Un Bibliotheek Cu Bo Por Tene den Bo Man

“No hopi tempo pasa, nos lo no por a imagina cu nos lo a haya alimento spiritual den forma digital.” Abo ta di acuerdo cu e palabranan ey? Nan tabata parti di un discurso animante cu Ruman Geoffrey Jackson a duna den e Informe #6 di 2020 di Cuerpo Gobernante. El a sigui bisa: “Anto awor nos ta puntra nos mes, ta con nos lo haci den e pandemia aki sin herment manera JW Library? A traves di aña, Jehova a prepara nos pa nos ta cla pa un situacion asin’aki.”

Con Jehova a prepara nos? Kico tur mester a haci pa crea e app JW Library, y kico ta necesario pa mantene e app al dia y mehor’e?

Un App Unico

Na mei 2013, Cuerpo Gobernante a puntra MEPS Programming, un departamento di nos oficina principal, pa crea un app cu ta contene e edicion revisa di New World Translation. Paul Willies, kende ta traha den e departamento di MEPS Programming, a bisa: “Nunca prome, nos no a yega di crea un app cu lo ta disponibel pa download via aparatonan electronico. Pa logra esey, nos mester a forma un team, stop di traha riba algun proyecto y traha hunto cu otro departamento di Betel. Nos a haci hopi oracion, y cu Jehova su yudansa e app tabata disponibel cinco luna despues na e reunion anual.”

Despues tabatin un otro reto, nos mester a comberti e app JW library den un bibliotheek completo cu mas publicacion y disponibel na mas idioma. Na januari 2015, mayoria di nos publicacionnan na Ingles tabata disponibel den e app, y apenas seis luna despues, hende por a download e publicacionnan ey den cientos di idioma.

Desde e tempo ey, nos rumannan a mehora e app den varios manera. Por ehempel, nan a agrega video, nan a pone tur material cu nos tin mester pa reunion den un luga, y nan a haci posibel pa nos por mira informacion for di e Guia pa Busca Informacion ora nos ta lesa un versiculo di Bijbel.

Manteniendo e App al Dia

JW Library ta ser habri riba 8 miyon aparato electronico tur dia y riba mas cu 15 miyon aparato electronico tur luna! Kico ta necesario pa asina e app por sigui traha bon riba e aparatonan ey? Ruman Willies ta splica: “E trabou aki nunca ta keda cla. Constantemente nos ta trahando pa agrega mas cos na e app y pa haci e app mas facil pa hende uza. Como cu e operating system riba nos aparatonan electronico ta keda update, nos tambe tin cu sigui update JW Library pa e sigui funciona riba e aparatonan ey. Ademas, nos mester sigui mantene y mehora nos software interno segun cu e cantidad di publicacion y grabacion riba e app JW Library ta sigui aumenta.” Actualmente tin mas o menos 200.000 publicacion y mas cu 600.000 grabacion di audio y video disponibel riba JW Library na diferente idioma!

Pa mantene e app al dia, no ta solamente ekipo di computer ta necesario. Ta necesario tambe pa cumpra licencia pa varios software. Un licencia so ta costa $1.500 (U.S.) pa aña. Ademas, MEPS Programming ta gasta mas o menos $10.000 (U.S.) tur aña pa cumpra aparatonan electronico di diferente marca pa haci sigur cu e app lo sigui traha bon riba computer, tablet y telefon nobo.

Ora Nos Download, Nos Ta Spaar Placa

Danki na e app JW Library, nos ta uza hopi menos placa pa print y transporta publicacion. Tuma por ehempel e foyeto Analisa e Scritura Tur Dia. Nos a imprimi casi 12 miyon ehemplar di e edicion di 2013. Pero pa e edicion di 2020, nos a imprimi apenas cinco miyon ehemplar—aunke nos tabatin mas o menos 700.000 publicador mas rond mundo. Kico a cambia? Awor, hopi di nos rumannan ta lesa e texto di dia riba JW Library.a

E App Aki “Ta Hopi Valioso”

E app JW Library ta yuda nos den varios manera. Geneviève, kende ta biba na Canada, ta sinti cu e app a yud’e studia Bijbel mas regular. El a bisa: “Si mi mester a sinta saca yen di buki pa mi por a studia Bijbel, mi no ta kere cu lo mi a studia tur mainta. Pero cu e app, mi tin cu djis coge mi tablet y mi tin tur loke mi tin mester den mi man. Como cu awor mi ta studia Bijbel regularmente, mi fe a bira mas fuerte, y mi a hala mas cerca di Jehova.”

E app tabata hopi util durante e pandemia di COVID-19. Charlyn, kende ta biba na Merca, ta splica: “Cu e pandemia di COVID-19 tur rond di nos, mi no a haya nos publicacionnan imprimi pa mas cu un aña. Pero cu e app JW Library, nos por a haya tur loke nos tabatin mester pa keda spiritualmente fuerte, y mi ta agradecido na Jehova pa e provision amoroso aki.”

Hopi hende ta sinti mescos cu Faye, cu ta biba na Filipinas. El a bisa: “E app aki ta tremendo, e tin tur loke mi tin mester pa keda pega cu Jehova. Mi ta uz’e pa lesa mainta trempan, pa scucha algo animante mientras cu mi ta haci cos rond di cas, pa prepara pa reunion y pa studia Bijbel. Den mi tempo liber, mi ta uz’e pa wak video. Y ora mi tin cu warda un caminda, mi ta uz’e pa lesa articulo of Bijbel. E ta hopi valioso.”

E app ta hopi valioso tambe den sirbishi. Por ehempel, un ruman muher na Camerun kier a uza un texto cu el a scucha un otro ruman muher uza algun siman prome. Sinembargo, e no por a corda e texto. El a splica: “Ta bon mes mi por a corda un frase di e texto. Mi a habri e app, bay na Bijbel, y mi a busca e frase. Di biaha mi a haya e texto. Cu e app, mi por haya hopi texto cu tin biaha mi ta lubida.”

Boso donacionnan generoso uzando e metodonan describi na donate.jw.org a yuda nos crea, mantene y mehora e app JW Library pa nos rumannan rond mundo. Danki pa boso generosidad.

Logronan di JW Library

1. 

   October 2013—E app cu e edicion revision di New World Translation a bira disponibel

2. 

   Januari 2015—Otro publicacion a bira disponibel na Ingles y despues na varios otro idioma

3. 

   November 2015—A bira posibel pa marca of highlight den e app

4. 

   Mei 2016—A agrega e seccion pa reunion

5. 

   Mei 2017—A bira posibel pa skirbi nota den e app

6. 

   December 2017—A agrega Bijbel pa Estudio na Ingles

7. 

   Maart 2019—A bira posibel pa download grabacion di audio, pa wak video online y pa mira e referencianan di Guia pa Busca Informacion

8. 

   Januari 2021—A agrega algun cos pa e curso di Bijbel Bo Por Disfruta di Bida pa Semper!