Caha di Pregunta

◼ Nos mester uza Internet pa predica of pa studia cu hende cu nos no conoce cu ta biba na otro pais?

Algun publicador ta uza Internet pa ofrece estudio di Bijbel na hende cu ta biba den paisnan caminda nos obra ta restringi of caminda no tin hopi publicador. Den algun caso, nan tabatin bon resultado. Sinembargo, ta peligroso pa publicadornan chat of intercambia e-mail cu hende cu nan no conoce. (Wak Nos Ministerio di Reino di juli 2007, pag. 3.) Aunke nos intencion ta pa alcansa hende sincero cu e mensahe di Reino, rumannan cu ta combersa cu hende cu nan no conoce por haya nan cu mal compania, incluso cu hende apostata. (1 Cor. 1:19-25; Col. 2:8) Ademas, na paisnan caminda nos obra ta restringi of prohibi, autoridadnan por controla nos corespondencia. Esaki por pone e rumannan cu ta biba eynan na peliger. Pesey, nos no mester bay riba Internet pa busca hende di otro pais pa predica e bon noticia na nan.

Si nos predica informalmente na un hende cu nos no conoce cu ta di bishita for di un otro pais, nos no mester sigui cultiva su interes despues cu e regresa su pais, a menos cu e sucursal cu nos ta cay bou di dje duna otro instruccion. Mas bien, nos por mustr’e con e por uza jw.org pa haya mas informacion y con pa tuma contacto cu e sucursal na su pais. Tambe nos por anim’e pa bishita un Salon di Reino caminda e ta biba. Claro cu tin pais caminda no tin Salon di Reino. Si e ta desea pa Testigonan den su area bishit’e, nos tin cu yena e formulario Por Fabor Atendé (S-43-PA) y duna e secretario, kende na su turno lo manda esaki sucursal via jw.org. E sucursal cu ta supervisa e obra den e pais caminda e hende interesa ta biba ta den mihor posicion pa dun’e e yudansa spiritual, ya cu e sucursal conoce e circunstancianan di e pais.—Wak Nos Ministerio di Reino di juni 2014, pag. 7, y esun di november 2011, pag. 2.

Si un hende cu nos ta rebishita actualmente muda pa otro pais of si nos ta studia actualmente cu un hende cu ta biba den exterior y cu nos conoce solamente via Internet, nos mester sigui e instruccion cu nos a caba di lesa den e paragraf anterior. Sinembargo, nos por sigui cultiva su interes te ora un publicador local tuma contacto cu ne. Pero si e ta biba na un pais caminda nos obra ta restringi of prohibi, nos mester ta sumamente cauteloso ora nos ta trata temanan biblico via carta, telefon of medionan electronico.—Mat. 10:16.