Un Mayor Soltero, Pero No Solitario

“Loke mi ta gusta mas como mama ta ora mi yiunan yega cas y duna mi un abraso y bisa mi cu nan stima mi.” —DORIS, UN MAMA SOLTERO CU TIN DOS YIU.

MAYORNAN soltero por haya consuelo for di e declaracion di Bijbel: “Yiunan ta un regalo di SEÑOR, nan t’un berdadero bendicion.” (Salmo 127:3, Beibel na papiamentu koriente) Ora yiunan wordo lanta den un famia cu un mayor so nan no ta di menos balor den bista di Dios. Nos Creador ta desea pa famianan cu un mayor so logra exito. Bijbel ta bisa di Yehova: “E ta sostene werfano y biuda.” (Salmo 146:9) Mayornan soltero por tin tur confiansa cu Dios ta cla pa apoya nan.

Un yiu mester ser cria den un ambiente di amor y di siguridad cu lo permitie desaroya fisicamente, emocionalmente y spiritualmente. Tur tata y mama tin e obligacion di entrena nan yiu, y a la bes e ta un privilegio pa nan ser uza door di Dios pa haci esei.

Hopi mayor a ripara cu pa logra exito nan mester haci oracion regularmente, aplica principionan di Bijbel cu consistencia y depende completamente riba Yehova. Esaki ta na harmonia cu e animacion cu nos ta haya na Salmo 55:22, cu ta bisa: “Tira bo carga riba SEÑOR, y E lo sostene bo.”

De bes en cuando, welanan, ancianonan local y mayornan experencia den e congregacion cristian lo por ta dispuesto pa yuda un famia cu un mayor so pa trata cu situacionnan dificil. Aunke ta cierto cu miembronan di famia y compañeronan di creencia por ta di gran yudansa pa mayornan soltero, finalmente ta e mayornan di e yiu ta responsabel dilanti Dios.a

Felismente, hopi mayor soltero a logra trata cu e desafionan unico cu nan situacion a trece cu ne, y nan por a lanta yiunan responsabel, cu bon manera y temor pa Dios. Spierta! a papia cu algun di nan. At’aki algun cos cu e mayornan ei tin en comun.

• Bon maneho di cas. Mayornan soltero cu tin exito ta haci esfuerso pa nan ta bon organisa y ta traha duro pa cordina nan orario. Bon planiamento y organisacion ta esencial. Bijbel ta bisa: “E plannan di hende balente siguramente ta conduci na abundancia.”—Proverbionan 21:5.

• Dedicacion. Mayornan soltero cu tin exito ta considera nan bida di famia como un di nan prome prioridadnan. Nan ta haci esfuerso pa pone e necesidadnan di nan yiunan prome cu esnan di nan mes.—1 Timoteo 5:8.

• Un proceder balansa. Mayornan soltero cu tin exito no ta minimisa ni exagera nan problemanan; nan ta busca solucion. Nan ta acepta e dificultadnan y ta purba trata cu nan sin amarga of sinti duele di nan mes.

• Bon comunicacion. Mayornan soltero cu tin exito ta anima comunicacion. Nan ta anima tur miembro di famia pa expresa nan pensamento- y sintimentonan di un manera cla y habri. Un tata soltero ta bisa tocante su yiunan: “Mi ta papia cu nan tur ora. Ora nos ta prepara cuminda hunto, nos ta combersa dushi cu otro. Ta e ora ei nan ta realmente confia mi nan cosnan.”

• Percura pa bo mes. Maske mayornan soltero cu tin exito tin cu dedica hopi tempo na otro cosnan, nan ta reconoce cu ta importante pa nan percura pa nan propio necesidadnan spiritual, emocional y fisico. Ethel, un mama soltero cu a diborcia y cu tin dos yiu, a splica: “Mi ta purba aparta un poco tempo pa mi mes. Por ehempel, ora e muchanan ta tuma les di musica serca un amigo, mi ta haya un ora pa mi mes. Mi ta cai sinta y no ta sende television.”

• Un actitud positivo. Mayornan soltero cu tin exito ta mantene un punto di bista positivo tocante nan responsabilidad como mayor y di bida en general. Nan ta wak e rasgonan positivo di situacionnan dificil. Un mama soltero ta declara: “Mi a realisa cu ser mama soltero tin su cosnan agradabel tambe cu ne.”

Mayornan Soltero Cu A Logra

E principionan aki ta duna resultado? Si, y nos por mira esei for di hopi relato di mayornan soltero exitoso. E prome articulo a menciona Gloria di Inglatera. E ta un mama soltera diborcia cu ta traha y cu a lanta dos yiu homber y un yiu mohe. Ora nan a bira grandi, tur tres a bira ministernan cristian di tempo completo, y ta dedica nan bida na promove loke Bijbel ta siña. Ora a puntra Gloria con bin el a logra esei, el a splica: “E prome desafio tawata pa mantene un studio di Bijbel como famia, regularmente y interesante. Mi tawata kier pa mi yiunan ta felis, pa nan tin pas mental, pa nan ta contento y proteha for di peliger. Mi a haya un trabou pa traha anochi. Mi meta tawata pa tene e muchanan hunto cu mi ki ora cu tawata posibel. Prome cu mi bai traha, nos tawata haci oracion como famia y mi tawata pone nan drumi. Ora mi tawata traha, mi tanta tawata keda cas cu nan.”

Con Gloria a yuda su yiunan pone e prioridadnan corecto? E ta sigui: “Mi meta principal tawata pa pone cos spiritual na prome luga. Nos no tawatin masha placa, y mi tawata hopi franco cu e muchanan tocante esei. Mi mes tambe tawata haci tur loke mi tawata pidi nan haci, y nan tur tawata coopera.” Recordando con el a mantene su famia estrechamente uni, Gloria ta bisa: “E secreto tawata haci tur cos hunto. Ningun hende no tawata isola su mes den su camber. Nos a cushina, limpia y decora cas hunto. Nos a balansa nos actividadnan. Semper mi a percura pa nos recrea tambe.”

Carolyn, un mama soltero cu tin un yiu homber jong cu yama Joseph, ta contento cu e manera cu su yiu ta creciendo. Kico ta su secreto? E ta bisa: “Prome cu nos drumi anochi, nos ta lesa Bijbel hunto, y despues mi ta hacie pregunta tocante e informacion cu el a lesa. Ademas, nos ta considera algun paragraf selecta for di publicacionnan basa riba Bijbel y nos ta aplica nan na nos situacion personal. Esaki ta yuda Joseph enfrenta problema tal como abuso na scol.” Carolyn ta admiti cu su bida sigur no ta facil, pero e ta sinti cu e no ta su so. E ta remarca: “Mi tin un lucha constante, pero mi ta sinti cu Yehova a yuda mi di berdad. E congregacion cristian tambe ta anima mi masha.”

Relatonan cu ta mustra e exito di mayornan soltero, manera esun di Gloria y Carolyn, ta duna prueba cu awe tambe mayornan por depende riba e principionan di Bijbel cu a proba di ta eficas pa nan por lanta yiunan excelente y spiritualmente fuerte. (Proverbionan 22:6) Exito ta posibel! Lanta yiu como mayor soltero ta trece hopi desafio cu ta duna oportunidad pa crece y comparti. E miho manera cu mayornan soltero por trata cu e problemanan cu nan situacion ta trece cu ne ta door di depende completamente riba Dios y keda combenci cu lo E yuda nan na e miho manera posibel.—Salmo 121:1-3.

[Nota]

[Plachinan na pagina 11]

Studio di Bijbel como famia a yuda Gloria su tres yiunan bira ministernan cristian di tempo completo. Aki nan ta lesa un carta y wak un potret di e yiu homber mayo cu actualmente ta sirbi como misionero

[Comentario di e plachi na pagina 12]

Carolyn cu su yiu homber, Joseph