E Punto di Bista Biblico

Cristiannan Mester Spera Proteccion Dibino?

Hopi bes Bijbel ta referi na Dios su habilidad di proteha su adoradonan di daño. Rei David a bisa: “Rescata mi for di hende malbado, o SEÑOR; proteha mi contra hende violento.” (Salmo 140:1) Den nos dia hopi adorado di Dios cu a haya nan cu violencia, crimen, desaster natural a scapa na wowo di hangua. Tin hende ta puntra nan mes si ta Dios a proteha nan di un manera milagroso na e ocasionnan ei, specialmente door cu tin otro ocasionnan ora hende cu ta teme Dios no a scapa sino a pasa den tragedianan grandi, of asta a muri di un manera violento.

YEHOVA DIOS ta proteha algun hende for di daño y otronan no? Nos mester spera di scapa milagrosamente for di violencia y desaster awendia?

Proteccion Milagroso den Relatonan di Bijbel

Bijbel tin varios relato den cua Dios milagrosamente a interveni na fabor di su adoradonan. (Isaias 38:1-8; Echonan 12:1-11; 16:25, 26) Tambe e Scritura ta relata con na otro ocasionnan Yehova no a proteha su sirbidonan for di calamidad. (1 Reinan 21:1-16; Echonan 12:1, 2; Hebreonan 11:35-38) Esei ta mustra claramente anto cu Yehova por dicidi di provee proteccion pa un cierto motibo of proposito ki ora cu e scohe pa haci esei. Pues ora cristiannan individual no wordo libra di prueba, nan no mester conclui cu Dios a bandona nan. Nos tin cu acepta e realidad cu cosnan malo lo sosode, asta cu sirbidonan fiel di Yehova. Dicon esei ta e caso?

Dicon Cosnan Malo Ta Sosode cu Sirbidonan Fiel di Dios

Un motibo ta cu nos tur a hereda pica y imperfeccion di Adam cu Eva. Es decir nos por spera di haya nos cu dolo, sufrimento y morto. (Romanonan 5:12; 6:23) Un otro motibo ta, cu nos ta biba den e ultimo dianan. Bijbel ta describi cu hende di nos dia lo ta “sin amor, ireconsiliabel, cu mala lenga, sin dominio propio, grosero, odiado di loke ta bon.” (2 Timoteo 3:1-5) Prueba di esaki ta e cantidad di violacion, secuestro, asesinato y otro crimennan brutal cu ta tuma luga.

Hopi sirbido fiel di Dios ta biba y traha meimei di hende violento y tin bes esnan violento ta mik riba e sirbidonan fiel aki. Kisas nos por haya nos mes den un situacion den cua nos bida ta na peliger djis pasobra nos tawata na un cierto luga na un mal momento. Ademas, nos ta experencia e realidad cu Salomon a papia di dje ora el a bisa: “Tempo y suceso imprevisto ta cai riba nan tur.”—Eclesiastes 9:11, NW.

I tambe, apostel Pablo a bisa cu hende lo persigui cristiannan pasobra nan ta adora Dios. El a bisa: “Di berdad, tur hende cu ta desea di hiba un bida santo den Cristo Hesus lo wordo persigui.” (2 Timoteo 3:12) Den e ultimo añanan esaki a resulta di ta e caso den varios pais.

Pues, hende cu ta teme Dios no ta liber di e efectonan di violencia, crimen, desaster natural of morto accidental. Satanas a purba di uza e argumento cu Yehova ta pone un trankera rond di Su pueblo pa nada malo no pasa nan. (Job 1:9, 10) Esei no ta e caso. Sinembargo, nos por ta sigur cu Yehova ta proteha su pueblo asta ora E no salba nan di un manera milagroso di un situacion.

E Manera Cu Yehova Ta Proteha Su Pueblo Awendia

Mediante su Palabra, Yehova ta provee guia dibino cu ta proteha su pueblo. Spiritualidad y conocemento di Bijbel por duna nos sano huicio, cu na su turno lo por yuda nos tuma decisionnan sabi y evita di comete erornan innecesario. (Salmo 38:4; Proverbionan 3:21; 22:3) Por ehempel, cristiannan a evita hopi calamidad door cu nan a sigui Bijbel su conseho encuanto moralidad sexual, golosidad, rabia y violencia. Tambe, door cu nos no tin amistad intimo cu mal hende, ta menos probabel cu nos lo ta caminda calamidad lo por tuma luga, esta na un cierto luga na un mal momento. (Salmo 26:4, 5; Proverbionan 4:14) Esnan cu ta aplica principio biblico ta biba miho, loke hopi bes ta resulta den un miho salu mental y fisico.

Ta un gran consuelo pa sa cu maske Dios ta permiti cos malo sosode, lo e duna su adoradonan e forsa cu nan tin mester pa nan por soport’e. Apostel Pablo ta duna nos e siguransa: “Dios ta fiel, kende lo no permiti pa boso wordo tenta mas cu boso por soporta, ma hunto cu e tentacion e lo provee salida tambe, pa boso por soporta.” (1 Corintionan 10:13) Tambe Bijbel ta priminti “poder mas aya di loke ta normal” pa yuda nos wanta calamidad.—2 Corintionan 4:7, NW.

Dios Ta Actua Segun Su Propio Boluntad

Cristiannan mester spera cu Dios lo rescata nan milagrosamente di tur desaster cu tuma luga? Bijbel no ta apoya e pensamento ei.

Claro cu Yehova Dios por dicidi di interveni directamente na fabor di cualkier sirbido di dje. Y si un hende ta kere cu el a scapa di daño pa motibo di intervencion dibino, ningun hende no mester critic’e. Pero ora Yehova dicidi pa no interveni, esaki no mester wordo interpreta como un indicacion di su desaprobacion.

Nos por tin e confiansa cu maske ki prueba of situacion nos enfrenta, Yehova lo duna su sirbidonan fiel proteccion dibino. E ta haci esei door di elimina e situacion, of door di duna nos e forsa pa nos wanta. Anto si nos muri, door di resucita nos pa biba pa semper den su mundo nobo.—Salmo 37:10, 11, 29; Huan 5:28, 29.