Kico Bijbel Ta Bisa Tocante Pornografia? Tin Algo Malo den Cybersex?

E contesta cu Bijbel ta duna

Bijbel no ta menciona pornografia, cybersex of otro tipo di practicanan asina specificamente. Sinembargo, Bijbel ta mustra bon cla kico Dios ta pensa di relacion sexual entre hende cu no ta casa y tambe e punto di bista robes tocante sex. Wak e siguiente textonan di Bijbel:

• “Mata e inclinacionnan di boso curpa pa loke ta fornicacion, impureza [y] pasion.” (Colosensenan 3:5) En bes di mata, esta, domina e mal deseonan ey, wakmento di pornografia ta stimula nan. E ta haci un persona bira impuro den bista di Dios.

• “Ken cu sigui wak un muher cu pasion, ya caba a comete adulterio cu ne den su curason.” (Mateo 5:28) Ora un hende ta wak imagen di actonan sexual inmoral, esey por lanta mal pensamento y pon’e bay haci net e cosnan ey.

• “No menciona fornicacion ni ningun sorto di impureza ni golosidad mes meymey di boso.” (Efesionan 5:3) Pues, si no ta bon pa papia tocante cosnan inmoral, e ora ey nos no mester wak ni lesa e cosnan ey tampoco.

• “E obranan di carni ta bisto, y nan ta fornicacion, impureza, ... y cosnan por estilo. Mi ta spierta boso di antemano tocante e cosnan aki, manera mi a spierta boso caba, cu esnan cu ta practica e tipo di cosnan ey lo no ricibi e Reino di Dios.” (Galationan 5:19-21) Dios ta considera hende cu ta wak pornografia of practica cybersex, sex via telefon of sexting moralmente impuro. Si nos ta practica e cosnan aki, nos por perde Dios su aprobacion completamente.