Teenagernan Yen di Soño Ta un Asunto pa Precupa?

DI E CORESPONSAL DI SPIERTA! NA CANADA

SI UN hende perde soño, esei ta reduci su habilidad mental y di corda cos, y studiantenan adolecente tin mas chens di wordo afecta, e corant Globe and Mail di Canada ta bisa. “Ora mucha y adolecente perde soño, esei por pone cu nan tin problema cu comportacion, ta bira irita lihe of bira hyperactief.” Cientificonan a studia e rutina di drumi di alrededor di 2.200 alumno di scol secundario y a descubri cu mas o menos 47 porshento tawata drumi menos cu e ocho ora cu ta wordo recomenda pa cada anochi.

Maske hopi bes ta e estilo di bida di hobennan ta pone nan perde soño, “tin di nan kisas ta sufri di un problema medico cu no a ser diagnostica”, e corant Globe ta bisa. “Apnea ta afecta alrededor di 4 porshento di mucha, entre e edad di 4 pa 18 aña.” Esaki ta ora cu durante soño, e canal respiratorio cu ta pasa parti patras den e garganta ta sera parcialmente of completamente, y di e forma ei ta stroba oxigeno di pasa. Pues e celebro no ta relaha completamente, y e mucha ta lanta cansa y cu mal beis.

Algun señal cu por ta indicacion cu e mucha tin apnea por inclui roncamento of dificultad pa hala rosea durante soño, dolo di cabes frecuente parti mainta, y problema pa corda cos y concentra, y tambe hopi soño durante dia. Mayornan ta wordo anima pa de bes en cuando scucha kico nan yiunan ta haci ora nan ta profundamente na soño. Dr. Robert Brouillette, un docter di mucha specialisa riba problema cu soño (na e Hospital di Mucha di Montreal), ta bisa cu un mucha cu tin apnea lo por stop di hala rosea mientras e ta drumi, maske su pecho ta move. “E pausa lo caba ora e mucha spierta of medio lanta [y] hala rosea grandi un par di bes prome cu e bai soño atrobe.” Tur anochi e cos aki por ripiti cientos di bes y pone cu un mucha ta sinti su mes agota ora e lanta for di soño.

E Asociacion Mericano di Trastorno di Soño ta recomenda un camber fresco, scur y caminda no tin distraicion, manera television of computer. Un otro cos cu por yuda mucha y teenager drumi bon anochi ta si nan ta bai drumi y lanta na cierto ora fiho. Tin hende cu tin apnea ta drumi cu un aparato pa hala rosea, cu suavemente y constantemente ta manda aire door di nanishi y boca pa mantene canal den e garganta habri durante anochi. Un docter di mucha a bisa: “Drumimento ta mas importante cu e cuminda cu nos ta come. E ta mas importante cu haci ehercicio. Drumimento ta regula nos hormonnan, nos emocionnan y nos sistema di inmunidad.”