Con Mi Por Proteha Mi Mes Contra Intimidacion Sexual?

E contesta cu Bijbel ta duna

Wak e siguiente sugerencianan practico basa riba e consehonan sabi di Bijbel:

1. Sea profesional. Sea amigabel y respetuoso cu bo coleganan di trabou. Pero evita di bira mucho familiar pa bo no duna e impresion cu bo ta habri pa nan avancenan inmoral.—Mateo 10:16; Colosensenan 4:6.

2. Bisti na un manera decente. Si bo bisti na un manera provocativo, esey ta duna un mal impresion. Bijbel ta bisa nos pa bisti “cu modestia y sano huicio.”—1 Timoteo 2:9.

3. Scoge bon amigo. Si bo ta anda cu hende cu ta gusta flirt, e chens ta grandi cu un dia nan lo purba cu bo tambe.—Proverbionan 13:20.

4. Rechasa combersacion vulgar. Cana bay ora un combersacion bay den direccion di “papiamento di disparate [of] chansanan vulgar.”—Efesionan 5:4.

5. Evita situacion cu por hinca bo den problema. Por ehempel, no acepta pa keda despues di ora di trabou sin un bon motibo.—Proverbionan 22:3.

6. Sea firme y directo. Si un hende ta intimida bo sexualmente, lag’e sa bon cla cu bo no ta acepta su comportacion. (1 Corintionan 14:9) Por ehempel, bo por bisa: “Mi ta ripara cu bo ta mishi hopi cu mi y mi no ta gusta esey. Stop cu e cos ey.” Bo por skirbi e persona un carta pa splic’e kico a pasa, con bo a sinti bo y cu bo no kier pa esey sosode nunca mas. Bis’e cu bo posicion ta basa riba bo conviccionnan moral y religioso.—1 Tesalonicensenan 4:3-5.

7. Busca yudansa. Si e intimidacion sigui, papia cu un hende cu bo ta confia manera un amigo, famia, colega di trabou of un hende cu tin experencia den yuda victima. (Proverbionan 27:9) Hopi victima di intimidacion sexual a haya sosten pa medio di oracion. Hasta si bo no a yega di haci oracion nunca, no balota e yudansa cu bo por haya cerca Jehova, e “Dios di tur consuelo.”—2 Corintionan 1:3.

Intimidacion sexual ta crea hopi tension na trabou pa miyones di hende, pero Bijbel por duna yudansa practico.