SPLICACION DI TEXTO DI BIJBEL
Marco 1:15—“E Reino di Dios Ta Cerca”
“Awor ta e tempo, y e Reino di Dios a yega cerca. Arepenti y pone fe den e bon noticia.”—Marco 1:15, Traduccion di Mundo Nobo.
“E tempo ta cumpli, y e Reino di Dios ta cerca. Arepenti y kere e evangelio.”—Marco 1:15, Beibel Santu.
Splicacion di Marco 1:15
Hesucristo a bisa cu e Reino di Diosa “ta cerca”, of “a yega cerca”, debi cu e mes tabata presente eynan como Rey nombra di e Reino.
Hesus no tabata kiermen cu e Reino a cuminsa goberna e tempo ey. Pasobra mas despues, el a bisa su discipelnan cu e Reino lo a bin den futuro. (Echonan 1:6, 7) Sinembargo, Hesus a aparece na e tempo stipula, precies e aña cu Bijbel a bisa cu e lo a presenta como e futuro Rey.b Pesey, Hesus por a bisa: “Awor ta e tempo”, e tempo pa e cuminsa predica e evangelio, of bon noticia, tocante e Reino.—Lucas 4:16-21, 43.
Pa hende por beneficia di e bon noticia di Reino, nan mester arepenti, esta, haya duele di nan picanan di pasado y biba segun e normanan di Dios. Hende cu a arepenti a mustra cu nan tabatin fe den e bon noticia tocante e futuro Reino.
Contexto di Marco 1:15
Hesus a bisa e siguiente palabranan na comienso di su sirbishi na Galilea. E relato paralelo na Mateo 4:17 ta bisa: “For di e tempo ey padilanti”, Hesus a predica tocante e Reino di Dios. E Reino tabata e topico principal di Hesus su sirbishi. Si bo wak bon, e cuater Evangelionanc ta menciona e Reino mas cu 100 biaha, y mayoria di bes ta ora Hesus tabata papia. Den Bijbel, Hesus a papia mas tanto biaha tocante e Reino cu cualkier otro topico.
Lesa Marco capitulo 1 hunto cu nota di aclaracion.
a E Reino di Dios ta e gobierno cu Dios a establece den cielo pa cumpli cu su boluntad riba Tera. (Daniel 2:44; Mateo 6:10) Pa mas informacion, wak e articulo “Kico e Reino di Dios Ta?”
b Hesus mester a bira rey pa e por a cumpli cu un di su papelnan como Mesias, e representante special di Dios. Pa mas informacion tocante profecia di Bijbel cu ta referi na Hesus su papel como Mesias, wak e articulo na Spaño “¿Prueban las profecías de la Biblia que Jesús fue el Mesías?”
c E Evangelionan ta e prome cuater bukinan di e Scritura Griego Cristian, mihor conoci como e Testament Nobo, cu ta papia di Hesus su bida y sirbishi.