Ser un Bon Hende Ta Garantisa Bo un Futuro Sigur?

Pa varios siglo, hopi hende a pensa cu si bo ta un bon hende, lo bo tin un futuro sigur. Por ehempel, hopi hende na Asia ta di acuerdo cu loke un filosofo famoso cu yama Confucius (551-479 P.C.) a bisa: “Loke bo no kier pa hende haci cu bo, no haci cu nan.”a

UN MANERA DI BIBA CU HOPI HENDE TA SCOGE

Hopi hende ainda ta kere cu si nan haci loke ta bon, nan lo tin un futuro sigur. Nan ta purba di mustra respet, tin bon manera, cumpli cu nan rol den comunidad y mantene un bon consenshi. Linh, un señora cu ta biba na Vietnam, a bisa: “Semper mi a kere cu si mi ta honesto y sincero, lo mi tin un bon bida.”

E mesun señora ey ta sirbiendo cuminda na hende pober y hende sin cas.

Algun hende ta purba di haci loke ta bon pa motibo di nan creencianan religioso. Hsu-Yun, un homber cu ta biba na Taiwan, a bisa: “Mi a ser siña cu si un persona haci cos bon, lo e ta feliz despues cu e muri. Pero si e haci cos malo, lo e sufri despues cu e muri.”

KICO TA E RESULTADO?

Na fin di dia, e señora tin su yiu den su brasa, y e ta tristo y morto cansa.

Ta berdad cu ora nos haci cos bon pa otro hende, nos lo haya hopi beneficio. Sinembargo, hopi hende cu ta purba di trata otro hende bon, ta realisa cu no ta semper nan ta ricibi e mesun trato bek. Shiu Ping, un señora cu ta biba na Hong Kong, a bisa: “Mi a realisa cu hende cu ta haci bon, no semper ta ricibi bendicion. Mi a haci mi best pa cuida mi famia y haci loke ta bon. Pero mi matrimonio a fracasa y mi esposo a bandona ami y mi yiu homber.”

Hopi hende a realisa cu no ta tur hende religioso ta bon hende. Etsuko, un señora cu ta biba na Japon, a bisa: “Mi a join un religion, y mi a cuminsa organisa actividad pa e hobennan. M’a keda den shock ora mi a mira cu algun di e hendenan den e religion tabata inmoral, nan tabata bringa pa poder y tabata haci mal uzo di e placa di misa.”

“Mi a haci mi best pa cuida mi famia y haci loke ta bon. Pero mi matrimonio a fracasa y mi esposo a bandona ami y mi yiu homber.”—SHIU PING, HONG KONG

Algun hende cu ta masha religioso y cu ta purba di haci loke ta bon a keda desapunta ora cu toch cos malo a pasa cu nan. Asina Van, un señora di Vietnam, a sinti. El a bisa: “Tur dia mi tabata cumpra fruta, flor y cuminda pa pone riba altar di mi antepasadonan, pensando cu lo mi haya hopi bendicion den futuro. A pesar di tur e cosnan bon y ritonan religioso cu mi tabata haci pa hopi aña, mi esposo a haya un maleza grave. Despues, mi yiu muher cu tabata studia na otro pais a muri cu 20 aña.”

SER UN BON HENDE SO NO TA SUFICIENTE

Ta importante pa ta un bon hende, pero esey no ta suficiente pa garantisa un futuro sigur. Dicon no? Wak kico e Scritura Santo ta bisa.

NO TA TUR HENDE TA SCOGE PA HACI LOKE TA BON

“Un pecador ta destrui hopi cos bon.”—ECLESIASTES 9:18.

Hasta si bo haci bo best pa ta un bon hende, e cosnan egoista cu otro hende ta haci por afecta bo futuro. Por ehempel, durante un pandemia bo por sigui conseho di autoridad superior y mantene distancia fisico. Pero kico si algun hende no kier obedece autoridad superior? Nan comportacion por pone cu hende cu ta purba di haci loke ta bon ta bira malo.

HENDE POR TIN IDEA ROBES TOCANTE KICO TA BON Y KICO TA MALO

“Tin un caminda cu ta parce bon den bista di hende, ma su fin ta e caminda di morto.”—PROVERBIONAN 14:12.

A traves di historia hopi hende a haci cos cu nan a pensa ta corecto, pero despues nan a realisa cu nan tabata robes. Aunke nan a pensa cu loke nan tabata haci tabata bon, toch nan a sufri e consecuencianan di nan mal decisionnan.

NOS NO SA CON NOS BIDA LO TA MAÑAN

“Boso no sa con boso bida lo ta mañan.”—SANTIAGO 4:14.

Hasta un bon hende por muri inespera. Por ehempel, durante e pandemia di COVID-19, hopi hende a muri segun cu nan tabata purba di yuda otro hende. Of wak e ehempel di Liting, un señora di China cu a perde su tata den un accidente di auto. El a bisa: “Mi no por compronde con un persona asina amabel por a muri. Mi tata tabata un hende cu ta traha duro, e tabata humilde y sincero. E tabata e unico persona den e auto cu a perde su bida.”

Si ser un bon hende no ta suficiente pa garantisa un futuro sigur, kico si por? Pa contesta e pregunta ey, nos mester di un guia cu nos por confia—un fuente di informacion cu por contesta nos preguntanan y mustra nos con nos por tin un futuro sigur. Unda nos por haya un guia asina?

a Pa mas informacion tocante e siñansanan di Confucius, wak capitulo 7, paragraf 31-35, di e buki El hombre en busca de Dios, publica pa testigonan di Jehova y cu ta disponibel online riba www.jw.org.