PREGUNTA 7

Con Mi Por Trata cu e Presion pa Haci Sex?

DICON TA BON PA BO SA?

E decision pa tene relacion sexual of no, lo tin un efecto grandi riba bo futuro.

**KICO ABO LO HACI?**

Imagina bo e siguiente escena: Heather y Mike tin dos luna so cu nan ta date otro, pero Heather ta sinti cu e conoce Mike pa hopi tempo caba. Nan ta manda mensahe pa otro constantemente, nan ta papia cu otro tin biaha pa oranan largo na telefon y hasta nan ta caba otro su frase. Pero awor Mike kier mas cu djis papia so.

Durante e ultimo lunanan aki, Mike y Heather a djis tene man di otro y sunchi otro un tiki. Heather no kier bay mas aleu cu esey. Pero e no kier perde Mike tampoco. Niun hende no ta lag’e sintie asina bunita y special manera Mike. E ta bisa den su mes: Ademas, ami y Mike ta stima otro ...

Si bo ta suficiente madura pa date y bo ta den e mesun situacion cu Heather, kico abo lo haci?

PARA KETO Y PENSA

Nan ta uza un paña bunita pa haci limpi — Relacion sexual ta un regalo di Dios pa hende cu ta casa so. Si bo tene relacion sexual prome cu matrimonio, bo ta haci mal uzo di e regalo ey. Esey ta mescos cu si bo uza un paña hopi bunita cu bo a haya como regalo pa limpia cas cu ne

Si bo ignora un ley di naturaleza, por ehempel e ley di gravedad, lo bo sufri e consecuencianan. Mescos tambe lo sosode si bo ignora un ley moral, manera: “Abstene di fornicacion.”—1 Tesalonicensenan 4:3.

Kico ta e consecuencianan di desobedece e mandamento ey? Bijbel ta bisa: “Esun cu ta practica fornicacion ta peca contra su mes curpa.” (1 Corintionan 6:18) Con asina?

Estudionan a saca na cla cu hopi hoben cu a haci sex prome cu matrimonio mayoria di biaha a haya nan cu un of mas di e siguiente consecuencianan:

REMORDIMENTO. Mayoria di e hobennan cu a haci sex prome cu matrimonio ta bisa cu ta duel nan cu nan a haci esey.
DESCONFIANZA. Despues di tene relacion sexual, nan por cuminsa pensa: Cu ken mas lo el a haci sex?
DECEPCION. Hopi mucha muher lo prefera un mucha homber cu lo proteha nan y no probecha di nan. Anto hopi mucha homber ta sinti nan mes menos atrai na un mucha muher cu ta cay pa nan mucho lihe.
E punto ta: Si bo tene relacion sexual prome cu matrimonio, bo ta rebaha bo mes pasobra bo ta perde algo precioso. (Romanonan 1:24) Bo curpa ta demasiado valioso pa bo entreg’e na ken cu ta.

Demostra cu bo ta determina pa “abstene di fornicacion.” (1 Tesalonicensenan 4:3) Anto, si bo casa un dia, bo por tene relacion sexual y haya e placer cu esey ta trece cu ne. Lo bo no tin nodi preocupa, lamenta of sinti bo insigur, locual hopi hende ta experencia despues cu nan a haci sex prome cu matrimonio.—Proverbionan 7:22, 23; 1 Corintionan 7:3.

KICO BO TA PENSA?

Un hende cu di berdad ta stima bo lo kier haci bo un daño fisico y emocional?
Un hende cu di berdad ta interesa den bo lo hinca bo den tentacion pa perhudica bo relacion cu Dios?—Hebreonan 13:4.