E Manera Cu Nan Ta Lesa Lip

DI E CORESPONSAL DI SPIERTA! NA GRAN BRETANIA

NAN a filma dos persona cu nan a sospecha di ta terorista papiando cu otro den un parke publico. Aunke ningun hende no por a tende loke nan tawata papia, toch polis a aresta nan y despues nan a ser sentencia na hopi aña di prizon. Un persona cu ta lesa lip a lesa nan combersacion filma. E lesado di lip aki ta ser acepta como un testigo experto na Gran Bretania y nan ta yam’e un “arma secreto potente” di polis Britanico.

Pa nos haya sa mas di e arte di lesa lip, nos a bai bishita Mike cu Christina. Ora Christina tawatin tres aña el a bira sordo. Despues el a asisti na un scol pa mucha sordo, y einan nan a siñ’e lesa lip. Mike a siña lesa lip riba su mes despues cu el a casa cu Christina.

Ta dificil pa lesa lip? Segun Mike: “Bo tin cu concentra riba e forma y movementonan di e lip, lenga y cachete.” Christina ta agrega: “Bo tin cu wak e persona cu ta papia cu bo atentamente, y segun cu bo habilidad pa lesa lip ta aumenta, lo bo ripara expresionnan di cara y gesto tambe.”

Mi a siña cu e fout di mas grandi cu e persona cu ta papia por haci ta, grita of exagera e manera cu e ta move su lipnan. E fayonan ei por confundi otronan y stroba mas cu nan ta yuda. Una bes cu e lesado di lip domina e arte aki, ta posibel asta pa e cuminsa identifica accentnan regional. Claro cu esaki no ta facil! Problema di Oido, un organisacion cu ta specialisa den duna les di lesamento di lip, ta indica francamente: “Pa bo siña lesa lip, bo tin cu practica, practica y sigui practica.”

Christina ta admiti cu tin biaha e ta sinti berguensa ora e gara su mes ta “scucha” un combersacion inconcientemente den un bus of trein. E unico cos cu e por haci ta wak otro caminda mesora. Pero su habilidad por ta un proteccion. Christina no ta wak futbol na television mas pasobra hopi bes el a yega di sintie incomodo door cu e por a mira kico algun di e hungadonan tawata bisa.

Poco hende lo logra haya e mesun habilidadnan cu e “arma secreto” di polis di Gran Bretania ta posee. Pero asta e habilidad pa lesa lip djis un tiki so por ta un arte balioso cu lo bo por desaroya despues cu bo a perde bo oido.

[Plachi na pagina 31]

Christina

[Plachi na pagina 31]

Mike