Hobennan Sa Puntra . . .

Kico Tin di Malo den Sex via Telefon?

“SEX VIA TELEFON a remplasa carta di amor como e medio preferi di comunicacion romantico entre parehanan cu ta leu for di otro”, segun un revista Mericano bon conoci.

Kico ta sex via telefon? E ta encera papia y scucha cosnan erotico via telefon.a Hopi bes esnan cu ta participa den e practica aki, ta masturba pa satisface nan deseo sexual. Sea e combersacion obsceno ta tuma luga entre parehanan cu ta enamora di otro of hende straño, sex via telefon ta hopi popular y esei ta motibo di precupacion. De echo, algun hende ta defend’e publicamente.

Un señora a bisa: “Esei ta e sex di mas safe.” Aparentemente, hopi hende ta di acuerdo cu ne. Por ehempel, den october 2000, como reaccion riba un aumento di infeccion di HIV, un grupo di experto Ruso riba tereno di salu a uza propaganda di corant pa promove sex via telefon.

Sinembargo, otro hende ta promoviendo sex via telefon puramente pa gana placa. Na Merca so caba servicionan di sex via telefon—caminda hende ta paga pa tende cosnan obsceno—a bira un industria di mil miyon dollar.

Pakico exactamente e practica aki a bira asina popular? E buki The Fantasy Factory ta bis’e asin’aki: “Contacto intimo, tanto fisico como emocional, ta peligroso. Tin riesgonan fisico di enfermedad transmiti sexualmente, e riesgo di daña imagen personal/profesional si e contacto intimo sali na cla, miedo di ser condena door di otro hende y tin tambe e consecuencianan di deseo ‘abnormal.’ Sex via telefon ta baha e riesgo.”

Ta berdad cu sex via telefon no ta encera contacto fisico cu un otro persona. Pero esei kiermen cu no tin nada malo den dje of cu no tin ningun peliger ni riesgo cu ne?

Sex via Telefon Ta Algo Inofensivo?

Deseo sexual ta specialmente intenso durante hubentud. Bijbel ta yama e periodo aki durante cua deseo sexual ta mas fuerte cu nunca e ‘flor di hubentud.’ (1 Corintionan 7:36) Durante e tempo crucial aki den bida, un hoben cristian mester siña “con pa tene su mes curpa den santificacion y honor.” (1 Tesalonicensenan 4:4) Esei ta nifica cu bo tin cu siña con pa anda cu bo deseonan sexual y domina nan. Si bo kier tin un punto di bista saludabel y balansa di sex, esaki ta masha importante.

Sinembargo, sex via telefon ta siña hende pa satisface nan impulsonan sexual, en bes di domina nan. Mas cu esei, e ta promove un punto di bista degrada y troci di e persona di sexo opuesto. Bijbel ta siña cu ta entre hende casa so por tin intimidad sexual. (Hebreonan 13:4) Pero sex via telefon ta anima hobennan pa experimenta cu placer sexual pafo di matrimonio. Bijbel ta siña cu berdadero felicidad ta bini for di duna—no di ricibi. (Echonan 20:35) Pero sex via telefon ta siña bo uza otro hende como un medio pa haya satisfaccion sexual. Bijbel ta siña parehanan casa pa desaroya berdadero intimidad door di cultiva amor y confiansa mutuo. (Efesionan 5:22, 33) Sinembargo, sex via telefon, ta promove indiferencia y e idea di keda anonimo.

Un Adiccion Perhudicial

Corinto di antiguedad tawatin e fama di tawata un stad di bicionan inmoral. Cu bon motibo anto, apostel Pablo a skirbi e cristiannan ei: “Mi tin miedo cu, mescos cu e colebra a gaña Eva cu su astucia, boso mentenan lo wordo desvia for di e debocion simpel y puro na Cristo.” (2 Corintionan 11:3) Sex via telefon ta un di e medionan cu Satanas e Diabel ta uzando pa corumpi hobennan djawe.

Pa algun hoben, yamamento di liñanan di sex a bira un adiccion incontrolabel. E ehempel di un yoncuman cu nos lo yama Jim ta demostra con “adicto” un hende por bira. Jim a mira e number di un liña di sex via telefon riba un borchi di propaganda. El a memorisa e number y despues, curiosidad a pon’e yama e number. Su yamadanan na e number a bira mas y mas frecuente. No a tarda mucho cu el a acumula un debe di telefon di 600 dollar!

Stimulacion di deseo sexual mientras cu bo no ta casa ainda ta bai contra di e Palabra di Dios. E ta haci un apelacion fuerte riba nos: “Considera e miembronan di boso curpa terenal como morto pa inmoralidad, impuresa, pasion [y] deseo malo.”—Colosensenan 3:5.

E Peligernan den Enamoracion

Kico di adultonan hoben cu ta enamora otro seriamente? Claro cu ta masha normal pa hende cu stima otro desea di expresa nan sintimentonan pa cu otro. Den tempo di Bijbel, un mosa temeroso di Dios a bisa relaciona cu su comprometido: “Mi ta di mi stima, y su deseo ta pa mi.” (Cantica di Salomon 7:10) Segun cu e dia di casamento ta acerca, no tin nada malo pa un pareha comprometi papia di cierto asuntonan intimo. Pero sex via telefon ta un manera safe pa expresa sintimentonan romantico?

No. Asta parehanan comprometi ta obliga pa sigui e conseho di apostel Pablo: “No laga inmoralidad of cualkier sorto di impuresa of golosidad ni wordo menta mes meimei di boso, manera ta pas pa santonan, ni sushedad, ni papiamento di co’i loco, ni chansanan vulgar, cu no ta pas, ma mas bien duna gradicimento. Pasobra esaki boso sa cu siguridad, cu ningun fornicado, persona impuro of hende cudicioso, cu ta un adorado di dios falso, no tin herencia den e reino di Cristo y Dios.”—Efesionan 5:3-5; Colosensenan 3:8.

Papiamento intimo cu deliberadamente ta lanta pensamentonan inmoral of cu ta pone un hende masturba, obviamente, ta impuro den bista di Yehova. Y esei por hiba na violacionnan asta mas serio di principionan biblico. Por ehempel, dos hende cu tawata biba leu for di otro tawata enamora di otro. Den principio nan tawata uza nan frecuente combersacionnan via telefon como un medio pa conoce otro. Pero, no a tarda mucho cu nan a cuminsa papia riba cosnan inmoral. Nan combersacionnan a bira mas y mas explicito, bayendo den detaye. Nada straño anto cu ora cu finalmente nan circunstancianan a permiti nan pa ta hunto, no a dura hopi pa nan a cai den conducta inmoral.

Sin duda, si nos kier agrada Dios nos tin cu haci tur nos esfuerso pa evita di cai den e trampa di sex via telefon. Con nos por logra den esei?

‘Golpia Bo Curpa’

Sex via telefon por bira un adiccion. Nos tin cu ‘golpia nos curpa y hacie esclabo’ pa por haya e aprobacion di Yehova. (1 Corintionan 9:27) Si bo ta yamando liñanan di sex actualmente, pakico no busca yudansa? Lo ta bon pa cuminsa na bisa bo mayornan cristian. Claro cu nan por rabia cu bo. Pero tambe nan por ta den e miho posicion pa yuda bo controla bo comportacion pa bo no sufri un recaida. E ancianonan den bo congregacion local di Testigonan di Yehova tambe lo ta dispuesto y lo por yuda bo.

Si bo ta enamora, sea determina pa keda limpi, asta ora bo ta papia na telefon. Un mucha mohe cristian comprometi cu yama Leticia ta bisa: “Ami cu mi enamorado hunto a lesa articulonan basa riba Bijbel encuanto con pa keda decente. Nos ta masha gradicido pa e manera cu esakinan a yuda nos mantene un consenshi limpi.” Tuma curashi y cambia di tema ora boso combersacion cuminsa bai den direccion di cosnan indecente. Papia cu otro tocante e necesidad pa tene boso combersacionnan limpi.

Den algun pais, anochi laat television ta pasa propaganda pa sex via telefon. Podise ta miho pa bo simplemente evita di wak television anochi laat. Siendo cu masturbacion lo lanta pensamentonan inmoral en bes di core cu nan, ta vital pa bo evita e practica sushi aki.b Bo por logra saca pensamento impuro for di bo mente door di consentra riba cosnan recto. (Filipensenan 4:8) Asocia cu amigonan cu ta uza abla saludabel, y lesa e Palabra di Dios y publicacionnan cristian diariamente pa fortifica bo determinacion. Den e manera aki lo bo no laga espacio pa fantasianan inmoral drenta den bo mente y corumpie. Y mas importante cu tur cos, resa pidi Dios yudansa. Apostel Pedro a skirbi: “[Tira] tur boso precupacion riba dje, pasobra e ta percura pa boso.”—1 Pedro 5:6, 7.

Un mosa cristian di Brazil a bisa: “E presion riba hobennan pa haya nan envolvi den sex ilicito ta hopi fuerte.” Sinembargo, Yehova sa di e retonan cu bo por haya bo cu ne. Sea sigur cu lo e duna bo tur e yudansa cu bo tin mester pa bo keda limpi den su bista.—Efesionan 6:14-18.

[Nota]

[Plachinan na pagina 20, 21]

Tanto sex via telefon como cybersex ta birando popular

[Plachinan na pagina 20, 21]

Parehanan cu ta enamora mester tene cuidou pa nan combersacionnan no bira impuro

[Plachi na pagina 22]

Bo por fortalece bo determinacion pa keda limpi door di lesa Bijbel y publicacionnan cristian