Mayornan Soltero Ta Haya Nan cu Hopi Desafio

“Mi ta sinti mi malo emocionalmente. Hopi anochi mi ta yora den baño. Mi situacion ta hopi dificil.”—JANET, UN MAMA SOLTERO CU TIN TRES YIU.

TIN varios situacion cu ta crea un mayor soltero. Algun famia ta keda cu un mayor so como consecuencia di guera, desaster natural of malesa.

Mayornan di algun mucha ta dicidi cu nan no ta casa cu otro. Na Suesia por ehempel, casi mita di e cantidad di yiunan ta nace pafo di matrimonio. Diborcio tambe ta crea hogarnan cu un mayor so. Investigacion ta mustra cu mas di 50 porshento di mucha Mericano ta haya nan ta biba pa un tempo den un hogar cu un solo mayor durante nan infancia.

Loke e Desafionan Ta Ensera

Mamanan cu resientemente a bira biuda ta haya nan cu un carga extra. Nan tin cu cuminsa asumi responsabilidad pa nan famia mientras nan ta tristo ainda debi na e perdida di nan partner. Podise ta tuma luna, asta añanan pa nan custumbra cu e papel aki. Hunto cu esei nan tin cu trata cu problemanan economico y cu e responsabilidad di consola nan yiunan. Pa un mama cu su casa a muri lo por ta masha dificil pa e asumi e responsabilidadnan extra ei. Esaki por pone cu e mucha ta keda sin haya e cuido y guia di su mayor net ora cu e tin mas mester di atencion y confiansa.

Hopi bes bo ta haya cu e mamanan soltero cu no a casa cu tata di nan yiu ta personanan hopi jong y sin experencia. Podise nan no a haya chens di caba scol. Sin ningun entrenamento adecua, tin hopi chens cu nan ta pober y ta haci trabounan cu ta paga masha tiki cen. Si nan miembronan di famia, manera nan mayornan, no yuda nan, nan lo tin tambe e responsabilidad pa busca hende pa cuida nan yiu durante dia. Podise un mama soltero tin cu lucha tambe cu carganan emocional manera berguensa y soledad. Algun di nan lo tin miedo cu e echo cu nan tin yiu lo stroba nan di haya un bon partner un dia. Segun cu e muchanan den e famianan ei ta crece, nan tambe por sinti nan molestia pa preguntanan tocante nan pasado riba cua nan no tin contesta, y tambe pa e echo cu nan kier pa e mayor ausente reconoce nan.

Mescos tambe, mayornan cu pasa door di e proceso di diborcio ta haya nan cu hopi stress. Diborcio por pone algun mayor haya un rabia profundo. E sintimento di no ta digno y cu nan a ser rechasa tambe por stroba algun mayor di duna atencion emocional na nan yiunan. Mamanan cu mester cuminsa traha pa prome bes lo por tin dificultad pa cumpli cu e responsabilidad di maneha un hogar. Nan lo por sinti cu nan no tin ni tempo ni energia pa e necesidadnan special di e muchanan. Y e muchanan mes tin cu trata cu cambionan grandi y diripiente despues di e diborcio di nan mayornan.

Desafionan Unico di Mayornan Diborcia

Mayornan soltero ta realisa cu e necesidadnan di cada yiu ta diferente y ta cambia constantemente. Kisas no ta facil pa mayornan soltero diborcia haya oportunidad pa duna cada yiu e guia spiritual cu e mester.

Por ehempel, sa sosode cu algun mayor diborcia cu ta Testigo di Yehova no tin e tutela di nan yiunan. Nan a haci esfuerso pa nan haya e derecho pa ta hunto cu nan yiunan riba e dia y ora cu nan por bai reunion cristian cu nan. E areglo di bishita aki lo duna e mucha contacto regular cu e congregacion cristian, y esaki lo beneficia e yiunan di mayornan diborcia masha.

Mayornan diborcia cu tin menos oportunidad pa bin den contacto regular cu nan yiunan mester busca maneranan pa sigura e yiunan di nan amor y cariño. Pa e mayor por tin exito, e mester ta conciente di e necesidadnan emocional di su yiu cu ta cambia constant. Esaki ta e caso specialmente ora e mucha bira teenager y ta cuminsa haya mas interes den actividadnan social y amigonan.

Un mayor soltero exitoso ta tene cuenta tambe cu e yiu su capasidadnan, su personalidad y manera di pensa. (Genesis 33:13) Mayor y yiu ta disfruta di combersacion y asociacion estrecho, intimo y caloroso cu otro. Semper nan por comunica libremente. E mucha ta parti di e mayor su bida, y e mayor ta parti di e mucha su bida.

Mester Ta Rasonabel

Despues di un diborcio, ta bon pa yiunan tin contacto regular cu tur dos mayor. Supone cu e mayornan tin creencianan religioso diferente; un ta Testigo di Yehova, y e otro no ta. Comunicacion regular y franco ta yuda evita conflicto innecesario. Apostel Pablo a skirbi: “Mantene un reputacion di ta rasonabel.” (Filipensenan 4:5, Phillips) Mester siña e yiunan respeta e derecho cu ambos mayor tin pa practica nan religion.

Kisas e mayor cu no ta Testigo ta insisti pa e yiu asisti na sirbishinan religioso na su misa. Kico e mayor cu ta Testigo di Yehova por haci? E tambe por comparti su conviccionnan religioso cu e yiu. Cu tempo e mucha por tuma su propio decision relaciona cu religion, mescos cu tawata e caso cu e hoben Timoteo, kende su mama y wela probablemente a siñ’e e principionan di Bijbel. (2 Timoteo 3:14, 15) Si e yiu ta sintie incomodo ora e ta asisti na sirbishi di un otro religion, kisas e por corda riba e personahe di Bijbel cu yama Naaman, kende despues cu el a bira un adorado berdadero a sigui cumpli cu su debernan door di compaña e rei cu tawata bai adora na e cas di Rimon. E relato aki por sigura e yiu cu Yehova ta stim’e y ta comprend’e maske e ta asisti na ceremonianan religioso cu e no ta custumbra cu ne.—2 Reinan 5:17-19.

Un mayor exitoso por moldea e manera di pensa di su yiu of yiunan y comprende nan sintimentonan. (Deuteronomio 6:7) Ta cierto cu mayornan cu no a casa nunca lo por sinti berguensa di nan estilo di bida di antes. Sinembargo, e mayornan ei mester corda cu nan yiunan tin dos mayor biologico. Yiunan kier sa di tur dos mayor, y nan tin cu sinti cu nan mayornan kier nan, y cu nan no ta djis e resultado di un accidente. Door di papia respetuosamente tocante e mayor ausente y duna contesta cu e mucha por comprende of mester sa segun su edad, e mayor por duna e yiu un confiansa basa riba amor.

Mayornan mester corda cu e prome impresionnan cu un yiu ta haya di amor, autoridad y poder ta ser influencia door di e relacion cu e yiu tin cu su tata of mama. Door di eherce su autoridad y poder cu amor, e mayor cristian por echt yuda prepara e yiu pa e tin un relacion amoroso cu Yehova y pa e respeta e areglonan den e congregacion.—Genesis 18:19.

Cooperacion di e Yiunan Ta Esencial

Yiunan cu ta biba den un famia cu un mayor so, mester comprende tambe cu nan cooperacion ta esencial pa e famia por tin exito. (Efesionan 6:1-3) Nan obediencia na autoridad di mayor ta mustra cu nan ta stima nan mayor y ta respeta e esfuerso extra cu e mayor ta haci pa percura un hogar safe y felis. Siendo cu comunicacion ta bini di dos banda, yiunan di un famia cu un mayor so mester corda cu nan mester ta dispuesto pa apoya e esfuerso cu e mayor ta haci pa mantene un bon comunicacion den e famia.—Proverbionan 1:8; 4:1-4.

Hopi bes e yiunan ei ta haya nan ta carga responsabilidad mas tempran cu muchanan cu ta biba den un hogar cu dos mayor. Si e mayor duna su yiunan instruccion cu amor y pasenshi, e muchanan lo haya confiansa y balor propio segun cu nan ta domina e habilidadnan pa logra exito den bida for di un edad jong. Tambe por delega algun trabou di cas na e yiunan pa asina nan yuda tene cas na ordo.

Esaki no kiermen cu e mayor soltero mester comberti su yiunan den adultonan chikito cu por percura pa nan mes y cu no tin mester di guia di nan mayor. Sigur sigur ta un gran bobedad pa laga un mucha chikito su so of sin supervision.

Hopi bes mayornan soltero ta pensa eroneamente cu nan mester ta un partner of amigo cu ta pareu di nan yiunan. Aunke mester tin un relacion estrecho entre mayor y yiu, mayornan soltero mester tene na mente cu yiunan mester di un mayor y cu un yiu no ta suficiente madura emocionalmente pa e ta confidente of pareu di e mayor. Bo yiunan tin mester di bo como mama of tata.

Si mayornan soltero y nan yiunan coopera cu otro di un manera amoroso, esei por yuda nan edifica un famia felis. Siendo cu mas y mas yiu ta ser lanta den hogarnan cu un solo mayor, tur hende mester ta conciente di e desafionan unico cu mayornan soltero y nan yiunan ta confronta y ser dispuesto pa duna nan apoyo y animacion amoroso.

[Cuadro/Plachi na pagina 9]

Efecto Riba Yiunan

Na comparacion cu dos mayor cu ta hunto, mayornan soltero por lo general tin menos tempo pa dedica na cada yiu individual. Tin bes un mayor soltero ta biba hunto cu un partner cu no ta su casa. Sinembargo, un bida compaña ta menos stabil cu un matrimonio. Probablemente e yiunan cu ta biba den e tipo di famia ei ta haya nan ta crece hunto cu tur e diferente partnernan cu nan mayor a cambia durante nan bida.

Segun algun estudio, “e promedio di yiunan cu ta core riesgo di hiba un bida menos saludabel den sentido moral y emocional ta mas halto serca yiunan cu ta bini di famia cu un mayor so, cu serca muchanan cu ta bini di famianan cu ambos mayor.” Sinembargo, un analisis mas a fondo di e estudionan ei ta indica cu falta di entrada lo por ta “e solo factor mas importante cu ta responsabel pa e diferencia entre e muchanan di varios forma di famia.” Claro cu esaki no ta nifica cu yiunan di un famia cu un mayor so, ta condena na fracaso. Cu bon guia y entrenamento, nan por vence e efectonan negativo.