‘Cuida Yiu Estilo Cangaru’ e Solucion pa Salba Baby?
Tawata na un hospital den Bogotá, Colombia, na 1979. Como cu masha poco baby cu nace prematuro tawata keda na bida, un docter Colombiano a bini cu un solucion diferente: ‘cuida yiu estilo cangaru.’
No ta facil pa docternan tene baby prematuro na bida. Hopi bes nan ta pone baby cu nace bou di peso den e ambiente cayente di un couveuse, caminda nan ta keda te ora nan peso subi. Sinembargo den paisnan den desaroyo, hospitalnan demasiado yen, situacionnan a-higienico y scarsedad di personal y ekipo medico hopi bes ta pone e babynan haya infeccion peligroso.
Un docter na Colombia a bini cu un metodo cu ta parce di alivia e problema aki. Con e ta funciona? Ora un baby nace prematuro, nan ta cuid’e manera custumber te ora cu su condicion stabilisa. Mientras tanto ta siña e mama con pa cuida e yiu. Ora e baby su salu drecha un poco, e mama ta bira un couveuse bibo. Con? Door di tene e baby pega na su curpa, mara verticalmente entre su pechonan. Safe den su saco estilo cangaru, e baby ta keda cayente, y e por bebe lechi di su mama facilmente. Pesei nan ta yama e metodo aki ‘cuida yiu estilo cangaru.’
No tin mester di ekipo caro. E mama ta bisti un blusa apropiado of shimis normal cu banchi na sintura. Ora e baby tin suficiente peso, mama cu baby por bai cas, y ta djis bin controla na hospital regularmente.
Investigacion preliminar ta indica cu e estilo di cuida yiu manera cangaru ta efectivo y safe. Ademas, e ta parce di promove un laso mas intimo entre baby y mama. Pesei nada straño cu varios pais a adapta e metodo aki pa nan uz’e. Na Mexico, nan ta siña miembronan di famia pa bira “tata cangaru”, “wela cangaru”, y asta “ruman mohe cangaru”, pa nan por duna un man ora e mama tin mester di un periodo di sosiego bon mereci. Dra. Guadalupe Santos, kende ta maneha un programa di cuida yiu estilo cangaru na Mexico, a bisa Spierta!: “Nos ta uzando e metodo aki for di 1992 y a mira cu e ta hopi efectivo. Nos tin mester di menos couveuse y tambe hopi menos tempo di estadia den hospital.”