Dicon Hesus A Muri?
E contesta cu Bijbel ta duna
Hesus a muri pa hende por haya pordon pa nan picanan y pa nan por haya bida eterno. (Romanonan 6:23; Efesionan 1:7) E morto di Hesus a proba tambe cu un hende por keda leal na Dios hasta bou di e pruebanan di mas pisa.—Hebreonan 4:15.
Ban wak con e morto di un homber por logra asina tanto.
Hesus a muri pa “pordon di nos picanan.”—Colosensenan 1:14.
E prome hende, Adam, a ser crea perfecto, sin pica. Sinembargo, el a scoge pa desobedece Dios. E desobediencia di Adam, of su pica, a afecta tur su descendientenan profundamente. Bijbel ta splica cu “mediante desobediencia di esun hende ey hopi a bira pecador.”—Romanonan 5:19.
Hesus tambe tabata perfecto, pero nunca el a peca. Pesey, e por ta “un sacrificio di reconciliacion pa nos picanan.” (1 Juan 2:2) E desobediencia di Adam a contamina e famia humano cu pica, pero e morto di Hesus a kita e mancha di pica for di tur hende cu pone fe den dje.
Den un sentido, Adam a bende nos cu pica. Pero ora cu Hesus a muri boluntariamente na fabor di humanidad, el a cumpra nos bek. Como resultado, “si sosode cu un di boso comete pica, nos tin un ayudante cerca e Tata: Hesucristo, un persona husto.”—1 Juan 2:1.
Hesus a muri “pa tur cu pone fe den dje no bay perdi, ma haya bida eterno.”—Juan 3:16.
Aunke Adam a ser crea pa biba pa semper, ora el a peca, el a haya e castigo di morto. Pa medio di Adam, “pica a drenta mundo, y morto pa medio di pica, y asina morto a pasa pa tur hende pasobra nan tur a peca.”—Romanonan 5:12.
Na contraste, e morto di Hesus no solamente a kita e mancha di pica pero tambe e sentencia di morto pa tur hende cu pone fe den dje. Bijbel ta resumi e asunto di e manera aki: “Mescos cu pica a reina como rey hunto cu morto, asina tambe bondad inmereci por reina como rey mediante husticia cu ta hiba na bida eterno pa medio di Hesucristo, nos Señor.”—Romanonan 5:21.
Naturalmente, ainda nos niun no por biba pa semper. Sinembargo, Dios ta priminti cu lo e duna hende husto bida eterno y cu lo e resucita hende morto pa asina nan tambe por beneficia di Hesus su sacrificio di rescate.—Salmo 37:29; 1 Corintionan 15:22.
Hesus “a bira obediente te na morto”, y asina el a proba cu un hende por keda fiel na Dios bou di cualkier prueba.—Filipensenan 2:8.
A pesar cu Adam tabatin un mente y curpa perfecto, el a desobedece Dios pasobra e tabatin un deseo egoista pa algo cu no a pertenece na dje. (Genesis 2:16, 17; 3:6) Despues, Dios su enemigo di mas grandi, Satanas, a insinua cu hende lo obedece Dios solamente pa deseonan egoista, vooral si nan bida ta den wega. (Job 2:4) Sinembargo, e homber perfecto Hesus a obedece Dios y a keda leal na dje y hasta a muri un morto bergonsoso y doloroso. (Hebreonan 7:26) Esaki a mustra unabes y pa semper cu hende por keda fiel na Dios bou di cualkier prueba.
Pregunta tocante e morto di Hesus
Dicon Hesus mester a sufri y muri pa salba humanidad? Dicon Dios no a djis cancela e sentencia di morto?
E ley di Dios ta bisa cu “e salario cu pica ta paga ta morto.” (Romanonan 6:23) En bes di sconde e ley aki for di Adam, Dios a bis’e cu e castigo pa desobediencia lo ta morto. (Genesis 3:3) Ora Adam a peca, Dios, “kende no por gaña”, a tene su mes na su palabra. (Tito 1:2) Adam no solamente a pasa pica pa su descendientenan, sino tambe e pago di pica, esta, morto.
Aunke hende pecador merece e castigo di morto, “e rikesa di Dios su bondad inmereci” a ser duna na nan. (Efesionan 1:7) Dios su provision pa salba humanidad, mandando Hesus como un sacrificio perfecto, tabata sumamente husto y misericordioso.
Ki ora Hesus a muri?
Hesus a muri mas o menos 3 or di atardi riba Pasco Hudiu. (Marco 15:33-37) Di acuerdo cu nos kalender, e fecha ey ta coresponde cu diabierna, 1 di april di aña 33.
Unda Hesus a muri?
Hesus a ser ehecuta na un luga cu “nan ta yama Luga di Carpachi, cu na Hebreo yama Golgota.” (Juan 19:17, 18) Den tempo di Hesus, e luga aki tabata “pafo di porta di e stad” di Jerusalem. (Hebreonan 13:12) Kisas e tabata riba un sero, pasobra Bijbel ta bisa cu tabatin algun hende cu tabata wak e ehecucion di Hesus “for di un distancia.” (Marco 15:40, Beibel Santu) Sinembargo, no por bisa cu siguridad unda precies Golgota tabata.
Con Hesus a muri?
Aunke hopi hende ta pensa cu Hesus a ser crucifica, esta, mata na un cruz, Bijbel ta bisa cu Hesus a ser colga na un staca, of palo. (Echonan 5:30). E escritornan di Bijbel a uza dos palabra Griego pa referi na loke nan a mata Hesus riba dje: staurós y xýlon. Hopi experto a conclui cu e palabranan aki ta referi na un staca of balki di palo para recht.
Con nos mester recorda e morto di Hesus?
Riba e anochi di e Pasco Hudiu anual, Hesus a reuni cu su siguidornan y a institui un manera simpel pa recorda su morto y a bisa nan: “Sigui haci esaki na mi memoria.” (1 Corintionan 11:24) Despues di algun ora, nan a mata Hesus.
E escritornan di Bijbel a compara Hesus cu e lamchi cu nan a sacrifica riba e dia di Pasco Hudiu. (1 Corintionan 5:7) Mescos cu e celebracion di Pasco Hudiu a corda e Israelitanan cu nan a ser libra for di sclavitud, asina tambe, e Conmemoracion di e morto di Hesucristo ta corda cristiannan cu nan a ser libra for di pica y morto. E Hudiunan tabata celebra e Pasco tur aña riba 14 di nisan segun e kalender lunar. Di igual manera, e cristiannan di prome siglo a conmemora e morto di Hesus un biaha pa aña.
Tur aña, miyones di hende rond mundo ta conmemora e morto di Hesus riba e fecha cu ta coresponde cu 14 di nisan.