Pa Cuanto Tempo Mas Persecucion Religioso Lo Sigui na Georgia?

FOR DI E DUSHI WEER CANT’I COSTA di Lama Preto te na e Seronan Caucasus hopi friu, Georgia ta un pais cu un beyesa natural. Mondi cera, riu cu coriente fuerte y vayenan berde ta dorna e region yen di sero aki cu ta keda un pida den Europa y un pida den Asia. Tbilisi, capital di Georgia, ta un stad druk caminda bo ta haya un combinacion di edificionan moderno y monumentonan arkitectonico di pasado. Pero Georgia su posesion mas balioso ta su pueblo, conoci pa nan lasonan familiar fuerte y dushi hospitalidad.

Durante henter historia e pueblo di Georgia a sufri opresion. Nan pais a ser invadi door di Romano, Perso, Bizantino, Arabir, Turco, Mongol, Ruso y otronan. Segun un conteo, nan a yega di destrui Tbilisi 29 biaha!a Apesar di tur esei, e habitantenan di Georgia a keda cu nan amor pa bida, arte, canto y baile, y tambe cu nan reputacion di ta un sociedad tolerante.

Pero lamentablemente, nos no por bisa esaki mas di tur hende di Georgia. Durante e ultimo dos añanan, un grupo chikito di Georgiano a daña e reputacion di nan pais door di ataca cientos di nan cociudadanonan. Multitudnan di atacante furioso a bati homber, mohe y mucha inocente, y tambe hende di edad y personanan cu ta incapasita. Uzando klop cu clabo na dje y bara di hero, e atacantenan a blousa nan victimanan su curpa, corta nan cara y habri nan cabes. Dicon nan ta bati ciudadanonan inofensivo di Georgia asina ferosmente? Pasobra nan ta Testigo di Yehova, un comunidad Cristian cu tawata na Georgia asta prome cu mayoria di e atacantenan ei a nace.

Di Denuncia te na Atake

Aunke Georgia ta garantisa libertad religioso, cu frecuencia literatura di Testigonan di Yehova tawata ser confisca. Na april 1999, funcionarionan di duana a declara cu por saca e literatura solamente cu permit di e patriarca, esta, e cabes di Iglesia Ortodox di Georgia.b E siguiente luna, a bolbe menciona nomber di Iglesia Ortodox, e biaha aki den Corte di Districto di Isani Samgori. Einan Guram Sharadze, parlamentario y lider di e movemento politico “Georgia Riba Tur!”, a entama un caso pa purba disolve e entidadnan huridico cu Testigonan di Yehova ta uza. El a acusa e Testigonan di ta antinacionalista y peligroso. Ken tawata respalda e acusacion di Sharadze? Hunto cu e demanda tawatin un carta di e secretario di e Patriarca Lider di Henter Georgia.

Dia 20 di mei 1999, Georgia a acepta e Tratado Europeo pa Proteccion di Derecho Humano y Libertadnan Fundamental, y asina a compromete su mes pa apoya e stipulacionnan di e tratado. Articulo 10 ta stipula: “Tur hende tin derecho riba libertad di expresion. E derecho aki lo encera libertad di tin nan opinion y di ricibi y comparti informacion y ideanan sin cu autoridad publico ta interferi, sin importa frontera.” E derecho aki a pone cu oponentenan di e Testigonan a stop cu nan intento pa prohibi literatura religioso? Di ningun manera!

Dia 21 di juni 1999, Oficina di e Patriarca di Henter Georgia a manda un carta pa e hefe di inspeccion di duana, den cua el a insisti cu “mester prohibi distribucion di literatura religioso stranhero.” Ademas, Giorgi Andriadze, bosero oficial di Iglesia Ortodox di Georgia, a declara cu Testigonan di Yehova ta peligroso y cu mester prohibi nan. Hende no a ignora e denuncianan aki. Fanaticonan religioso, cu anteriormente a kima literatura di Testigonan di Yehova, awor tawatin confiansa cu nan lo por ataca e Testigonan mes y keda sin haya castigo. Diadomingo, 17 di october 1999, nan a ataca atrobe.

No Ta Castiga Accion di Multitud Violento

E diadomingo ei, un 120 Testigo di Yehova na Tbilisi—hende homber, hende mohe y mucha—a asisti na un reunion religioso. Diripiente, Vasili Mkalavishvili, un pastor Ortodox cu a perde su puesto, hunto cu 200 di su siguidonan a basha drenta den e luga di reunion.c Nan a rondona e Testigonan y a keda bati nan cu klop y cu crus di hero. Cuater atacante a gara un Testigo na su brasa y garganta. Nan a manda su cabes abou y a cuminsa feita su cabes mientras cu e multitud tawata para gosa di su humiliacion. Ora cu e multitud frenetico por fin a bai, 16 Testigo mester a haya tratamento na hospital. Un homber tawatin tres repchi kibra. Un otro Testigo, un señora di 40 aña cu yama Phati, a conta despues: “Nan a cuminsa grita mi, y un di nan a dal mi cu tur su forsa. El a dal mi den mi cabes, den mi wowonan. Mi a purba tapa mi cara cu mi mannan. Sanger tawata core na mi dedenan.” Ora cu e homber cruel aki a caba di batie, Phati no por a mira cu su wowo robes. Te awe Phati su wowo a keda malo debi na e golpinan.

E atake scandaloso aki, cu nan a pasa na television, a pone Presidente Eduard Shevardnadze expresa su mes. E siguiente dia, el a declara: “Mi ta condena e suceso aki y ta kere cu instancianan hudicial mester lanta un caso criminal.” Siendo cu e grabacion riba video a identifica e lider di e multitud violento y e otro atacantenan, lo tawata facil pa sentencia nan. Sinembargo, despues di dos aña, ainda ningun di e atacantenan no a ser sentencia.

Mas Curashi door di Falta di Castigo

Autoridatnan—gubernamental y religioso—no a tuma ningun accion. Pues no ta un sorpresa cu esei a laga e atacantenan comprende cu nan lo a tolera violencia. Anima pa e echo cu nan no a haya castigo, e atacantenan a intensifica nan proceder destructivo di horta, bati y scop Testigonan di Yehova den casnan priva, riba caya y na luganan di adoracion. Entre october 1999 y augustus 2001, tawatin mas cu 80 atake documenta contra Testigonan di Yehova, afectando mas cu 1.000 victima. Pero toch dia 9 di februari 2001, un fiscal na Tbilisi a bisa reporteronan cu e investigacion contra Vasili Mkalavishvili “ainda ta andando.” Lamentablemente, te cu awor cu nos ta skirbiendo e articulo aki, autoridadnan di Georgia ainda ta permiti hende cu ta opone Testigonan di Yehova sigui cu nan crimennan motiva door di odio.—Wak e cuadro “Accion di Multitud Violento Ta Sigui.”

Ki papel polis ta hunga den esaki? Informenan di noticia y grabacionnan riba video ta revela cu polis no solamente ta permiti e atakenan contra Testigonan di Yehova, sino tambe ta participa den nan! Por ehempel, dia 8 di september 2000, den e stad Zugdidi, un grupo di agente policial a uza klop pa para un congreso pacifico di 700 Testigo di Yehova. Hende cu a mira loke a pasa, a informa cu agentenan policial enmascara “a laga atras un racha di destruccion”, y a bati mas cu 50 Testigo. E doño di e sitio di congreso a corda e teror riba cara di e muchanan segun cu polis tawata tira proyectilnan antitanke sin bala riba nan cabes. El a bisa: “E bista ei a kibra bo curason.” Polis a invadi e luga y kim’e plat plat. Sinembargo, te cu awe nan no a haya castigo.

Como cu e incidente baho aki no ta un excepcion (wak e cuadro “Participacion di Polis”), dia 7 di mei 2001, Nacionnan Uni su Comite Contra Tortura corectamente a expresa su precupacion pa “actonan continuo di tortura y otro actonan di trato of castigo cruel, inhumano of degradante na Georgia cometi door di personal di e aparato hudicial; e fayo continuo di no ta percura tur biaha pa investigacionnan inmediato, imparcial y completo den cantidad di alegacion di tortura.”d Si, ni un di e mas cu 400 kehonan cu Testigonan di Yehova a entrega na polis no a hiba na sentencia di e personanan cu ta conoci cu nan a comete e crimennan! Pesei Georgia su Ombudsman, esta, su Defensor Publico cu ta ser eligi door di parlamento, a remarca: “Derecho humano ta ser viola door di net e personanan cu, door di nan trabou, tin e obligacion di proteha e derechonan ei. Den nan bista, derecho humano no ta nada mas cu un pida papel.”

Decision di Corte Supremo Ta Crea Confusion

Como si fuera e atakenan ilegal di multitudnan violento y di polis no tawata basta, Corte Supremo di Georgia resientemente a dicta un fayo cu a crea confusion en cuanto e derechonan di Testigonan di Yehova.

Laga nos considera algun informacion relevante pa bo por comprende e situacion. E politico Guram Sharadze a entama un caso pa purba disolve e entidadnan huridico di Testigonan di Yehova. Dia 29 di februari 2000, corte a descarta su caso. Sinembargo, Sharadze a apela y gana. Testigonan di Yehova, na nan turno, a apela na Corte Supremo. Dia 22 di februari 2001, Corte Supremo a dicidi den contra di e Testigonan, basicamente riba puntonan tecnico. Corte Supremo a rasona cu e Constitucion ta spesifica cu religionnan mester ta registra bou di lei publico di acuerdo cu un cierto lei cu ainda no ta existi y cu ta detaya e registracion di asociacionnan religioso. Corte a conclui cu como cu e lei aki no t’ei ainda, no tin ningun otro forma alternativo pa Testigonan di Yehova registra. Sinembargo, tin 15 otro asociacion cu ta apoya actividad religioso cu si ta legalmente registra na Georgia.

Den un entrevista na television, Minister di Husticia di Georgia, Mikheil Saakashvili, su reaccion riba e decision di Corte Supremo tawata: “Desde un punto di bista legal, e decision ta hopi dudoso. Mi no ta kere cu e ta e pagina mas exitoso den historia di Corte Supremo.” Zurab Adeishvili, presidente interino di e comite legal parlamentario di Georgia, a bisa e Servicio di Noticia Keston cu e tawata “masha precupa” cu e decision pasobra “esaki ta anima forsanan extremista den nos Iglesia [Ortodox di Georgia] pa suprimi minorianan religioso.” Lamentablemente, Adeishvili su precupacion a resulta hustifica. Un par di dia despues di e decision di corte, violencia contra Testigonan di Yehova a reanuda. Durante aña 2001, Testigonan di Yehova a ser ataca door di multitudnan violento, polis y pastornan Ortodox riba 27 di februari, 5 di maart, 6 di maart, 27 di maart, 1 di april, 7 di april, 29 di april, 30 di april, 7 di mei, 20 di mei, 8 di juni, 17 di juni, 11 di juli, 12 di augustus, 28 di september y 30 di september. Y e lista ta sigui keto bai.

Meimei di e ola nobo aki di persecucion, Corte Supremo a dal e paso inusual di clarifica su decision publicamente, declarando: “Desafortunadamente, e publico a malinterpreta e anulacion cu Corte Supremo a haci di e registracion di Union di Testigonan di Yehova . . . Ora a anula e registracion di corte di e acusadonan como un entidad huridico di lei priva, corte no a kita ni restringi directamente ni indirectamente nan derecho riba libertad di pensamento, consenshi y religion. No a restringi nan libertad di cambia nan creencia, sea nan so of hunto cu otronan, sea publicamente of den priva. . . . E decision di Corte no a restringi e acusadonan su derecho di ricibi y distribui nan ideanan y informacion. E no a prohibi nan derecho di tene reunionnan pacifico.”

Miles di Georgiano Ta Condena e Persecucion

Aunke ta parce cu e declaracion aki di Corte Supremo no tawatin masha efecto riba e personanan cu tawata comete e violencia, ta alentador pa ripara cu miles di ciudadano di Georgia ya caba a condena e persecucion cu ta tumando luga. Cuminsando dia 8 di januari 2001, Testigonan di Yehova a laga un peticion circula pa pidi proteccion contra atake di multitudnan violento y pa hiba dilanti corte esnan cu a participa den atakenan violento contra ciudadanonan di Georgia. Den dos siman, 133.375 ciudadano adulto for di tur region di Georgia a firma e peticion. E gran mayoria di esnan cu a firma probablemente ta miembro di Iglesia Ortodox di Georgia, ya cu tin solamente 15.000 Testigo di Yehova na Georgia. Pero dia 22 di januari 2001, e peticion a disparce. Kico a sosode?

Riba e dia ei, den oficina di e Defensor Publico di Georgia, Nana Devdariani, tawatin un conferencia di prensa pa presenta e peticion oficialmente. Diripiente, durante e conferencia, Vasili Mkalavishvili y dies otro hende a basha drenta den e oficina pa gara e 14 mapnan di cua e peticion a consisti. Un representante di e Instituto pa Pas y Democracia di Caucasus a purba proteha e peticion, pero e invasornan a ataca e señora. Mientras cu Mkalavishvili tawata grita insulto, su siguidonan a ranca 12 di e 14 mapnan for di e organisadonan y a core bai cu nan. Un diplomatico stranhero cu tawata testigo di e incidente a sclama: “Esaki ta simplemente increibel!” Afortunadamente, dia 6 di februari e Testigonan a haya e peticion bek den nan poder, y dia 13 di februari 2001, nan a present’e na e presidente di Georgia.

‘Lo Hiba Tur Acto di Hostigamento Dilanti Corte’

Testigonan di Yehova na Georgia y rond mundo ta confia cu e presidente di Georgia lo tuma accion relaciona cu e peticion aki. Den pasado Presidente Shevardnadze a condena repetidamente e persecucion di Testigonan di Yehova. Por ehempel, dia 18 di october 1999, e presidente a describi e atakenan contra Testigonan di Yehova como ‘masacrenan organisa’ “intolerabel.” Dia 20 di october 2000, Presidente Shevardnadze a skirbi den un carta na un miembro di e Cuerpo Gobernante di Testigonan di Yehova: “Nos lo haci nos best pa eradica violencia.” El a agrega: “Laga mi sigura bo cu autoridadnan di Georgia lo keda fiel na nan compromiso di proteha derechonan humano y libertad di consenshi.” Anto un biaha mas dia 2 di november 2000, den un carta na e Comision di Siguridad y Coperacion na Europa, Presidente Shevardnadze a declara: “E asunto aki [di e status di minorianan religioso na Georgia] ta un precupacion serio di nos pueblo y di gobierno.” El a sigura e comision: “Lo hiba tur acto di hostigamento y violencia fisico dilanti corte, y esnan culpabel di e actonan aki tin cu rindi cuenta na husticia.”

Observadonan precupa na Europa y otro partinan di mundo ta spera cu pronto e palabranan firme di Presidente Shevardnadze lo bira realidad. Mientras tanto, Testigonan di Yehova rond mundo ta sigui pidi den oracion pa nan compañeronan creyente na Georgia segun cu e Testigonan balente ei ta sigui sirbi Yehova apesar di persecucion amargo.—Salmo 109:3, 4; Proverbionan 15:29.

[Nota]

[Mapa na pagina 18]

(Pa e texto den su formato completo, wak e publicacion)

RUSIA

GEORGIA

LAMA PRETO

TURKIA

[Plachi na pagina 18]

13 DI MEI 2001 - Famia Shamoyan a perde nan cas ora cu un persona maliciosamente a peg’e na candela

[Plachi na pagina 18]

17 DI JUNI 2001 - Giorgi Baghishvili a ser ataca violentamente na un reunion di Testigonan di Yehova

[Plachi na pagina 19]

11 DI JULI 2001 - Nan a dal David Salaridze cu klop riba su cabes y a batie riba su lomba y na su repchinan na un reunion di Testigonan di Yehova

[Cuadro/Plachi na pagina 20]

ACCION DI MULTITUD VIOLENTO TA SIGUI

E echo cu autoridadnan di Georgia no ta sentencia e atacantenan di Testigonan di Yehova a pone e Testigonan haya mas persecucion.

Por ehempel, dia 22 di januari 2001, den e region Svanetis Ubani di Tbilisi, e expastor Ortodox Vasili Mkalavishvili y su multitud violento a invadi un reunion religioso di 70 Testigo. E atacantenan a dal y scop e Testigonan y a bati nan cu crus di palo y di hero. Un atacante a dal un crus grandi di palo riba cabes di un Testigo cu asina un forsa, cu e crus a kibra. Nan a lastra algun Testigo hiba den un cuarto scur caminda varios atacante a bati nan. Nan a obliga Testigonan di edad core pasa entre rei di atacante cu tawata dal nan cu mokete y cu crus segun cu nan tawata pasa. Dos homber adulto a core tras di un mucha homber di 14 aña, caba a dal e mucha indefenso cu mokete y scop. Un atacante di 30 aña a core tras di un mucha homber di 12 aña y a dal e cu asina un Bijbel Georgiano grandi riba su cabes. Entre tanto un Testigo a sali core for di e cas pa bai yama polis, pero nan a gar’e. E multitud a keda bati su cara te ora cu su boca a yena cu sanger y el a cuminsa saca. Finalmente, e multitud cruel a plama. Te ainda e atacantenan no a haya castigo.

Un biaha mas, dia 30 di april 2001, e siguidonan di Mkalavishvili a interumpi un reunion religioso di e mesun congregacion di Testigonan di Yehova. E atacantenan a lastra e Testigonan bai cu ne pafo y a bati nan cu palo cu clabo na dje. E clabonan a habri brasa drechi, man robes, pia robes y banda di cara robes di un Testigo cu yama Tamaz. Ademas, Tamaz mester a haya cinco cosi pa cera un corta grandi riba su cabes. Tambe e multitud a plunder e cas caminda tawata tene e reunion, y a bati e mueblenan, ekipo electrico y tur bentana kibra. Caba nan a kima literatura publica door di Testigonan di Yehova den un candela grandi. Dia 7 di juni 2001, e organisacion Vigilancia di Derechonan Humano oficialmente a pidi informacion cerca Minister di Asuntonan Interno di Georgia, Kakha Targammadze, y di e Procurado General di Georgia, Gia Mepharishvili, tocante e pasonan cu a ser tuma pa hiba dilanti corte esnan culpabel di e atakenan resiente aki y di otro atake. Te asina leu, no a hiba ningun di e atacantenan dilanti.

[Cuadro na pagina 21]

PARTICIPACION DI POLIS

Dia 16 di september 2000, polis di e stad Marneuli a pone baricada pa stroba 19 bus cu Testigo di Yehova aden di yega na e sitio di un congreso. Na un di e baricadanan, atacantenan a tira piedra riba e busnan cu e Testigonan aden, y a dal un pasahero den cabes. Nan a lastra varios Testigo saca for di e busnan y a bati nan, y otro pasaheronan a ser atraca. Na mesun tempo, polis a laga varios bus cu siguidonan di Mkalavishvili aden pasa libremente, kendenan tawata dicidido na destrui e sitio di congreso. E multitud violento a kima un ton y mei di literatura religioso. Polis cu tawata presente a yuda bati e Testigonan.

E agencia di noticia Caucasus Press a informa cu Ministerio di Asuntonan Interno lo investiga e atake aki y tuma “medidanan apropiado.” Investigadonan tin base solido pa acusa esnan cu a comete e actonan aki. Constitucion di Georgia, Articulo 25, ta garantisa e derecho di tur hende di tene un asamblea publico. Sinembargo, ni un di e atacantenan no a ser hiba dilanti corte. Cinco luna despues di e atake aki, Agencia di Noticia Keston a informa cu un abogado di Guram Sharadze, lider di e movemento politico “Georgia Riba Tur!”, a admiti cu Sharadze a influencia autoridadnan di Marneuli y Zugdidi pa no laga tene e dos congresonan di Testigonan di Yehova.

[Cuadro na pagina 21]

CONSTITUCION DI GEORGIA TA GARANTISA PROTECCION

Constitucion di Georgia di 24 di augustus 1995, ta garantisa libertad di religion y proteccion contra atakenan brutal, manera e siguiente citanan for di dje ta mustra:

Articulo 17—(1) No mag viola un persona su honor y dignidad. (2) No ta permiti tortura, trato of castigo inhumano, brutal of degradante.

Articulo 19—(1) Tur persona tin derecho riba libertad di expresion, pensamento, consenshi, religion y creencia. (2) Ta prohibi pa persigui un persona pa motibo di su pensamentonan, creencianan of religion.

Articulo 24—(1) Tur persona tin derecho di ricibi y distribui informacion libremente, expresa y distribui su opinion oralmente, por escrito of den cualkier otro forma.

Articulo 25—(1) Tur persona, cu excepcion di miembronan di forsanan arma, polis y servicionan di siguridad, tin derecho di tene un asamblea publico sin arma sea paden di un luga of pafo den aire liber, sin tin cu pidi permit di antemano.

[Cuadro na pagina 22]

MUNDO TA OBSERVANDO

Con comunidad internacional ta considera e echo cu Georgia no ta stop e persecucion di Testigonan di Yehova?

Gobierno di Merca y Gran Bretania a declara conhuntamente: “Un reunion di Testigonan di Yehova a ser interumpi na mal manera, nan a maltrata un cantidad di hende violentamente y a stroba otronan di drenta den e reunion. E Embahadanan di Merca y Gran Bretania ta hopi molestia pa esaki y pa otro casonan resien caminda ta stroba hende di eherce nan derecho di libertad religioso na Georgia . . . Nos ta haci un yamada riba Gobierno di Georgia pa e investiga e incidentenan aki y pa ta alerta pa haci sigur cu hende ta respeta derecho religioso di tur persona.”

Presidente di e Delegacion di Union Europeo Comite di Coperacion Parlamentario di Georgia, Ursula Schleicher, a declara: “Na nomber di e delegacion di Parlamento Europeo mi kier expresa mi consternacion relaciona cu e incidente mas resien den un serie di atake violento contra reportero, activista di derecho humano y Testigonan di Yehova . . . Mi ta considera e tipo di actonan aki un atake scandaloso contra e derechonan humano fundamental na cua Georgia a compromete su mes ora e tambe a firma e Tratado Europeo pa Proteccion di Derecho Humano y Libertadnan Fundamental.”

Relaciona cu e atakenan contra Testigonan di Yehova, e Comision Mericano di Siguridad y Coperacion na Europa a skirbi Presidente Shevardnadze: “E ultimo sucesonan ta realmente alarmante y ta surgi e miedo cu e situacion na Georgia ta saliendo for di man. Si no haci nada, esnan cu ta exigi violencia contra minorianan religioso lo ser anima pa sigui cu nan actonan destructivo. Nos ta spera cu abo, como hefe di estado, lo pone un ehempel pa e publico y pa e funcionarionan di Georgia y transmiti dos mensahe firme y bon cla: sin importa kico un hende ta pensa di otro religion, no ta permiti uzo di ningun forma di violencia contra miembro di e religionnan ei; y personanan cu participa den tal violencia—specialmente polis cu sea ta facilita e accionnan bergonsoso aki of de echo ta participa den nan—lo tin cu rindi cuenta dilanti corte te na e pleno grado di lei.” Shete miembro di Congreso Mericano a firma e carta aki.

Christopher H. Smith, copresidente di e Comision di Siguridad y Coperacion na Europa y miembro di Congreso Mericano, a declara: “Dicon Georgia no ta sostene libertad religioso y derechonan humano manera nan a bisa cu nan lo haci? . . . Kimamento di literatura ta completamente contra di e Acuerdo di Helsinki y ta pone algun di nos den e Comision corda riba kimamento di buki cu a tuma luga den añanan di Nazi.”

Director Ehecutivo interino di e organisacion Vigilancia di Derechonan Humano Division di Europa y Asia Central, a skirbi: “Vigilancia di Derechonan Humano ta profundamente precupa pa e posibilidad cu lo bai tin mas violencia, en bista di e registro cu e gobierno di Georgia tin di no hiba dilanti corte personanan cu anteriormente a comete atake violento contra minorianan religioso. Nos ta urgi boso pa haci un yamada inmediato pa termina cu e atakenan y pa hiba dilanti husticia esnan responsabel pa nan.”

Mundu ta observando. Georgia lo cumpli cu su compromisonan internacional? Georgia su reputacion ta den wega.

[Plachi na pagina 23]

28 DI JUNI 2000 - Personanan malicioso a kima y destrui deposito di literatura di Testigonan di Yehova na Tbilisi

[Cuadro na pagina 23]

UN APELACION NA CORTE EUROPEO

Dia 29 di juni 2001, Testigonan di Yehova a entrega un peticion oficial na Corte Europeo di Derechonan Humano den cua nan ta reclama e forma continuo cu Georgia su instancianan hudicial ta keda sin tuma accion. Un par di dia despues, dia 2 di juli 2001, Corte Europeo a responde. E secretario di Corte a skirbi cu Presidente di Camara di Husticia tawata di opinion cu ‘mester duna e caso aki prioridad.’

[Plachi na pagina 23]

16 DI AUGUSTUS 2000 - Den sala di corte na Gldani Nadzaladevi, un simpatisante di Vasili Mkalavishvili a ataca Warren Shewveld, un Testigo Canades

[Plachi na pagina 24]

“Lo hiba tur acto di hostigamento y violencia fisico dilanti corte, y esnan culpabel di e actonan aki tin cu rindi cuenta na husticia.”—Presidente di Georgia, Eduard Shevardnadze, 2 di november 2000

[Comentario na pagina 24]

“Nos ta spera cu lo resolve e asunto aki [di violencia contra minorianan religioso], y cu tur grupo religioso na Georgia lo gosa di libertad completo di expresa nan creencianan religioso.”—David Soumbadze, alto consehero di e Embahada di Georgia na Washington, D.C., Merca, 3 di juli 2001

[Reconocemento pa Potret na pagina 24]

AP Photo/Shakh Aivazov