruccion spiritual cu bo ta haya na e varios reunionnan y asambleanan. Papia cu entusiasmo tocante e beneficionan cu bo ta saca di e ocasionnan aki. (Hebreonan 10:24, 25) Unabes e studiante cuminsa asisti na reunion cu regularidad, tin mas chens cu lo e bira un maestro di e Palabra di Dios.

16, 17. Menciona algun meta cu un studiante di Bijbel por pone y alcansa.

¹⁶ Yuda e studiante di Bijbel pone metanan cu e por alcansa. Por ehempel, anim’e pa comparti loke e ta siñando cu un amigo of famia. Sugeri tambe pa e pone e meta di lesa henter e Bijbel. Si bo yud’e establece y mantene un rutina regular di lesamento di Bijbel, e custumber aki lo benefici’e pa hopi tempo despues di su bautismo. Ademas, pakico no sugeri e studiante pa pone e meta di corda por lo menos un texto biblico cu ta contesta un pregunta clave di cada capitulo di e buki Bijbel Ta Siña? Haciendo esei, lo e bira “un trahado cu no tin motibo pa tin berguensa, cu ta parti e palabra di berdad na un manera corecto.”—2 Timoteo 2:15.

¹⁷ En bes di siña un studiante pa djis ripiti textonan biblico of bisa nan nificacion general, anim’e pa splica con cierto versiculonan biblico ta aplica na e topico bou di discusion ora e ta contesta personanan cu ta exigi di dje pa e duna un motibo pa su fe. Algo cu por yuda ta sesionnan cortico di practica, caminda abo ta hunga e papel di un famia of colega cu ta pidie splica su creencianan. Segun cu e studiante ta contesta, mustr’e con pa haci esei cu “un genio suave y respet profundo.”—1 Pedro 3:15, NW.

18. Ora un studiante di Bijbel ta cualifica como publicador no batisa, ki yudansa mas lo bo por dun’e?

¹⁸ Cu tempo, e studiante kisas ta cualifica pa participa den sirbishi di veld. Enfatisa cu ta un privilegio di por participa den e trabou aki. (2 Corintionan 4:1, 7) Unabes e ancianonan a determina cu e studiante ta cualifica como publicador no batisa, yud’e prepara un presentacion simpel anto compañ’e den sirbishi di veld. Sigui traha hunto cu ne regularmente den e varios aspectonan di e ministerio publico, y siñ’e con pa prepara y haci rebishitanan efectivo. Bo propio bon ehempel lo ta un influencia positivo.—Lucas 6:40.

“Sigura Salbacion, Tanto pa Bo Mes Como pa Esnan Cu Ta Tende Bo”

19, 20. Ki meta nos mester tin, y dicon?

¹⁹ Un cos ta sigur, ta hopi trabou pa yuda un persona yega na un ‘conocemento exacto di e berdad.’ (1 Timoteo 2:4) Sinembargo, ta masha poco cos den bida por para banda di e goso di yuda un hende obedece loke Bijbel ta siña. (1 Tesalonicensenan 2:19, 20) Si, nos tin e gran privilegio di por ta “Dios su colaboradonan” den e trabou mundial aki di siña hende!—1 Corintionan 3:9.

²⁰ Pa medio di Hesucristo y angelnan poderoso, Jehova pronto lo ehecuta huicio contra esnan ‘cu no conoce Dios y esnan cu no ta obedece e evangelio di nos Señor Hesus.’ (2 Tesalonicensenan 1:6-8) Tin bida den wega. Abo por pone como meta pa conduci por lo menos un estudio di Bijbel for di e buki Kico Bijbel Ta Siña Realmente? Segun cu bo ta participa den e obra aki, bo tin e oportunidad di “sigura salbacion, tanto pa bo mes como pa esnan cu ta tende bo.” (1 Timoteo 4:16) Awor mas cu nunca, ta urgente pa nos yuda otro hende obedece loke Bijbel ta siña.

[Nota]

Kico Bo A Siña?

• E buki Bijbel Ta Siña ta diseña pa ki proposito?

• Con bo por cuminsa estudio di Bijbel uzando e buki Bijbel Ta Siña?

• Cua metodonan di siñansa ta mas efectivo?

• Con bo por yuda un studiante bira un maestro di e Palabra di Dios?

[Plachi na pagina 26]

Bo ta haciendo bon uzo di e buki aki?

[Plachi na pagina 27]

Un consideracion cortico por habri un persona su apetit pa adkiri conocemento biblico

[Plachi na pagina 29]

Kico bo por haci pa dirigi e studiante su atencion na Bijbel?

[Plachi na pagina 30]

Yuda e studiante di Bijbel progresa