Con pa Uza Grabacion Audio
1. Aparte di publicacionnan skirbi, ki otro provision practico nos tin?
1 Hopi hende ta gusta uza jw.org pa lesa e palabranan agradabel y corecto di e berdad. (Ecl. 12:10) Pero, bo a yega di uza e grabacionnan audio na otro idioma? E grabacionnan aki ta haci posibel pa bo scucha hopi informacion cu tin riba nos website. Con e grabacionnan audio por yuda nos?
2. Con nos por uza e grabacionnan audio pa nos estudio personal of Adoracion Como Famia?
2 Den Nos Estudio Personal of Adoracion Como Famia: Un bon manera pa nos uza nos tempo ora nos ta di biahe of ora nos ta haci nos quehaceres di tur dia ta door di scucha grabacion audio di Bijbel, revista of otro publicacion. (Efe. 5:15, 16) Pa varia nos Adoracion Como Famia nos por scucha grabacion di algun informacion segun cu nos ta sigui e lesamento den nos publicacion. Si bo kier mehora bo lesamento of kier siña un otro idioma lo ta bon pa scucha e grabacionnan audio durante bo estudio personal.
3. Ken den nos teritorio lo disfruta di e grabacionnan audio?
3 Den Sirbishi: Hende den nos teritorio cu ta sinti cu nan no tin tempo pa lesa kisas lo kier scucha un grabacion audio. Of kisas nos por topa hende cu ta papia un otro idioma y cu lo reacciona bon si nan scucha e mensahe di Reino “den nan idioma.” (Echo. 2:6-8) Tin pais caminda scucha ta un parti importante di nan cultura. Por ehempel, den e cultura Hmong hende tin e tradicion di pasa nan historia di un generacion pa otro verbalmente y nan ta bon den keda corda informacion cu nan a scucha. Den hopi cultura Africano nan ta gusta siña scuchando storia.
4. Ki pregunta nos por haci nos mes relaciona cu hende den nos teritorio?
4 Tin hende den bo teritorio cu lo keda contento si bo lag’e scucha un grabacion audio den su idioma? Tin un persona cu lo por saca probecho di un publicacion audio si bo mand’e p’e via e-mail? Nos por download un publicacion audio, grab’e riba un CD y hib’e hunto cu e publicacion imprimi pa un persona cu a mustra interes? Si nos duna un persona cu mustra interes un buki completo, revista, foyeto of tratado den formato electronico, nos por marca esey riba nos rapport di sirbishi. A produci e grabacionnan audio specialmente pa nos por uza nan den nos estudio personal y tambe pa planta simia di e berdad di Reino.—1 Cor. 3:6.