Ki Dia e Fin Ta Bin? Loke Hesus A Bisa

BAN WAK DOS COS CU HESUS A BISA TOCANTE E FIN:

“Pesey, keda vigila, pasobra boso no sa ni e dia ni e ora.”—MATEO 25:13.

“Keda alerta, keda lanta, pasobra boso no sa ki ora e tempo stipula ta.”—MARCO 13:33.

Pues, no tin niun hende na mundo cu sa precies ki dia e fin lo yega. Pero Dios si a stipula un tempo, un “dia y ora” specifico, pa e fin yega. (Mateo 24:36) Esey kiermen cu no tin niun manera pa hende sa si e fin ta cerca? No. Hesus a bisa su discipelnan pa nan paga tino riba cierto suceso cu lo mustra cu e fin ta hopi cerca.

E SEÑAL

E sucesonan ey lo ta e señal di e “conclusion di e era aki.” Hesus a bisa: “Nacion lo lanta contra nacion y reino contra reino, y lo tin scarsedad di cuminda y temblor den un luga tras di otro.” (Mateo 24:3, 7) El a bisa tambe cu lo “tin pest”—epidemia. (Lucas 21:11) Abo ta mira tur e cosnan cu Hesus a bisa ey ta pasando aworaki?

Awendia hopi hende ta sufri debi na guera, hamber, temblor y un maleza tras di otro. Por ehempel, na 2004, un temblor fuerte a causa un tsunami den Ocean Indico cu a mata mas cu 225.000 hende. Den tres aña, e pandemia di COVID-19 a mata un 6,9 miyon hende rond mundo. Hesus a bisa cu e tipo di sucesonan ey lo indica cu e fin ta cerca.

“E ULTIMO DIANAN”

Bijbel ta bisa cu lo yama e periodo net prome cu e fin “e ultimo dianan.” (2 Pedro 3:3, 4) Segundo Timoteo 3:1-5 ta bisa cu “den e ultimo dianan” hende lo no kier biba segun e normanan moral di Dios. (Wak e cuadro “Net Prome Cu Fin di Mundo.”) Bo a ripara cu hende awendia ta egoista, golos, violento y sin amor? Tur e cosnan ey tambe ta mustra cu fin di mundo ta hopi cerca.

Pero, ta con largo e ultimo dianan lo dura? Bijbel ta bisa cu esey lo dura solamente “masha poco tempo.” Despues, Dios lo destrui “esnan cu ta caba cu e Tera.”—Revelacion 11:15-18; 12:12.

PRONTO TERA LO BIRA UN PARADIJS!

Dios ya caba a pone un dia y un ora cu lo e caba cu tur e cosnan malo cu ta pasa. (Mateo 24:36) Pero, Dios “no ta desea pa ningun hende ser destrui.” (2 Pedro 3:9) E ta dunando nos chens pa siña tocante dje y obedec’e. Dicon? Pasobra e kier pa nos sobrevivi e fin di e mundo aki y biba den su mundo nobo, caminda e Tera lo bira un paradijs.

Dios ta haciendo sigur cu tur hende rond mundo por haya sa kico nan mester haci pa biba den Paradijs goberna pa su Reino. Hesus a bisa cu e bon noticia tocante e Reino di Dios “lo ser predica den henter e Tera habita.” (Mateo 24:14) Rond mundo, testigonan di Jehova a pasa mas cu mil miyon ora ta predica y siña hende tocante e bunita speransa cu Bijbel ta duna. Hesus a bisa cu e predicacion ey lo tuma luga rond mundo prome cu e fin yega.

E dianan di e gobiernonan humano ta conta. Pero, e bon noticia ta cu bo por sobrevivi e fin di e mundo aki y biba aki riba Tera den e paradijs cu Dios a priminti. E siguiente articulo lo yuda bo mira kico abo tin cu haci pa bo por biba den Paradijs.