E Evento di Balon di Mas Grandi na Mundo!

TUR aña den october, durante nuebe dia largo e stad Albuquerque, New Mexico, na Merca, ta confronta un problema unico den trafico. Chauffeurnan ta cuminsa core pocopoco of para pa mira gruponan grandi di balon di colo briyante cu ta yena e shelo sin nubia den herfst. Esaki ta e Fiesta Internacional di Balon di Kodak Albuquerque cu ta tuma luga tur aña, y mas cu 800.000 bishitante ta bin pa experenci’e.

Ta facil pa compronde dicon trafico ta cuminsa core pocopoco. Imagina bo e espectaculo! Centenares di balon—por lo general di 15 pa 25 meter halto—ta subi pareu den e aire friu y refrescante di mainta, anto caba nan ta zweef crusa e riu Rio Grande y pasa bai riba e stad Albuquerque segun cu biento ta pusha nan suavemente. Den fondo, e Seronan Sandia pintoresco di 3.000 meter halto ta completa e panorama impresionante aki.

E festival a gosa di un crecemento fenomenal for di tempo cu el a cuminsa riba un parkeerplaats na 1972 cu solamente 13 balon. Ya pa 1978, cu 273 team participante, el a bira e evento di balon di mas grandi na mundo. Na aña 2003, mas cu 720 balon a participa. Teamnan di balon a bini di hopi estado Mericano y for di mas o menos 20 pais mas. Representantenan di medionan di comunicacion di decenas di organisacion, hunto cu masha hopi sacado di potret mes a contribui na e fiesta su reputacion di ta “e evento mas fotografia na mundo.” Na aña 2000, como parti di e celebracion di e milenio nobo, mas cu 1.000 balon a participa, locual ta un 20 porshento di tur balon cu tin na mundo.

Con e Balonnan Ta Funciona

Gran mayoria di e balonnan na e fiesta ta subi bai laira door di aire cayente keinta door di brandernan di gas propano cu tin na boca di e balon. E saconan di e balon ta traha di tela sintetico hunta cu un tipo di wax poliuretano pa evita cu e ta lek aire. Na cada balon nan ta pega un macutu, of gondola, cu ta carga e piloto y mas pasahero. Nan ta pomp un balon den dos etapa. Prome, un fan grandi ta supla aire fresco den dje segun cu e ta plat gespan abou riba suela. Caba, un brander di gas propano ta supla aire cayente den e saco parcialmente yen. E aire cayente ta hisa e balon na laira, pero e ta keda firmemente mara na suela cu cabuya te ora cu e piloto ta cla pa subi. Unabes e balon ta den laira, e piloto por lag’e subi door di sende e brandernan y agrega mas aire cayente. Pa baha, e ta djis laga e aire fria, of e por habri un ventil den top di e balon y laga aire cayente sali.

Na e festival, e balonnan di aire cayente normalmente ta carga suficiente gas propano pa keda un par di ora den laira, por lo general na un haltura di menos cu 600 meter. Pesei, e tripulantenan di balon—incluso nan team cu ta sigui nan riba tera—mester keda alerta pa haya luganan safe pa nan aterisa. E piloto y su team ta busca terenonan habri caminda no tin waya di coriente y cu ta leu for di cayanan druk.

Algun di e balonnan na e festival ta yena cu gas helio of hidrogeno. Distinto for di balon di aire cayente, e balonnan aki yena cu gas por keda dianan largo den laira. Tripulantenan di balon di gas ta competi pa wak ken por bula mas leu, y ta zweef na un haltura di 3.000 pa 4.500 meter.

Bo no por echt stuur un balon. Mas bien, nan ta zweef bai den e direccion cu biento ta supla nan. Pero un piloto cu experencia por controla su rumbo door di bai mas halto of baha mas abou pa cohe cierto coriente di aire cu ta supla den e direccion desea. Relaciona cu esaki, Albuquerque ta ideal pa bula cu balon. E seronan rond di e stad y e vaye di e riu ta forma loke nan ta yama e Caha di Albuquerque; un combinacion di patronchinan di biento cu ta causa bientonan di nivel abou cu ta pusha e balonnan den un cierto direccion y bientonan di nivel ariba cu ta trece nan bek den e direccion contrario.

Un Evento Excitante

Mas cu 2.000 boluntario ta coopera pa e festival por ta un evento exitoso y safe. Tin un balloonmeister kende ta un funcionario encarga pa cordina e evento complica aki. Su trabou di dirigi e subida di centenares di balon ta casi manera maneho di un aeropuerto druk. Djis imagina e esena! Na momento di bai halto, e gran variedad di colo y formanan creativo ta emociona tanto mirones adulto como e muchanan cu ta keda wowo hancho habri. Wak! Ata un balon den forma di un dori, un otro manera un beer, y ata un manera un coneu! Ata un baby dinosauro, un baca gigante cu ta zweef, dos porco, un pisca di acuario cu yama Sushi, un bleki refresco inmenso den laira, un lars di cowboy, un troshi di promente cora, y hopi, hopi forma mas.

Mirando un cantidad asina grandi di colo y diseño contra e shelo blou, realmente lo por pone un fotograf bira loco loco! Y anochi ta trece un otro bista magnifico; e shelo cu ta birando scur ta yen di centenares di balon, den cua cada un su brander ta briya manera un bela den un lanterna di papel.

Masha poco di nos kisas lo mira e fiesta di balon aki of lo tin e experencia excitante di bula den un balon. Pero segun cu bo ta wak e potretnan riba e paginanan aki, bo por a lo menos duna rienda suelta na bo imaginacion y lag’e subi bai laira den e shelo di herfst cu tin riba Albuquerque.

[Plachinan na pagina 24]

1. Cada balon mester tin un team riba tera, por lo general di cuater pa ocho hende

2. Un brander di gas propano ta supla aire cayente pa e balon subi

3. Anochi e briyo di e balonnan ta crea un dushi ambiente

4. Un variedad di diseño di balon

[Reconocemento]

Potretnan 1 y 2: Raymond Watt/Albuquerque International Balloon Fiesta