Ora Merdia Bira Scur
DI E CORESPONSAL DI SPIERTA! NA ANGOLA Y ZAMBIA
‘MERDIA scur? Imposibel!’ kisas tin hende ta bisa. Esei no solamente ta posibel sino cu e ta sosode varios biaha durante cada decada: ki ora cu tin un eclipse solar total. Kico ta causa un eclipse solar, y dicon esei ta un bista asina espectacular? Pa un contesta, laga nos cuminsa cu luna.
Bo sa con luna ta cambia di aparencia segun cu e ta drei rond di tera? Ora luna cu solo ta na e dos bandanan opuesto di mundo, nos ta mira loke nos ta yama luna yen sali na oost segun cu solo ta baha na west. Segun cu dianan ta pasa, luna ta sali cada anochi mas laat, crusando shelo pocopoco den e direccion di solo cu ta sali. E parti cla di luna gradualmente ta bira mas chikito, y cu tempo bo ta mira djis un media luna. Ora luna ta den shelo henter dia hunto cu solo, asta e media luna ta disparce y e luna, cu su parti scur cara pa tera ta casi invisibel. Esaki nan ta yama luna nobo. Caba e proceso ta bolter, y luna gradualmente ta hala for di solo y finalmente ta bolbe bira luna yen. E ciclo aki ta ripiti su mes aproximadamente cada 28 dia.
E factor decisivo pa eclipse solar ta luna nobo. Normalmente e ta djis pasa dilanti di solo den dia sin cu nos ta ripara, pasobra nan orbita no ta riba mesun plano. Pero de bes en cuando, solo, luna y tera ta precis riba e mesun liña. E ora ei e sombra di luna ta cai riba tera y ta causa un eclipse.
Eclipsenan solar ta resultado di un relacion unico entre solo, luna y tera. Solo tin un tamaño inmensamente grandi; su diameter ta mas o menos 400 biaha mas grandi cu di luna. Pero remarcablemente solo ta mas o menos 400 biaha mas leu for di nos cu luna. Como resultado di esei, pa nos riba tera, solo cu luna ta parce di ta casi mes grandi. Pues, tin biaha por parce cu luna ta tapa solo.
Pa por tin un eclipse solar total, solo, luna y tera no solamente mester ta precis riba e mesun liña sino tambe nan mester haci esei ora luna ta na e parti di su orbita cu ta mas serca di tera.a Na ocasionnan asina, e punta di luna su sombra, forma di cone, ta produci scuridad riba un area smal di e superficie di tera.
Den caso di e eclipse total di 21 di juni 2001, e sombra tawata te cu 200 kilometer hancho. E ruta di e scuridad lo a cuminsa ora solo sali na e costa oost di Sur America y a pasa over di Oceano Sur Atlantico, caminda lo el a alcansa su duracion maximo di cinco minuut. Despues di pasa over di Angola, Zambia, Zimbabwe y Mozambique, lo el a termina ora solo baha na costa oost di Madagascar. Laga nos wak ki impresion observadonan na Angola y Zambia tawatin di e espectaculo celestial aki.
Preparacionnan pa e Suseso
Yen di expectativa, investigadonan profesional, astronomonan amateur y hopi otro hende mas a basha bai Africa pa e prome eclipse total di e milenio nobo. Como cu Lusaka, Zambia, tawata e unico capital riba ruta di e eclipse, hopi bishitante a bai einan pa observa e suseso.
Esaki kisas tawata e atraccion turistico mas grandi cu hamas Zambia tawatin. Djis un par di dia prome cu e eclipse, Lusaka a yena cu miles di bishitante. Lunanan di antemano hende a haci preparativo pa e suseso. Hotelnan, pensionnan, sitionan pa kampeer y casnan priva tawata yen gebuk, acomodando e cantidad di bishitantenan.
Sitionan pa observacion publico tawata entre otro e aeropuerto di Lusaka, caminda bishitantenan por a yega mainta, wak e eclipse y despues bai bek anochi. Simannan largo television cu radio a anuncia e espectaculo benidero, spiertando bes tras bes pa e peliger di wak stret den solo. Benta di brilnan special pa wak solo a surpasa tur expectativa, y hopi tienda a bende tur loke nan tawatin na stock.
Sinembargo, e prome caminda cu e eclipse lo a yega e continente Africano tawata na Sumbe, un stad canto di costa na Angola. Einan observadonan lo por a mira un eclipse total di cuater minuut y mei, e duracion mas largo visibel riba tera seco.
Lunanan prome cu e eclipse, nan a pone na e capital di Angola, Luanda, y na otro stadnan principal, borchinan grandi canto di caminda cu ta anuncia e eclipse y ta spierta hende pa su peligernan. E sombra di luna lo a pasa meimei di e pais, di manera cu henter Angola lo a mira por lo menos un eclipse parcial pero casi total. Luanda lo a mira 96 porshento di solo tapa. Gobierno, den cooperacion cu companianan priva, a haci areglo pa importa y parti miyones di bril special pa wak solo. Nan a duna hopi bril gratis na hende pober.
E centro di Angola su actividadnan di eclipse tawata Sumbe, situa na un bunita area plat canto di costa, entre Oceano Sur Atlantico y e plateau central di Angola. E area di Sumbe a keda liber di e piyo conflictonan cu a destrosa Angola, di manera cu bishitantenan a topa un stad intacto di aproximadamente 25.000 habitante, kendenan ta hende amigabel, cordial y spontaneo. Pa acomoda tur e bishitantenan, nan a prepara mas facilidad pa hospeda turista y a drecha e planta di coriente local. Tambe nan a organisa un workshop special tocante eclipse pa cientificonan, ministernan di gobierno y trahadonan humanitario di Angola y otro paisnan. Nan a lanta un plataforma grandi canto di lama pa tene un show na un escala nunca bisto na Sumbe.
E Dia Grandi Ta Yega
Un di e beneficionan di observa e eclipse na Angola tawata cu na juni weer ta hopi seco. Pero imagina bo e consternacion cu a reina ora cu un dia prome cu e eclipse, shelo a lanta tur nubla den e area di Sumbe! Henter anochi te cu e siguiente mainta, e stad tawata tapa bou di un clechi diki di nubia. Hende lo a keda cu gana di wak e eclipse? Den transcurso di mainta e nubianan a cuminsa hala kita, y na final di mainta shelo tawata blou y sin un nubia. Esta un alivio! Na Zambia tambe tur hende tawata precupa ora cu mainta a habri cu un shelo shinishi, tur nubla. Pero einan tambe shelo a claria net na tempo. Scucha e relato di hendenan cu a para mira e suseso tuma luga.
Angola: “Nos a scohe pa observa e eclipse for di un punta halto cu tin bista riba lama. Segun cu e ora tawata yega, multitud di hende a reuni canto di lama y na e sitionan di observacion cu nan a prepara pa wak e suseso. Banda di 12 or di merdia, ora cu e eclipse tawata a punto di cuminsa, hopi hende a bisti nan bril protectivo y cuminsa wak si nan ta mira con luna ta bai tapa solo. Djis despues di 12 or e eclipse a cuminsa. Cu verrekijker of un telescop, bo por a mira varios mancha preto riba superficie di solo. Observadonan a mira con sombra tawata tapa e manchanan aki un pa un. Segun cu e eclipse a progresa, bo por a sinti con e temperatura ta baha y claridad a cuminsa haya un colo straño. Finalmente, segun cu e sombra di luna a tapa e ultimo pida di solo, a bira scur manera anochi.”
Zambia: “E oficina di sucursal di Testigonan di Yehova na Zambia, situa na Makeni, Lusaka, tawata na un luga ideal pa wak e eclipse total di solo. Ora tawatin 3:07 di atardi, luna a cuminsa tapa solo. Strepinan di sombra a pasa riba muraya di edificionan, y nan tawata move manera ola di lama. Biento a baha, y parhanan a stop di canta. Bestianan di mondi a cuminsa prepara pa bai drumi anochi. Ora tawatin 3:09, un par di seconde prome cu e eclipse total, bo por a mira solamente un par di punta ta lombra di solo, manera un cadena di perla, despues un punta so. Nan ta yama e fenomeno aki ‘perlanan di Baily’, y esun punta so, renchi di djamanta.b Despues di esei bo ta haya un bista di e esfera di colo di solo, un flash cora ros, anto e eclipse ta total y ta bira scur!”
Angola: “E efecto impresionante di e renchi di djamanta a causa un gran reaccion serca e publico. Anto, 1:48 p.m. ora local, e eclipse total a cuminsa. E reaccionnan tawata hopi varia. Tin hende tawata druk ta saca potret. Otronan tawata grita den coro: ‘Total! Total! Total!’ Tambe tawatin hende cu a cuminsa fluit y grita di asombro ora cu merdia a bira scur manera anochi. Solo su atmosfer tin un temperatura di miyones di grado Celsius, y bo por a mira loke a parce manera stoom of huma di e cayente ta sali bai den tur direccion pa forma e corona of halo. Nos por a mira gas cayente ta briya tur rond di e circulo scur di luna. Diripiente, como si fuera tempo a bula bai dilanti, e eclipse total a pasa y un rayo di solo a briya for di otro banda di e sombra.
Segun cu e solo a cuminsa bira visibel atrobe, nos a mira e manchanan di solo cu anteriormente e sombra a tapa, ta sali un pa un for di scuridad. Y pocopoco solo a bolbe haya su forma rondo bek.”
Zambia: “Akinan e duracion di e eclipse total tawata 3 minuut y 14 seconde, pues nos tawatin tempo pa absorba e suseso impresionante. Tawata scur, pero tawatin un briyo na horizonte. Aunke shelo ainda tawata blou, bo por a mira planetanan cu normalmente claridad di solo ta tapa; por ehempel nos por a mira Jupiter y Saturno como puntanan di lus briyante. Kisas e aspecto mas espectacular di e eclipse tawata e corona di solo. El a aparece manera un briyo blanco ros rond di un circulo preto. Observadonan a keda fasina y a describie como ‘simplemente asombroso, magnifico.’ Gradualmente luna a pasa voorbij, revelando pocopoco e cara di solo y permitiendo e rayonan di solo yega tera sin estorbo. Pa 4:28 p.m. e eclipse a caba!”
Lesnan for di e Eclipse
Hopi hende a bisa despues di e eclipse cu e experencia ei a conmove nan. Na Angola, un señora a bisa cu casi el a cuminsa yora. Un otro persona a reflexiona riba e bunita regalo cu Dios a percura. Y uno a bisa cu ta solamente un Creador amoroso lo a percura e espectaculo aki pa asina hende por aprecia e beyesa increibel di solo como e fuente di energia di tera.
Tawata bisto cu hopi hende na Africa tin gran respet pa e Creador y pa Bijbel. Ora cu Testigonan di Yehova den e stad di Sumbe a papia cu otro hende tocante e eclipse y a menciona cu esaki tawata solamente un di e obranan maravioso di Yehova, nos Creador, e habitantenan a mustra hopi interes pa papia tocante e asunto. Hopi di nan cu smak a acepta ehemplarnan di un Toren di Vigilancia resien cu a papia di e obranan maravioso aki.
E suseso celestial aki a yuda miyones di hende lubida nan problemanan pa un par di minuut y concentra riba algo realmente animante y impresionante. Despues di a mira rasgonan glorioso di solo cu normalmente ta invisibel, algun hende a pensa riba e gloria invisibel pero asta mas maravioso ainda di e Creador di solo, Yehova Dios.
[Nota]
a Como cu e orbita di luna y tera ta eliptico (oval), e tamaño cu nos ta mira di solo cu luna ta varia un tiki segun nan posicion den nan orbita. Ora luna ta na e punto den su orbita cu ta mas leu for di tera, e parti mas scur di e sombra di luna no ta yega tur tur riba superficie di tera. Ora esaki sosode, observadonan riba tera cu ta caminda e sombra ta cai ta experencia un eclipse forma di renchi, y bo ta mira solo como un rand cla rond di un sombra scur.
b E efecto conoci como perla di Baily ta ser causa door di e echo cu e rand di luna no ta rondo rondo, sino zegzag door di sero- y vayenan. E puntanan di lus ta e lus di solo cu ta pasa net door di e vayenan di luna prome cu e eclipse total. E expresion “renchi di djamanta” ta describi e aparencia di solo net prome cu e eclipse total, ora cu un parti chikito di solo ta bisto ainda, dunando e aparencia di un renchi blanco cu un punta briyante, mescos cu un renchi di djamanta.
[Diagram na pagina 21]
(Pa e teksto den su formato kompleto, wak e publikashon)
→ →
Solo → Luna ⇨ Zona skur ⇨ Tera
→ →
[Reconocemento]
© 1998 Visual Language
[Plachinan na pagina 23]
Perla di Baily
Eclipse total
Renchi di djamanta
[Reconocemento]
Cortesia di Juan Carlos Casado, www.skylook.net▸
[Plachi na pagina 23]
Observadonan di e eclipse na Lusaka, Zambia