Speransa y Miedo di Proteccion Policial

NA PRINCIPIO di siglo 19 hopi hende na Inglatera a resisti e proposicionnan pa bini cu un cuerpo di polis profesional y uniforma. Nan tawatin miedo cu un cuerpo arma den man di gobierno central lo por pone nan libertad na peliger. Algun tawatin miedo cu Inglatera lo a bin hay’e cu un sistema di spionnan policial manera tawata e caso na Francia bou di Joseph Fouché. No obstante, nan tawatin cu haci nan mes e pregunta: ‘Con nos lo haci sin un cuerpo di polis?’

Londen a bira e stad mas grandi y mas rico na mundo; criminalidad tawata aumenta y a bira un menasa pa comercio. Ni vigilantenan boluntario djanochi ni e cohedonan profesional di ladron (yama Bow Street Runners cu a ser financia pa fondonan priva) tawatin e capasidad pa proteha hende y nan propiedad. Clive Emsley ta bisa den su buki The English Police: A Political and Social History (Polis Ingles: Un Historia Politico y Social): “Mas y mas, hende tawata considera criminalidad y desordo como cosnan cu no mag existi den un sosiedad civilisa.” Pues habitantenan di Londen a scohe pa un cuerpo di polis profesional bou di direccion di Sir Robert Peela y a spera cu esei lo a duna bon resultado. Na september 1829, agentenan policial uniforma di Polis Metropolitano a cuminsa patruya nan area asigna.

For di principio di su historia moderno, e topico polis a ensera speransa y miedo; speransa cu nan lo a percura siguridad y miedo cu nan lo a abusa di nan poder.

Polis Mericano Ta Cuminsa Funciona

Na Merca, New York City tawata e prome stad cu tawatin un cuerpo di polis profesional. Criminalidad a aumenta hunto cu e stad su rikesa. Den decada di 1830, tur famia por a lesa e historianan sensacional y escandaloso tocante criminalidad cu tawata sali den corantnan barata cu nan a cuminsa publica, yama penny press. Protesta publico a bira mas fuerte, y New York a haya su cuerpo di polis na 1845. For di e tempo ei en adelante habitantenan di New York y di Londen tawata fasina cu e cuerpo policial di otro.

Mescos cu e Inglesnan, Mericanonan tambe tawatin miedo di un forsa arma den man di gobierno. Pero cada un di e dos nacionnan a bini cu un otro solucion. E Inglesnan a opta pa un cuerpo di polis cabayero, bisti cu pechi halto y uniform blou scur. Nan tawata arma cu solamente un klop di palo cortico cu nan tawatin scondi. Te awe polis Britanico (bobby) no ta carga pistol, cu excepcion di casonan di emergencia. Sinembargo, manera un informe ta bisa, “tin un creciente sintimento di lo inevitabel . . . cu polis Britanico cu tempo lo bira un forsa completamente arma.”

Sinembargo, na Merca e miedo cu lo por abusa di poder gubernamental a hiba na aceptacion di e Segundo Enmienda di e Constitucion Mericano, cu ta garantisa “e derecho pa hende carga of posee arma.” Esei a pone cu polis tawata kier arma. Cu tempo, nan uzo di arma a resulta den tiroteonan riba caya cu a bira un caracteristica Mericano di e enfrentamentonan entre polis y ladron, a lo menos segun e impresion popular. Un otro motibo pa e actitud Mericano relaciona cu cargamento di arma ta cu e prome cuerpo di polis na Merca a cuminsa den un sosiedad hopi distinto for di Londen. New York a bira un stad caotico segun cu su poblacion a aumenta rapidamente. E entrada di miles di imigrante principalmente for di Europa y di Mericanonan di desendencia Africano despues di e Guera Civil di 1861 pa 1865, a hiba na violencia racial. Polis a sinti cu nan mester a cuminsa uza metodonan mas severo.

Pesei, nan a considera polis hopi bes como un necesidad desagradabel y kisas asta perhudicial, pero inevitabel. Pesei hende tawata dispuesto pa soporta e cosnan di mas cu polis lo a haci de bes en cuando, cu e speransa di logra un grado di ordo y siguridad. Sinembargo, den algun parti di mundo, un otro tipo di cuerpo policial a cuminsa desaroya.

Polis Cu Ta Causa Miedo

Na principio di siglo 19, ora cu cuerponan di polis moderno a cuminsa desaroya, gran parti di humanidad tawata biba bou di mando di imperionan Europeo. Generalmente tawata organisa polis Europeo pa proteha gobernantenan y no e pueblo. Asta e Britaniconan—cu no tawata gusta ningun tiki e idea di polis arma, estilo militar den nan propio pais—aparentemente no tawatin problema pa uza polis militar pa domina nan colonianan. Rob Mawby ta bisa den su buki Policing Across the World (Uzo di Polis Rond Mundo): “Incidentenan di brutalidad, corupcion, violencia, asesinato y abuso di poder di parti di polis a tuma luga den casi tur decada di historia di polis colonial.” Despues di indica cu uzo di polis bou di control imperial tambe tawatin algun beneficio, e mesun buki ta agrega cu esei a pone “nacionnan rond mundo considera uzo di polis como un cuerpo gubernamental y no como un servicio publico.”

Gobiernonan cu poder absoluto y cu ta teme revolucion casi semper a uza polis secreto pa spiona nan ciudadanonan. E polisnan ei ta saca informacion door di tortura hende y ta elimina supuesto rebeldenan door di asesina nan of aresta nan sin huicio. E nazinan tawatin nan Gestapo, Union Sovietico tawatin su KGB, y Alemania Oriental tawatin Stasi. Sorprendentemente, Stasi a emplea 100.000 polis y posiblemente mei miyon informante pa controla un poblacion di mas o menos 16 miyon hende. Polis di Stasi tawata scucha combersacionnan telefonico 24 ora largo y tawatin file di un tercera parti di e poblacion. John Koehler ta bisa den su buki Stasi: “Agentenan policial di Stasi no tawatin limite ni berguensa. . . . Nan a recluta miembronan di clero masalmente como informado secreto, incluso funcionarionan halto di tanto religion protestant como catolico. Nan oficina y confesionario tawata patapata di microfon scondi.”

Sinembargo, no ta den teritorio di gobiernonan cu poder absoluto so bo ta haya polis cu ta causa teror. Na otro parti di mundo tambe nan a acusa polisnan di stad grandi di ta causa teror ora nan ta uza un estilo demasiado agresivo pa mantene lei, specialmente si nan ta consentra riba gruponan minoritario. Comentando riba un scandal na Los Angeles cu a haya hopi publicidad, un revista a declara cu e scandal a “mustra cu mal comportacion di polis a yega na un nivel nobo di kibramento di lei y a popularisa un palabra nobo: polis gangster.”

Pesei autoridadnan a cuminsa puntra: Kico departamentonan di polis por haci pa mehora nan imagen of reputacion? Den un intento pa enfatisa nan papel di sirbi e pueblo, hopi cuerpo policial a purba enfatisa e aspectonan di trabou di polis cu ta di beneficio pa comunidad.

E Speransa di cu Trabou di Polis Lo Ta na Beneficio di Comunidad

Hapon su estilo tradicional di polis den bario a atrae interes internacional. Tradicionalmente, polis Hapones ta traha na wardanan di polis chikito cu ta responsabel pa un cierto area, y cu ta drei a base di kisas un dozijn di polis cu ta traha warda. Frank Leishman, un orado Britanico riba tereno di criminologia y habitante pa hopi tempo di Hapon, ta bisa: “E alcanse di e servicio amigabel cu agentenan policial di koban [un warda di polis chikito] ta rindi ta bon conoci, nan ta: duna informacion di adres di e cayanan di Hapon, cu pa gran parti no tin nomber; fia paraplu sin doño na hende na pia cu diripiente a haya nan cu awasero; haci sigur cu sararimen [oficinistanan of comerciantenan] burachi ta haya e ultimo trein pa bai cas; y duna conseho riba ‘problemanan di ciudadano.’” Polis staciona den bario ta un factor cu a duna Hapon e reputacion hopi desea, esta, cu e ta un pais cu cayanan caminda bo por cana trankil.

Por uza polis di e manera eficas aki na otro partinan di mundo? Algun analista di criminalidad a saca un les for di esaki. Avancenan moderno den comunicacion tin e tendencia di distancia polis for di e hendenan cu nan ta sirbi. Den hopi stad djawe, trabou di polis ta parce di ta consisti principalmente di atende emergencia. Tin biaha ta parce cu nan a perde e enfasis cu originalmente tawatin riba preveni criminalidad. Door di e tendencia aki, vigilancia di bario a bolbe bira popular.

Vigilancia di Bario

“Esaki ta echt duna resultado; e ta baha criminalidad”, polis Dewi ta bisa di su trabou na Wales. “Vigilancia di bario ta nifica cu bo ta laga biciñanan vigila siguridad di otro. Nos ta organisa reunionnan pa biciñanan siña conoce otro, intercambia nomber y number di telefon, y tende con pa preveni criminalidad. Mi ta gusta e proyecto pasobra e ta bolbe laga barionan sinti cu nan ta forma un comunidad. Hopi bes hende no sa mes ken ta nan biciña. E plan ta funciona pasobra e ta haci hende mas conciente.” Tambe e ta drecha relacion entre polis y e publico.

Un otro iniciativa tawata pa anima polis pa tene mas compasion cu victimanan. E famoso analista di victima, e Hulandes Jan van Dijk a skirbi: “Mester siña agentenan di polis cu nan manera di papia y trata cu victimanan ta mes importante cu un docter su manera di papia y trata cu su pashentnan.” Na hopi luga polis ainda no ta trata violencia domestico y violacion como berdadero crimen. Pero Rob Mawby ta bisa: “E manera cu polis ta trata violencia domestico y violacion a drecha hopi den ultimo añanan. No obstante, ainda nan por mehora.” Abuso di poder policial ta un otro area caminda tur cuerpo di polis por mehora.

Miedo di Polis Corupto

E idea di sinti bo proteha pa polis tin biaha ta parce ingenuo, specialmente ora ta circula noticianan di corupcion serca polis. For di principio di historia di polis tawatin e tipo di informenan ei. Referiendo na aña 1855, e buki NYPD—A City and Its Police (Departamento di Polis di New York—Un Stad y Su Cuerpo di Polis) a describi “e impresion di hopi New Yorkino, esta, cu tawata birando dificil pa distingui bandido for di polis.” E buki Faces of Latin America (Aspectonan di Latino America), di Duncan Green, ta informa cu ‘na tur parti hende ta kere cu cuerponan di polis einan ta can can di corupcion, incompetencia y di abusadonan di derecho humano.’ E hefe di personal di un cuerpo di polis di 14.000 agente a bisa: “Kico otro bo por spera ora polis ta gana menos cu [100 dollar] pa luna? Si nan ofrec’e un soborno, kico lo e haci?”

Con grandi e problema di corupcion ta? Ta depende ken bo ta puntra. Un polis di Norteamerica cu pa añanan a patruya un stad cu un poblacion di 100.000 hende, ta contesta: “Claro cu tin un porsentahe di polis corupto, pero e mayoria di e agentenan ta honesto. Esei ta mi experencia.” Di otro banda, un investigado di criminalidad cu 26 aña di experencia den un otro pais ta contesta: “Ami ta pensa cu tin corupcion casi tur caminda. Honestidad bou di polis ta masha raro. Si un polis ta investigando un cas caminda nan a drenta horta y e haya placa, probablemente lo e coh’e. Si e recupera propiedad horta, lo e tene un parti pa su mes.” Dicon algun polis ta bira corupto?

Tin polis ta cuminsa cu principionan halto pero despues nan ta cai pa e influencia di coleganan corupto y normanan degrada di e mundo criminal cu cua nan ta trata. E buki What Cops Know (Loke Polis Sa) ta cita un polis cu ta patruya caya di Chicago cu a bisa: “Den caso di agentenan policial, maldad ta algo cu nan conoce di experencia personal. Nan ta den dje. Nan ta mishi cu ne . . . nan ta purb’e . . . nan ta hol’e . . . nan ta tend’e . . . nan tin cu trata cu ne.” Contacto cu tal corupcion facilmente por tin un efecto negativo.

Aunke polis ta percura un servicio masha balioso, e ta leu di ta ideal. Nos por spera algo miho?

[Nota]

[Cuadro/Plachinan na pagina 8, 9]

“Bo No Ta Haya Bobby Britanico Maravioso?”

E Britaniconan tawata entre e promenan cu por a permiti nan mes e luho di tin un cuerpo di polis profesional. Nan tawata kier pa nan sosiedad ta bon organisa, mes bon cu nan sistema masha puntual di transporta pasahero y post cu garoshi di cabai. Na 1829 e Minister di Asuntonan Interno, Sir Robert (Bobby) Peel, a combence Parlamento pa aproba e Polis Metropolitano di Londen cu sede na Scotland Yard. Aunke na principio e cuerpo no tawata mucho gusta pasobra nan a tuma accion fuerte y decisivo contra buracheria y wega di placa riba caya, cu tempo, bobby (polis) a bira masha stima serca e pueblo.

Na 1851, Londen cu orguyo a invita mundo bini na e Gran Exhibicion y admira e logronan di e industria Britanico. Bishitantenan a keda asombra cu e cayanan tawata na ordo y sin burache, prostituta ni bagamundo. Agentenan policial eficiente a dirigi multitud, carga maleta di bishitantenan, yuda hende crusa caya y asta a carga señoranan bieu hiba taxi. Nada straño cu bo por a tende hende Britanico y tambe bishitante stranhero bisa: “Bo no ta haya bobby Britanico maravioso?”

Nan a parce asina efectivo den preveni criminalidad cu e hefe di polis di Chester na 1873 a imagina un dia cu practicamente lo a elimina crimen profesional! Tambe polis a cuminsa organisa servicio di ambulans y di paga candela. Nan a lanta organisacionnan di caridad cu a percura sapato y paña pa hende pober. Algun di nan a organisa clubnan pa mucha homber, excursionnan y casnan di facansi.

Claro cu e cuerpo di polis nobo tawatin tambe su problemanan disiplinario relaciona cu agentenan policial envolvi den corupcion y brutalidad. Pero mayoria a haci nan best pa mantene ordo uzando un minimo di forsa bruto. Na 1853, polis di e stad Wigan, Lancashire, mester a confronta un lantamento di mineronan cu tawata welga. Cu curashi e sergeant, a cargo di solamente dies homber, a para ariba cu e no ta uza e arma di candela di e doño di e mina. Un otro ehempel di e actitud cu e polisnan a desaroya ta bisto den un carta cu Hector Macleod a haya na 1886, ora el a sigui den pasonan di su tata y tambe a bira polis. E carta a bisa, manera a keda cita den e buki The English Police: “Si bo ta severo, bo ta perde simpatia di e publico . . . Ami a pone e publico prome pasobra como polis bo ta sirbido di comunidad, caminda nan a pone bo pa sirbi actualmente, y ta bo deber di agrada nan y tambe bo comandante.”

Hayden, un inspector pensiona di e cuerpo di Polis Metropolitano, ta bisa: “Nan a siña nos pa semper eherce dominio propio pasobra trabou di polis exitoso tin mester di e apoyo di comunidad. Nos klop tawata absolutamente un ultimo recurso cu mayoria agente no a uza den henter nan carera.” Un otro cos cu a contribui na e imagen positivo di e bobby Britanico tawata un serie popular yama Dixon of Dock Green cu nan a pasa na television pa 21 aña largo. E tawata trata tocante un polis honesto cu tawata conoce tur hende den e area cu e ta patruya. E serie ei probablemente a curasha polis pa actua di acuerdo cu e imagen ei, pero tambe sigur el a stimula Gran Bretania su amor pa polis.

Pero den decada di 1960 actitudnan na Gran Bretania a cambia, y e tradicion di orguyo nacional a ser remplasa pa un tradicion di desconfiansa den autoridad. Informenan di corupcion y rasismo den e filanan di polis a daña nan reputacion den decada di 1970, apesar di nan esfuerso pa haya apoyo publico cu e plan di vigilancia den bario. Resientemente, despues di varios acusacion di rasismo y di ta inventa evidencia afin di logra sentencianan, polis a haci mas intento sinsero pa mehora nan comportacion.

[Reconocemento]

Potret ariba: http://www.constabulary.com

[Cuadro na pagina 10]

Un Milager na New York?

Ora polis haci esfuerso special, e resultadonan por ta remarcabel. Pa hopi tempo hende a considera New York como un di e stadnan mas peligroso na mundo, y na final di decada di 1980, a parce cu e cuerpo di polis demoralisa no tawatin control riba criminalidad. Problemanan economico a forsa gobierno di e stad pa vries salario y reduci e cuerpo di polis. Dealernan di droga a expande nan actividad y esei a resulta den un ola teribel di violencia. Habitantenan den centro di ciudad tawata bai drumi meimei di zonido di tiroteo. Na 1991 tawatin lantamentonan racial grandi, y polis mes tambe a organisa un protesta yen di bochincha pa expresa nan malcontento.

Sinembargo, un hefe di polis nobo a mustra interes den motiva su agentenan, y a reuni cu cada warda di polis regularmente pa analisa nan strategia. James Lardner y Thomas Reppetto ta splica den nan buki NYPD: “E hefe di detectivenan of e cabes di e Departamento di Narcotica tawata hende cu e comandante di un warda di polis a lesa di dje den corant, pero cu casi nunca e no a topa. Awor nan tur tawata sinta hunto pa oranan largo.” Cifranan di criminalidad a cuminsa baha drasticamente. Segun informe, asesinato a baha gradualmente for di casi 2.000 na 1993 pa 633 na 1998, e cantidad mas abou den 35 aña. New Yorkinonan a cuminsa papia di un milager. Crimen denuncia na polis durante e ultimo ocho añanan a baha cu 64 porshento.

Con nan a logra e adelanto aki? The New York Times di 1 di januari 2002 a indica cu un factor decisivo pa e exito tawata Compstat, “un sistema di registra crimen cu ta ensera analisa statistieknan di cada warda tur siman pa identifica y atende problema asina cu nan surgi.” Excomisario di polis Bernard Kerik a declara: “Nos a wak unda e crimen tawata tuma luga, pakico e tawata tuma luga, anto nos a relocalisa tropanan [polis] y recurso pa haci sigur cu a duna e areanan ei mas atencion. Asina bo ta reduci criminalidad.”

[Plachi na pagina 7]

Un warda di polis tipico di Hapon

[Plachi na pagina 7]

Polis di trafico na Hong Kong

[Plachi na pagina 8, 9]

Polis ta controla multitud na un wega di futbol na Inglatera

[Plachi na pagina 9]

Deber di polis ta ensera yuda victima di accidente