Un Bebida Refrescante di un Mata Exotico

DI E CORESPONSAL DI SPIERTA! NA NIGER

BO TA gusta un cos di bebe friu riba un dia cayente? Hopi famia di West Africa ta disfruta di un cos di bebe refrescante cu tin colo bibo y ta dushi, saludabel y barata. Nan ta yam’e bissap, y ta trah’e di e mata roselle, un tipo di cayena tropical. E mata aki por crece bira 2 meter halto of mas. E ta crece den varios parti di mundo, pero specialmente den e climanan mas seco di paisnan manera Niger, Mali y Senegal.

Con Ta Prepara Bissap

Bo ta pone un cuchara di e kelkinan di e flor den mas o menos un liter di awa. Laga e mescla herbe y despues ta pon’e trek entre 15 pa 20 minuut. Caba ta cola e kelkinan, y por bebe e te sea cayente of friu, cu of sin sucu. Awe nos kier prepara un cos di bebe friu cu e muchanan lo gusta, pesei nos ta pone sucu aden. Tin famia ta prepar’e agregando sabor di menta of di vanilia. Nos ta basha e bissap friu y colo cora bibo den saconan di plestik chikito transparente y ta mara nan na conopi. Awor e ta cla pa parti pa e muchanan ansioso! Contento nan ta habri un huki di e saco y ta gosa di nan cos di bebe preferi. Claro cu algun ta prefera di beb’e den glas.

Nan ta bisa cu bissap no ta smak dushi so, sino ta bon pa bo salu tambe. E tin calcio, fosfor, hero, vitamina A y C, y mas! Tin hende ta bisa cu tambe bissap ta habri bariga na un manera suave y ta pone bo orina y cu e ta un stimulante pa higra. En todo caso, nos ta masha contento cu aparte di ta bunita pa bista, e mata aki ta duna nos un cos di bebe saludabel y refrescante!

[Reconocemento pa Potret na pagina 31]

Potret di Kazuo Yamasaki