Kico Lo Ta e Futuro di Polis?

SIN polis probablemente nos lo tin anarkia. Pero asta cu polis mes, nos mundo ta safe? Den mayoria stad awe, mescos cu den hopi area pafo di stad, hende ta sinti cu siguridad ta den un crisis. Nos por sten cu polis lo libra nos di crimen organisa y di criminalnan residivista? Nos por spera cu polis lo haci nos cayanan safe? Nan lo gana e guera contra criminalidad?

David Bayley ta duna un opinion den su buki Police for the Future (Polis pa Futuro): “Polis no ta preveni criminalidad.” E ta agrega: “En realidad, polis ta djis un pleister riba cancer. . . . Nos no por depende riba polis—ni asta si nan ta dedica na preveni criminalidad—pa salba sosiedad for di criminalidad.” Estudionan a indica cu e tres actividadnan principal di polis—patruya caya, atende yamadanan di emergencia y investiga crimen—no ta preveni criminalidad. Dicon no?

Purba preveni criminalidad door di djis aumenta e presencia di polis lo ta demasiado caro. Y asta si por afford mas polis, ta parce cu esei no ta stroba criminalnan. Reacciona rapidamente riba emergencia tampoco no ta stroba hopi crimen. Segun polis, a menos cu nan yega den menos cu un minuut na e esena di un crimen, ta improbabel cu nan lo gara esun responsabel. Y criminalnan sa cu rara bes polis por yega dje lihe ei. Investigacion criminal tampoco no ta yuda. Asta ora detectivenan logra haya e criminalnan culpabel y encarsela nan, esei aparentemente no ta preveni criminalidad. Merca ta sera mas criminal cu tur otro nacion, pero te ainda e ta sufri di un porsentahe halto di criminalidad; mientras cu Hapon tin poco hende den prizon, y tin un di e porsentahenan mas abou di criminalidad. Asta plannan manera vigilancia di bario no a duna prueba di tin efecto duradero, specialmente den areanan di hopi criminalidad. Ora tuma medidanan fuerte y decisivo contra crimennan spesifico—manera traficacion di droga of atraco—nan tin un impacto dramatico pa un tempo, pero atrobe, e efectonan no ta dura largo.

E buki Police for the Future ta bisa: “E echo cu polis no por preveni criminalidad no mester ta un sorpresa grandi pa hende atento. En general hende ta comprende cu ta condicionnan social fuera di control di polis, y tambe fuera di control di e sistema hudicial den su totalidad, ta determina e nivel di criminalidad den comunidadnan.”

Kico Lo Pasa sin Polis?

Con abo ta actua ora no tin polis ta vigila? Bo ta probecha di nan ausencia pa kibra lei? Ta increibel cuanto hende supuestamente respeta di clase medio y clase halto ta risca nan reputacion y nan futuro pa e beneficionan dudoso di fraude y estafa na trabou. The New York Times resientemente a informa di ‘112 hende acusa di ta den un complot pa estafa companianan di seguro di auto. Entre esnan acusa tawatin abogado, docter, kiropractico, un fisioterapista, un acupunturista y un empleada administrativo di e Departamento di Polis.’

Un otro caso di fraude na gran escala resientemente a shock e sponsornan rico di mundo di arte ora cu e exadministradonan principal di e casnan di findishi Sotheby’s na New York y Christie’s na Londen a ser sentencia debi cu nan tawata fix prijs. E administradonan y e casnan di haci findishi tin cu paga cientos di miyones di florin na but y compensacion! Pues e golosidad insasiabel pa placa ta penetra den tur nivel di sosiedad.

Loke a pasa na 1997 na Recife, Brasil, ora polis a welga, ta mustra cu hopi hende ta cla pa comete crimen ora no tin nada pa stroba nan. Nan conviccionnan religioso no tin ningun efecto riba nan comportacion. Facilmente nan por minimisa of bandona nan etica- y principionan. No ta nada straño anto cu polis den mayoria pais ta hibando un lucha perdi den un mundo cu ta inclina na kibra lei, sea den cosnan insignificante of cosnan grandi.

Di otro banda, tin hende ta obedece lei pasobra nan ta respeta autoridad. Apostel Pablo a bisa cristiannan na Roma cu nan mester ta sumiso na e autoridadnan cu Dios ta permiti existi, ya cu nan ta mantene por lo menos un grado di ordo den sosiedad. Tocante e autoridadnan ei el a skirbi: “E ta un sirbido di Dios, un vengado cu ta trece furia riba esun cu ta practica maldad. Pesei ta necesario pa ta someti, no solamente pa motibo di furia, sino tambe pa motibo di consenshi.”—Romanonan 13:4, 5.

Cambio den Condicionnan Social

Trabou di polis sigur ta yuda drecha condicionnan social. Ora ta bisto cu cayanan ta liber di droga y violencia, hende ta inclina na biba di acuerdo cu e bon reputacion cu nan comunidad tin awor. Pero en realidad, ta fuera di alcanse di cualkier cuerpo di polis pa cambia y mehora sosiedad.

Bo por imagina bo un sosiedad caminda hende tin asina un gran respet pa lei cu nan no tin mester di polis? Bo por visualisa un mundo caminda hende ta asina interesa den otro cu biciñanan ta semper cla pa yuda y ningun hende tin cu pidi asistencia di polis? Kisas esei ta zona manera fantasia. Pero e palabranan aki di Hesus, aunke el a papia nan den un otro contexto, sigur ta aplica. E di: “Serca hende esaki ta imposibel, ma serca Dios tur cos ta posibel.”—Mateo 19:26.

Bijbel ta describi un tempo den futuro ora cu henter humanidad lo ta ciudadano di un gobierno estableci door di Yehova Dios. “E Dios di shelo lo lanta un reino . . .  [cu] lo garna y pone un fin na tur e reinonan aki.” (Daniel 2:44) Door di educa tur hende sinsero den Dios su caminda di amor, e gobierno nobo aki lo cambia e condicionnan social cu ta produci criminalidad. “Tera lo ta yen di e conocemento di SEÑOR, manera awa ta tapa lama.” (Isaias 11:9) Hesucristo, e Rei cu Yehova a nombra, lo por preveni tur crimen. “E lo no husga segun loke su wowo ta mira, ni haci decision segun loke su horea ta tende; ma cu husticia e lo husga e pobernan, y dicidi cu honestidad pa e aflihinan di e tera.”—Isaias 11:3, 4.

Lo no tin criminal ni criminalidad. Lo no tin mester di polis. Tur hende “lo sinta bou di su palo di wendruif y bou di su palo di figo, y ningun hende lo no spanta nan.” (Mikeas 4:4) Si bo tin gana di ta parti di e “tera nobo” describi den Bijbel, awor ta tempo pa investiga kico Dios a priminti den su Palabra.—2 Pedro 3:13.

[Comentario na pagina 12]

Bo por imagina bo un sosiedad caminda hende tin asina un gran respet pa lei cu nan no tin mester di polis?

[Comentario na pagina 12]

Lo no tin criminal ni criminalidad

[Cuadro/Plachi na pagina 11]

Polis Contra Terorista

Manera e susesonan di 11 di september 2001 na New York City y Washington, D.C., a mustra, polis ta confronta algun di e retonan mas dificil pa proteha e publico ora nan haya nan cu pirata di avion, secuestrado y terorista. Den hopi parti di mundo nan a entrena pelotonnan special pa invadi un avion staciona. Tambe nan a siña e arte di drenta di sorpresa den edificionan: baha cu cabuya for di dak, bula drenta door di bentana y benta granat cu ta manda hende leu y blekinan di gas lacrimogeno. E agentenan entrena ei hopi bes ta logra sorprende y vence teroristanan cu daño minimo na e rehennan.

[Reconocemento]

James R. Tourtellotte/U.S. Customs Service

[Plachi na pagina 12]

Cos cu lo no tin mester di dje mas den Dios su mundo nobo