Kico Bijbel Ta Bisa di Homosexualidad?
E contesta cu Bijbel ta duna
Dios a crea hende pa tene relacion sexual solamente den matrimonio cu ta consisti di un homber y un muher. (Genesis 1:27, 28; Levitico 18:22; Proverbionan 5:18, 19) Bijbel ta condena actonan sexual cu no ta entre esposo y esposa, sea cu ta actonan homosexual of heterosexual. (1 Corintionan 6:18) Esaki ta inclui relacion sexual, cariciamento di organonan sexual di un otro persona y tambe sex oral of anal.
Aunke Bijbel no ta aproba actonan homosexual, e no ta manda nos odia hende cu ta homosexual. Mas bien, e ta instrui cristiannan pa respeta of “honra tur sorto di hende.”—1 Pedro 2:17.
Un hende por nace homosexual?
Bijbel no ta bisa directamente pakico hende ta haya e sintimentonan aki, pero si e ta reconoce cu nos tur tin e tendencia di faya cu e mandamentonan di Dios. (Romanonan 7:21-25) En bes di enfoca riba kico por lanta sintimento homosexual den un hende, Bijbel unicamente ta prohibi actonan homosexual.
Con un persona por agrada Dios a pesar cu e ta sintie atrai na hende di su mes sexo?
Bijbel ta bisa: “Mata e inclinacionnan di boso curpa pa loke ta ... pasion [y] mal deseo.” (Colosensenan 3:5) Pa bo por mata e mal deseonan cu ta hiba na actonan incorecto, bo mester controla bo pensamento. Si bo ta pensa semper riba cosnan cu ta sano, ta bira mas facil pa core cu mal deseo. (Filipensenan 4:8; Santiago 1:14, 15) Aunke bo por haya bo ta hiba un lucha grandi na principio, cu tempo lo bira mas facil pa bo domina mal deseo. Dios a priminti cu lo e yuda bo “renoba e forsa cu ta motiva [bo] mente.”—Efesionan 4:22-24.
No ta hende cu tin deseo homosexual so tin cu domina nan impulsonan sexual. Miyones di hende heterosexual tambe tin cu domina nan deseonan sexual pa cumpli cu e normanan di Bijbel. Por ehempel, tin hende cu pa motibo di circunstancia ta soltero; di otro banda, tin hende ta casa cu un persona cu no por tene relacion sexual. Nan tur ta haci esfuerso pa domina nan deseonan sexual pa evita di cay den tentacion. A pesar di esey, nan por biba masha feliz; y personanan cu ta sinti nan atrai na hende di nan mes sexo tambe por ta feliz si di berdad nan kier agrada Dios.—Deuteronomio 30:19.