‘Un Monumento Dedica na Nada Menos cu Diabel’

DI E CORESPONSAL DI SPIERTA! NA SPAÑA

DEN e stad di Madrid, Spaña, tin un estatua extraordinario. Su aparencia y su titulo—El Ángel Caído—kisas no ta sorprende un hende cu wak e aribariba. Sinembargo, un examinacion ta revela cu e ta un monumento dedica na honor di nada menos cu Satanas e Diabel!

Hende cu bishita Spaña, un pais tradicionalmente catolico, ta spera di mira estatua di angel of “santo”, pero no uno dedica na e gobernante di e demoñonan. No obstante, Ricardo Bellver, un escultor Spaño cu a biba den siglo 19, a dicidi di kibra cu tradicion. E tawata conoce e poema largo di John Milton titula Paradijs Perdi, cu a describi con Satanas a ser saca for di shelo debi na su orguyo y rebelion. Na 1874, Bellver a completa un estatua cu a representa e caida dramatico aki.

Bellver no a presenta Diabel paresido na un bestia cu cacho, di acuerdo cu e representacionnan tradicional di Satanas. Al contrario, el a imagina cu e gobernante di e demoñonan tawata un angel bunita pero corupto na momento cu el a ser tira abou for di shelo. (Revelacion 12:9) Y esaki ta mas na harmonia cu loke Bijbel mes ta bisa.a

Kico e hendenan di Madrid a pensa di un estatua asina? Segun un historiado di arte, algun di nan a keda geshock pa e idea di traha un estatua dedica na Satanas. Sinembargo, gobierno Spaño a financia e estatua, y esaki a gana dos premio pa merito artistico, uno na Madrid y e otro den e Exhibicion Internacional di Paris na 1878. Arte a triunfa riba tradicion, y pa 1879 nan a pone e estatua di brons impresionante den parke Retiro.

Den nos sosiedad actual cu no ta religioso, e estatua aki dedica na Satanas no ta molestia masha hende. Maria Isabel Gea ta declara den su obra Curiosidades y Anécdotas de Madrid: “E stad di Madrid mester sinti su mes orguyoso di ta e unico stad na mundo cu a dedica un monumento nada menos cu na Diabel.” Aunke esaki por ta asina, poco di e miles di hendenan cu ta pasa door di parke Retiro tur diadomingo, ta paga tino na e estatua.

Asina tambe, poco hende awe ta realisa cu Satanas ta e fuente invisibel di hopi problema na mundo. (Revelacion 12:12) Pero en bista di e manera bon cla cu e Scritura ta papia di dje, hende cu ta studia Bijbel no ta duda di su existencia ni di su influencia. Hesus a resisti Satanas su tentacionnan tribi. Tambe el a describi e criatura spiritual malbado aki como “un gañado y e tata di mentira”, y como ‘un matado cu no a para den e berdad.’—Huan 8:44; Mateo 4:1-11.

Awe cu mundo ta sufriendo mas calamidad cu nunca, ta masha importante pa resisti e influencia di e angel frustra aki cu a ser tira abou.b (Santiago 4:7) Mientras tanto, amantenan di e berdad y husticia por haya un consuelo sabiendo cu e echo cu a saca Satanas for di shelo ta un preludio di su derota inminente ora cu Cristo “destrui e obranan di Diabel.”—1 Huan 3:8.

[Nota]