Pas Mundial No Ta Djis un Soño!
SI Alfred Nobel por a wak bek riba siglo 20, lo el a sintie optimista cu e perspectivanan pa pas? Un cos ta sigur, lo el a keda contento pa sa cu hopi hende a haci esfuerso sincero pa caba cu guera. Sinembargo, lo e tawatin cu confronta un realidad amargo. Profesor Hugh Thomas ta resumie bon: “Aunke en general siglo 20 tawata conoci pa mehoransanan social y mayor interes gubernamental pa e bida di hende pober, su rasgonan mas prominente tawata mitrayado, tanki di guera, [e avion di tira bom] B-52, e bom nuclear y por ultimo, e misil. Su rasgo mas destaca tawata gueranan mas sangriento y destructivo cu di cualkier otro era.” Thomas ta agrega cu “pesei, ta un asunto di opinion personal si di berdad nos por caracterisa e era aki como progresivo of no.”
E perspectivanan pa pas mundial ta mas miho awor cu nos a drenta siglo 21? Ningun tiki! Referiendo na e atakenan terorista cu a tuma luga dia 11 di september 2001 na New York City y na Washington, D.C., e revista Newsweek a declara: “Den un mundo caminda hende por comberti [Boeingnan] 767 den misilnan dirigi, nada no ta parce imposibel ni absurdo—of piyo ainda, inevitabel.”
Tin hende ta bisa cu pa pas mundial bira un realidad, dos cos tin cu tuma luga: Na prome luga, mester bini cambionan radical den hende su punto di bista y comportacion; na di dos luga, tur nacion tin cu uni bou di un solo gobierno. Bijbel ta predeci cu un dia lo logra pas, pero no mediante esfuerso humano. Salmo 46:9 ta bisa di e Creador, Yehova Dios: “E ta haci gueranan stop te na e fin di tera.” Con Dios lo logra esaki? Mediante su Reino, pa cua hopi hende sincero a resa pidi bes tras bes. E Reino ei no ta un condicion di curason cu ta dificil pa hende defini, sino mas bien un berdadero gobierno mediante cua Dios lo establece pas riba henter e tera. E profeta inspira Isaias a predeci cu ciudadanonan di e gobierno ei ‘nunca mas lo train pa guera.’ (Isaias 2:4) Mediante un programa di educacion mundial, hende lo siña biba na pas y asina “bati nan spadanan traha ploeg cu nan, y nan lo bati nan lansanan traha sker pa snui cu nan.”
Testigonan di Yehova ta haciendo esaki caba. Nan ta nenga di uza arma contra nan prohimo, aunke nan ta pertenece na hopi diferente grupo etnico y ta biba den mas cu 200 pais. Nan posicion neutral meimei di un mundo asota pa guera ta duna prueba cu pas no ta un soño idealista sino un posibilidad realistico.
Lo bo kier sa mas tocante e speransa aki cu Bijbel ta ofrece pa berdadero pas? Sea asina bon di skirbi e publicadonan di e revista aki, uzando e adres mas cerca di bo cu tin menciona na pagina 5, of tuma contacto cu Testigonan di Yehova den bo area.