Hobennan Sa Puntra . . .

Mi Mester Haci Operacion Cosmetico?

“Prome cu mi a opera mi nanishi, mi a sufri hopi na man di hende cu tawata tenta mi. Mi no tawata kier un nanishi unico, pero hewon uno cu a pas cu mi. Mi ta masha felis cu e resultado di e operacion, y si ta necesario lo mi bolbe hacie.”—Eleni.a

“Dicon mi mester somete mi na ideanan standarisa di loke ta bon tipo? Si mi opera pa cambia partinan di mi curpa, lo mi sinti mi manera placa falso. Lo mi no ta mi mes.”—Mathias.

“Cada hende mester dicidi pa su mes. Ta masha dificil pa un otro hende husga esei.”—Manuela.

“KEN cu ta mas bunita cu mi, mester a uza make-up.” Na Alemania, pa hopi tempo hende cu ta precupa cu nan aparencia no ta perfecto a uza e dicho humoristico ei pa defende nan mes. Pero awendia den algun pais, lo mester cambia e dicho ei pa: “Ken cu ta mas bunita cu mi, mester a haci operacion.” Si, operacion cosmetico a bira algo comun y coriente.

E corant Suiso Neue Zürcher Zeitung ta informa: “E tempo cu ta hende rico so tawata haci operacion cosmetico a pasa pa historia.” Anto e corant a agrega: “Tin dos tendencia cu a lanta cabes: Mas y mas hende homber ta busca yudansa di ciruhanonan cosmetico . . . , y e clientenan femenino ta mas jong cu nunca.” Segun un encuesta na Alemania, casi 20 porshento di e personanan di entre 14 pa 29 aña di edad cu nan a entrevista, sea a haci operacion cosmetico caba, tin pensa di haci esei of por lo menos a pensa riba esei.b Podise algun di bo amigonan, compañeronan di scol of miembronan di famia a opera pa drecha nan aparencia.

Ke tal di abo? Bo a yega di pensa pa opera pa drecha bo aparencia? Bo ta sinti cu bo horeanan ta mucho para, cu bo pechonan ta mucho grandi of mucho chikito, cu bo bariga ta grandi of bo belnan ta mucho diki, of cu bo nanishi ta mahos? Si ta asina, bo no ta e unico persona cu ta sinti asina. Un grupo di mucha mohe di scol secundario a skirbi un articulo den un corant Aleman bisando: “Casi no tin un mucha di nos edad cu no a pasa door di periodonan di ta malcontento cu su curpa.” Ta normal cu bo kier pa hende haya bo atractivo y pa nan gusta bo. Pero ta opera ta e solucion?

Operacion Cosmetico Ta e Solucion pa Bo Problemanan?

Wak e hobennan cu bo conoce. Lo straña bo si bo haya sa cu hopi di nan—podise asta algun cu abo ta haya nechi—ta infelis cu nan aparencia? Pero muy probablemente ta asina ta. Awor, e pregunta ta: Bo ta kere cu nan tur mester opera pa drecha nan aparencia? Of bo ta pensa cu lo ta miho pa mayoria di nan si nan siña keda contento cu e aspectonan deseabel di nan aparencia? E mesun principio lo por ta aplica den bo caso?

Manera e comentario di Eleni ta mustra, den algun caso operacion cosmetico por pone cu hende ta stop di tenta bo of molestia bo. Di otro banda, operacion cosmetico no ta un cura lo todo y sigur e no ta remplasa un estilo di bida saludabel. Un bida sano lo beneficia un persona su aparencia personal masha hopi. Y aunke un ciruhano lo por cambia bo aparencia, e no por cambia bo personalidad, ni e no por kita bo precupacionnan ni tampoco duna bo mas respet propio.

Corda tambe cu algun clinica of docter ta priminti cosnan cu nan no por cumpli cu ne. Eigenlijk, ta parce manera cos cu nan ta priminti bo felicidad. Pero en realidad, kisas nan ta mas interesa den bo placa cu den bo felicidad. Lamentablemente, tin un par di ciruhano sin escrupulo cu lo ta cla pa haci un operacion innecesario, cu tin masha tiki chens di exito of cu ta peligroso, basta tin un hende cu kier paga e cuenta.

Tambe bo mester considera e consecuencianan riba termino largo. Por ehempel, loke bo ta haya masha mahos ora bo tin 16 aña lo por parce completamente diferente ora bo tin 21 aña. Segun Dr. Urs Bösch, un ciruhano estetico: “Como regla general, no mester haci operacion cosmetico pa teenagernan. Ta durante e temporada ei e forma di curpa di un teenager y su nocion di su mes curpa ta cambia.” Ademas, tin hopi chens cu despues hobennan tin mester di mas operacion pa drecha cierto problemanan. Y segun cu bo curpa ta crece, e cicatrisnan di un operacion kisas tambe ta crece.

Calcula e Gasto

Bijbel ta conseha nos pa calcula e gasto prome cu nos cuminsa un proyecto importante. (Lucas 14:28) Pa mayoria hoben, operacion cosmetico no ta posibel mes pasobra e ta costa mucho placa. Y e prijs kisas no ta inclui consultanan despues di operacion ni e operacionnan cu lo tin mester pa drecha cierto problemanan.

Tin hopi hende cu a paga pa operacion no solamente cu placa, sino tambe cu nan salu. Segun e Sosiedad Mericano di Operacion Plastico Estetico, e riesgonan di salu ta entre otro hinchamento temporal, cicatrisnan permanente, perde heful y e habilidad di duna yiu lechi na pecho, y asta perdemento di hopi sanger. Anna, por ehempel, casi a muri ora el a laga chupa vet (liposuction). El a keha: “Awor mi tin cicatris horibel y un hol den mi bariga.” Relaciona cu liposuction, un corant Aleman a bisa: “Informenan di complicacion serio, asta morto, ta aumentando.” No lubida: “Operacion ta keda operacion, hunto cu tur su riesgonan”, segun e boletin Apotheken Umschau. Pesei, evalua e riesgonan cuidadosamente prome cu bo dicidi di haci cualkier operacion, specialmente un operacion cu no ta medicamente necesario.

Tambe lo bo por puntra bo mes: ‘Ki sorto di impresion lo mi duna hende? Cu aparencia fisico ta mi prome prioridad? Con mi decision lo influencia hobennan di mi pareu of mi rumannan mas jong?’c

Bo Motibonan

Ta bon pa bo analisa seriamente pakico bo kier opera. Kisas no ta facil pa saca afo bon cla kico ta bo motibonan. Por ehempel, lo bo por puntra bo mes: ‘Mi kier pa hende stop di tenta mi constantemente pa un caracteristica mahos? Of ta pasobra mi kier ta orguyoso di mi aparencia? Mi deseo pa cambia mi aparencia ta bini door di presion di mi pareunan, propagandanan combencente of door di un artista popular di farandula? Mi ta purba alcansa e ideal extremo di beyesa cu medionan di comunicacion ta promove sin fin awendia?’

Tin hende ta kere cu door di drecha nan aparencia nan por tin mas chens di haya un casa of un bon trabou. Pero sea franco, ta tur hende casa cu bo conoce ta bunita? Kico di e aparencia di tur hende cu bo conoce cu tin un trabou? No, e cosnan ei no ta depende completamente di un persona su aparencia personal. Ademas, un posibel casa of doño di trabou cu ta pone mas enfasis riba bo aparencia cu riba bo cualidadnan interior realmente ta bal e gasto y e riesgo di un operacion?

Segun cu bo ta analisa bo motibonan cuidadosamente, papia cu bo mayornan of cu un amigo madura di loke bo ta pensa. Si bo ta pensa cu un parti di bo curpa realmente ta un problema, puntra nan kico nan ta opina honestamente. No djis bai tras di loke bo ta mira den spiel. Relaciona cu e manera cu nos ta mira nos propio faltanan fisico, Nana a bisa: “Abo mes ta precupa mas cu bo faltanan fisico cu otro hende, pasobra simplemente bo ta mira bo mes for di un otro punto di bista.” Investigadonan na Universidad Landau na Alemania a splica cu den hopi caso hende ta pensa pa haci operacion cosmetico, “no pasobra un parti di e curpa ta realmente desfigura, sino mas bien pasobra e ta parce desfigura den bista di e persona conserni.”

No tuma un decision pura, sino evalua tur factor cuidadosamente. Mira tur operacion como algo cu bo no por cambia bek despues. Di tur manera, lo bo tin cu biba cu e resultadonan di e operacion pa un tempo.

Bo Beyesa di Mas Importante

Felicidad no ta bini di bo aparencia. Aunke aparencia por sea mehora of stroba respet propio, loke realmente ta conta ta bo personalidad y actitud. Despues cu Anna su bida tawata na peliger door di e operacion, el a conclui: “Mi a siña cu ser bunita no tin nada di haci cu bo aparencia exterior.”

Aunke Bijbel ta papia faborabel di beyesa fisico, e ta mustra cu esei ta di segundo importancia compara cu bunitesa spiritual: “Ser atractivo ta engañoso y bunitesa ta banidad, ma un mohe cu ta teme SEÑOR, esei lo wordo elogia.” (Proverbionan 31:30; 1 Samuel 16:7) Si bo cultiva e punto di bista aki, lo bo por haya pas mental maske cu bo tin parti di bo curpa cu bo no ta gusta.

Sin importa kico bo dicidi, corda cu aparencia perfecto y felicidad perfecto simplemente no ta alcansabel aworaki. Tur hende ta imperfecto den un manera of otro. (Romanonan 3:23) Bo no por cambia esei. Loke si bo por cambia ta e persona cu bo ta di paden, loke Bijbel ta yama “e persona scondi di e curason.” (1 Pedro 3:3, 4) Rafina e persona cu bo ta door di cultiva cualidadnan cu ta bunita den bista di Dios. Esei no tin ningun riesgo ni gasto financiero, y e recompensanan ta masha grandi!

[Nota]

[Comentario na pagina 19]

E “problema” na bo curpa ta realmente un problema, of bo tin cu cambia e manera cu bo ta mira bo mes?