Pakico Mester di Polis?

CON bida lo tawata si no tawatin polis? Wel, kico a sosode na 1997 den e stad Recife na Brasil ora cu 18.000 agente policial a declara welga, lagando mas ku un miyon habitante sin polis?

“Den cinco dia caotico na e metropolis aki canto di lama, e cantidad di asesinato a bira triple”, The Washington Post a informa. “Nan a atraca ocho banco. Gangnan a comete un serie di actonan violento den un centro comercial y tawata core door di barionan di hende rico tirando cu scopet. Y ningun hende no ta obedece leinan di trafico. . . . E ola di criminalidad a causa un cantidad di morto cu casi a surpasa e capasidad di e cas mortuorio y el a inunda e hospital mas grandi di gobierno, caminda victimanan di bala y hincamento ta drumi abou riba flur den gang.” Segun informe e minister di husticia a bisa: “E tipo di kibramento di lei aki tawata algo nunca bisto akinan.”

No ta importa unda nos ta biba, maldad ta djis bou di e capa superficial di civilisacion. Nos mester di proteccion policial. Claro cu mayoria di nos a yega di tende tambe di brutalidad, corupcion, indeferencia y abuso di poder di parti di algun agente policial. E seriedad di e incidentenan aki ta varia di un pais pa otro. Pero kico nos lo a haci si no tawatin polis? No ta berdad cu polis hopi biaha ta rindi servicionan balioso? Spierta! a puntra algun agente policial den diferente parti di mundo dicon nan a scohe e carera aki.

Un Servicio na Bienestar di Comunidad

“Mi gusta yuda hende”, Ivan, un polis Britanico, ta bisa. “E variedad den e trabou a atrae mi. Por lo general hende no ta realisa cu atende crimen ta solamente 20 pa 30 porshento di trabou di polis. E ta mas un servicio na bienestar di comunidad. Durante un dia normal riba patruya, lo mi por atende un morto repentino, un accidente di trafico, un crimen y un persona di edad tur confundi cu mester di yudansa. Loke specialmente ta duna bo satisfaccion ta ora bo hiba un mucha perdi bek pa su mayornan of yuda un victima di crimen purba supera su trauma emocional.”

Stephen ta un expolis na Merca. E ta bisa: “Como polis, bo tin e recursonan y e tempo pa duna e miho yudansa ora hende acudi na bo sinseramente pa asistencia. Esei ta loke a atrae mi na e trabou. Mi kier tawata disponibel pa yuda hende y hiba nan carga pisa. Mi ta sinti cu te na cierto grado mi a yuda proteha hende di criminalidad, pasobra mi a aresta mas cu 1.000 hende den cinco aña. Haya mucha cu a perde, yuda pashentnan di Alzheimer cu a dual y recupera vehiculonan horta, tur ta cosnan cu a duna mi satisfaccion. Anto tambe tin e excitacion di busca y gara sospechosonan.”

Roberto, un polis na Bolivia, ta bisa: “Ami kier a yuda hende den emergencia. Na mucha mi tawata admira polis pasobra nan tawata proteha hende di peliger. Na principio di mi carera mi tawata encarga cu patruyanan na pia den centro di ciudad, caminda tawatin oficinanan di gobierno. Casi tur dia nos a trata cu demostracionnan politico. Mi trabou tawata pa evita cu e situacion lo a bira violento. Mi a ripara cu si mi tawata amigabel y rasonabel cu e lidernan di e demostracion, mi por a evita violencia publico cu lo por a causa daño na hopi hende. Esei tawata algo cu a duna mi hopi satisfaccion.”

Polis ta rindi un gran variedad di servicio. Nan a yega di atende situacionnan cu ta varia for di trata na baha un pushi fo’i palo te na libra rehennan for di man di terorista y confronta atracadonan di banco. No obstante, for di tempo cu nan a cuminsa cu cuerpo di polis moderno, el a duna hende speransa y tambe miedo. E siguiente articulo ta splica dicon.

[Plachinan na pagina 2, 3]

Pagina 2 y 3: Dirigiendo trafico na Chengdu; polis antidisturbio di Grecia; agentenan policial na Sur Africa

[Reconocemento]

Linda Enger/Index Stock Photography

[Plachi na pagina 3]

Negoshi cu hende a plunder durante un welga di polis na Salvador, Brasil, juli 2001

[Reconocemento]

Manu Dias/Agência A Tarde

[Plachi na pagina 4]

Stephen, Merca

[Plachi na pagina 4]

Roberto, Bolivia