Hobennan Sa Puntra . . .

Con Mi Ta Haci Si Mi Topa un Mucha di Mi Scol?

“Bai scol dialuna tawata cruel. Si un amigo di mi a mira mi, mi tawata inventa henter un storia. Por ehempel mi tawata bisa mi amigonan cu mi tawata colecta cen pa un partido politico.”—James, Inglatera.

“Na scol, e muchanan cu a mira mi tawata tenta mi. Tawatin hopi presion riba mi.”—Débora, Brasil.

T A DICON e hobennan aki tawatin asina tanto miedo pa nan amigonan mira nan? Ta un cos ilegal nan tawata haci? Al contrario. Nan tawata haciendo e trabou di mas honorabel y importante na mundo awe. Nan tawata haciendo e trabou cu Hesus a manda nos haci ora el a bisa: “Pesei, bai y haci tur e nacionnan disipel di mi, . . . y siña nan pa cumpli cu tur loke mi a ordena boso.”—Mateo 28:19, 20.

Segun un encuesta Gallup na Merca, mas cu 90 porshento di hoben ta kere den Dios. Rond di mita di nan ta bai misa tur siman. Y maske hopi hoben ta den actividadnan patrocina door di iglesia, por ehempel canta den koor, poco di nan ta papia di Dios cu nan compañeronan di scol. Testigonan di Yehova si ta conoci rond mundo pa nan trabou di predica di cas pa cas. Miles di Testigo hoben ta participa den e trabou aki.

Si bo ta un hoben Testigo, sin duda abo tambe ta participa caba den e trabou aki. Pero esei no kiermen cu di mes bo ta hay’e facil. Kisas abo tambe ta precupa cu lo bo topa un compañero di scol na porta, mescos cu e hobennan cita na cuminsamento. Un hoben Britanico cu yama Jennie ta bisa francamente: “Un di e cosnan di mas piyo tawata pa un mucha di mi scol mira mi na saya, hopi mas nechi bisti cu na scol, y cu mi tas di buki den man.”

E miedo di topa un compañero di scol por ta asina fuerte cu algun hoben Cristian a recori na cierto trikinan. Un hoben cu yama Leon ta bisa: “Mi conoce un hoben Testigo cu ta bisti un jacket cu capuchon ora e ta den sirbishi, pa e por bah’e y tapa su cara cu ne si e topa un di su amigonan di scol.” Otro hobennan ta djis evita di predica den cierto barionan. Un hoben cu yama Simon ta conta: “Mi ta corda con mi tawata resa pidi pa nos no traha den un cierto caya, door cu mi tawata sa cu tawatin yen di mucha di mi scol ta biba eiden.”

Ta normal pa bo sinti bo un poco precupa pa topa un hende cu bo conoce den sirbishi. Pero si bo laga e miedo ei domina bo, ta perhudica so e por perhudica bo. Un hoben Aleman cu yama Alicia ta bisa: “Mi tawatin un actitud asina robes tocante predicacion, cu e tawatin un mal efecto riba mi spiritualidad.”

Pero pakico bo tin cu predica, asta si e ta algo asina dificil pa bo? Pa un contesta, laga nos mira dicon Dios ta pone e obligacion aki riba bo. Despues nos lo mustra con bo por vence bo temor, cu esfuerso y determinacion.

E Obligacion di Predica

Pa cuminsa, algo cu lo por yuda bo ta di mira cu comparti bo fe cu otronan no ta nada nobo ni straño. For di tempo di antiguedad hende cu ta teme Dios a haci esei. Noe, por ehempel, ta miho conoci como esun cu a traha e enorme arca. (Genesis 6:14-16) Pero 2 Pedro 2:5 ta bisa cu e tawata “un predicado di husticia” tambe. Noe a sintie obliga pa spierta otro hende tocante e destruccion cu tawata na caminda.—Mateo 24:37-39.

Mas despues, maske Dios no a manda e Hudiunan spesificamente pa nan predica na hende cu no ta Hudiu, hopi di nan a comparti nan fe cu otro hende. Asina un hende mohe stranhero cu yama Rut a haya sa tocante Yehova. Cu gratitud na su suegra Hudiu Noemi, Rut a bis’e: “Bo pueblo lo ta mi pueblo, y bo Dios, mi Dios.” (Rut 1:16) Despues Rei Salomon a mustra cu hopi hende cu no ta Hudiu lo bin tende di e “gran nomber” di Yehova y bin ador’e na su tempel.—1 Reinan 8:41, 42.

Awor, si e sirbidonan antiguo ei di Dios mes a papia cu otro hende maske nan no tawatin ningun ordo directo pa predica, cuanto mas nos cu ta Cristian lo no mester sinti nos obliga pa predica? No lubida cu nos a ricibi ordo pa predica “e evangelio aki di e reino.” (Mateo 24:14) Nos, mescos cu apostel Pablo, tin un obligacion di declara e bon nobo aki. (1 Corintionan 9:16) Asta nos salbacion ta den wega. Romanonan 10:9 y 10 ta bisa: “Si bo confesa cu bo boca Hesus como Señor, . . . lo bo ta salba; pasobra cu curason hende ta kere pa haya husticia, y cu boca e ta confesa pa haya salbacion.”

Unda bo por haci e confesion ei, of, manera Traduccion di Mundo Nobo ta traducie, “haci declaracion publico”? Predicacion informal tin su luga. Pero sirbishi di cas pa cas ta keda un di e maneranan di mas eficas pa alcansa hende. (Echonan 5:42; 20:20) Bo ta liber di e obligacion aki debi cu bo ta hoben? No. Na Salmo 148:12 y 13 Bijbel ta duna nos e mandamento aki: “Tanto yoncuman como birgen; anciano y mucha. Laga tur alaba e nomber di SEÑOR.”

E Reto di Predica na Bo Pareunan

Ta berdad cu por ta fastioso si ora bo ta den sirbishi bo topa un hende cu ta bai bo scol. Con cu bai bin, ta normal pa bo kier pa hende acepta bo. Ningun hende no gusta pa hende tenta nan ni zundra nan. Y manera un hoben cu yama Tanya a bisa: “Mucha di scol por ta hopi cruel!” Pesei, ta logico pa bo puntra bo mes con bo compañeronan di scol lo reacciona si nan mira bo nechi bisti y cu un Bijbel den bo man. Lamentablemente, no ta nada straño si nan ridiculisa bo. Un hoben di Brasil cu yama Felipe ta conta: “Tawatin un mucha homber den mi klas ta biba den e mesun edificio cu mi. E tawata bisa: ‘Mira bo ei cu bo Bijbel! Ta kico bo tin den e tas ei?’”

Bira victima di mofa no ta nada pret. Bijbel ta conta nos cu Isaac yiu di Abraham a wanta tentamento cruel na man di Ismael, su mita ruman. (Genesis 21:9) Apostel Pablo no a minimisa gravedad di e maltrato aki. Na Galationan 4:29 e apostel ta yam’e apropiadamente ‘persecucion.’

Hesus tambe a bisa di antemano cu tin hende cu lo trata su siguidonan malo. El a bisa: “Si mundo odia boso, sa anto cu el a odia ami prome cu boso. Si boso tawata di mundo, mundo lo a stima loke ta di dje; ma pasobra boso no ta di mundo, ma ami a scohe boso for di den mundo, pesei mundo ta odia boso.”—Huan 15:18, 19.

Pesei, como Cristian, bo mester ta prepara pa wanta persecucion den un of otro forma. (2 Timoteo 3:12) Asta si bo keda sin papia un solo palabra tocante Bijbel cu bo pareunan, toch algun di nan lo por persigui bo djis pasobra bo ta comporta bo segun normanan halto y bo no ta participa cu nan den mal conducta. (1 Pedro 4:4) Sinembargo, Hesus ta duna bo e palabranan di consuelo aki: “Bendiciona boso ta ora cu hende insulta boso y persigui boso, y ta gaña tur clase di maldad riba boso pa mi causa.” (Mateo 5:11) Con por ta cu tentamento ta un bendicion? Door cu bo sa cu bo ta haci Yehova su curason contento! (Proverbionan 27:11) Y si bo haci Yehova contento, bo ta riba caminda pa haya bida eterno como recompensa!—Lucas 10:25-28.

Menos mal cu no ta tur bo compañeronan di scol—y kisas ni sikiera e mayoria—lo trata bo malo si bo topa nan den sirbishi. Un hoben Britanico cu yama Angela ta corda nos esaki: “Ora bo topa un compañero di scol na un porta di cas, hopi bes nan tin mas miedo cu bo!” De echo, algun di nan por tin basta gana di sa ta kico bo tin di bisa. Di tur manera, hopi hoben Cristian ta disfruta di hopi exito dunando nan compañeronan di scol testimonio. Nos siguiente articulo den e serie aki lo mustra algun manera pa bo tambe hacie.

[Plachi na pagina 21]

Hopi hoben tin miedo di topa un compañero di scol den sirbishi

[Plachi na pagina 23]

Nunca laga tentamento pone bo sinti berguensa di bo fe