Scucha y Siña

“NOS a siña 85 porshento di loke nos sa door di scucha”, segun un informe den e corant Toronto Star. Maske nos ta pasa gran parti di nos tempo scuchando, nos atencion ta kita, nos ta ocupa cu otro cos, of nos ta lubida 75 porshento di loke nos a tende. E cifranan interesante aki ta enfatisa con importante ta pa nos desaroya nos habilidad di scucha.

Segun e informe, “mal custumber di scucha ta e raiz di hopi problema den comunidad.” Rebecca Shafir, experto den comunicacion y specialista den enfermedad di abla, ta kere cu hopi bes suicidio, violencia na scol, famia kibra y uzo di droga tin di aber cu mal custumber di scucha.

Sociologonan ta bisa cu hende tin diferente estilo di scucha. Tin hende cu ta gusta tende tocante hende y nan ta interesa den delaster un detaye di un storia, mientras cu otronan ta interesa den e suceso y kier mas bien pa esun na palabra yega na e punto principal pa caba. “Pues, ora dos hende cu e dos estilonan di comunica distinto ei ta combersa, por sosode cu nan no ta comunica manera mester ta”, segun Toronto Star.

Hesus tawatin bon motibo pa enfatisa cu nos mester ‘pone bon atencion con nos ta scucha.’ (Lucas 8:18) Scucha cu atencion ta un señal di bon manera. E ta un parti esencial di un bon combersacion. Algun sugerencia practico pa nos por scucha miho durante un combersacion ta di ignora cos cu ta kita bo atencion, len un tiki dilanti, y participa den e combersacion door di wak e persona den su cara y move bo cabes. Ya cu loke nos ta siña ta depende hopi di con nos ta scucha, nos tur mester sigui purba mehora e manera cu nos ta presta atencion.