Ta Haci Mantencion di Nos Salonnan di Reino

“Ami stima mi Salon di Reino!” Esey ta loke Nicole, un ruman muher di Colombia, a expresa. Di con el a bisa esey? El a splica: “Pasobra, eynan ta caminda mi por ta cu mi famia spiritual.” Abo tambe ta sinti asina?

Rond mundo, testigonan di Jehova ta reuni den un 63.000 Salon di Reino. Esakinan ta edificionan unda nos por adora Dios den tur comodidad. Pero, nan ta sirbi pa mas cu esey so. Un pionero regular cu yama David di Colombia a bisa: “Nos Salon di Reino ta dorna nos siñansa. Hopi hende cu bishita nos Salon ta keda masha sorprendi con bon nos ta mantene nos edificio.” Pero, esey no ta casualidad. Nos ta haci hopi esfuerso pa limpia nos Salon y ten’e den bon condicion. Con ta logra esaki?

Con Ta Organisa e Mantencion?

E congregacionnan cu ta uza un Salon di Reino, ta responsabel pa manten’e tambe. Pesey, rumannan ta haci nan Salon di Reino limpi regularmente. Ademas, nan ta haci mantencion preventivo y reparacion chikito.

Pa yuda e rumannan mantene nan Salon di Reino, e departamento Local di Diseño y Construccion (LDC) ta apunta ruman hombernan como entrenado di mantencion. Cada un di e rumannan aki ta supervisa entre seis pa dies Salon di Reino. E ta bishita nan y ta entrena e rumannan di e congregacion con pa cuida nan salon. Cada tres aña e ta examina cada edificio y ta identifica e problemanan den mantencion of di siguridad.

Nos rumannan tin hopi aprecio pa e training cu e entrenadonan di mantencion ta duna. Indhumathi, un ruman muher di India, a bisa: “Mi a keda masha encanta cu e training. Tabata dushi pa siña con pa tene nos salon den bon condicion.” Evans, un ruman homber di Kenya, a bisa: “Nos a siña con nos por evita gastonan inmenso door di atende cu problemanan chikito prome nan bira grandi.”

Con Ta Cubri e Gastonan

E gastonan anual pa maneha y mantene un Salon di Reino por varia di cientos te na miles di dollar,a dependiendo na unda e salon ta situa, con bieu e ta y cuanto congregacion ta haci uzo di dje. Con ta cubri e gastonan aki?

E gastonan di mantencion di un Salon di Reino ta ser cubri cu placa di donacion. Alexander, un ruman di Kazakhstan, a splica: “Parti di e placanan ey ta bay pa paga servicionan manera di internet, awa y coriente. Otro parti ta bay na cumpra productonan di uzo, manera papel di seca man, handschoen, articulo di limpieza y verf.” Loke ta resta, ta bay pa e obra mundial pa yuda cu proyectonan di mantencion na otro parti di mundo cu ta mas grandi y mas costoso.

Proyectonan di Mantencion Mas Grandi

Si e mantencion di un Salon di Reino lo costa mas di dos pa tres luna di gasto di maneho, e ancianonan ta tuma contacto cu e entrenado di mantencion di LDC. Si LDC aproba e proyecto, normalmente e ta ser cubri door di e fondonan di donacion pa e obra mundial. Durante e aña di sirbishi di 2023 a logra haci 8.793 proyecto, cu un costo total di US$76,6 miyon. Ban wak dos di e proyectonan aki.

Na Angola, un Salon di Reino di 15 aña bieu, tabatin varios problema. E sistema electrico mester a wordo reemplasa, varios muraya tabatin scheur y bisiña a keha di awa cu tabata yena nan cas. LDC a organisa un proyecto pa drecha e problemanan ey. El a costa US$9.285. E bisiñanan tabata masha agradecido y a keda impresiona cu e manera con e rumannan a realisa e trabou.

Na Polonia dak di un di e Salonnan di Reino tabata lek, anto e tapijt tabata asina daña cu no por a scap’e mas. LDC a aproba un proyecto pa drecha e dak y hacie waterproof, anto pone tapijt nobo. E proyecto a costa US$9.757. Door di esaki, pa varios aña lo no mester haci ningun renobacion grandi na e Salon di Reino aki.

Mantencion Cu Ta Trece Honor na Jehova

Mantencion no solamente ta spaar hopi placa valioso di donacion, sino tambe ta duna honor na Jehova. Shaun, un ruman na Tonga, a bisa: “Danki na e trabounan di mantencion, nos por adora Jehova den un Salon di Reino limpi y ordena, den cual tur cos ta funciona bon. Esaki ta pone cu hende den nos comunidad ta papia bon di Jehova su nomber. Nos ta sinti nos orguyoso pa invita hende bin na nos Salon di Reino.”

Con Abo Por Yuda?

Cada un di nos por yuda tene nos luga di adoracion limpi y na ordo. Marino, un entrenado di mantencion na Australia, a bisa: “Nos tur por tin e gran privilegio di cuida nos Salonnan di Reino. Haciendo esey, nos lo berdaderamente spaar fondonan dedica y permiti pa nan ser uza caminda nan ta echt necesario.”

Joel, un ruman di India, ta disfruta di haci trabou di mantencion na su Salon di Reino. El a splica: “Trahando asina cu mi rumannan ta laga mi sinti manera ya mi ta den e mundo nobo caba.” Nicole, menciona anteriormente, a bisa: “Poco dia ey, mi a yuda mop e vloer mientras e rumannan tabata drecha un lek den baño. Aunke mi no a drecha e problema, pero toch mi a preveni un accidente.”

Si abo kier yuda mantene bo Salon di Reino, papia cu e ancianonan di bo congregacion. Ademas, bo donacionnan ta yuda sostene e mantencion, no solamente di bo Salon di Reino, sino tambe di otro Salonnan di Reino rond mundo. Bo por haci donacion uzando e cahanan di contribucion den bo salon of bo por hacie tambe via donate.jw.org. Masha danki pa bo generosidad.