Dicon Ta Bon pa Cana?

MIYONES di hende aparentemente ta pensa cu si nan no por bira miembro di un gym y dedica hopi tempo na ehercicio, nan por bien lubida cu nan lo por haya e beneficionan di ehercicio. Pero esei no ta berdad. Dr. Russell Pate di Universidad di South Carolina a bisa: “Mi ta kere cu oficialmente nos tin cu aproba e idea cu ta masha bon mes pa despues di come bo haci un caminata dushi y comodo rond di bo blok.”

Pero di berdad un caminata lo ta dje bon ei pa bo? Canamento tin beneficio pa salu cu ta realmente importante?

Canamento Ta Bon Remedi

E docter Griego Hipocrates a considera canamento como “e miho remedi pa hende.” De echo, tin un dicho ta bisa: “Mi tin dos docter, mi pia robes y mi pia drechi.” Di berdad canamento ta dje bon ei pa salu?

Wel, algun estudio ta indica cu hende cu ta cana riba un base regular lo por haya menos malesa cu hende cu ta sinta hopi. E estudionan ta mustra cu canamento ta reduci e riesgo di haya malesa di curason y stroke (hersenbloeding). E por preveni diabetes door di mehora e curpa su habilidad di uza insulina. E ta mantene e wesonan fuerte, y asina evita osteoporosis. Canamento ta laga un hende desaroya forsa, flexibilidad y resistencia. E ta yuda pa perde peso y tambe pa mantene peso. Ademas, canamento ta laga bo drumi mas miho, e ta mehora funcion mental y por asta yuda combati depresion.

Segun informe, algun aña pasa investigadonan na Universidad di Southern California a descubri cu un caminata di 15 minuut por duna mas alivio di ansiedad y tension cu un trankilisante suave! Mescos cu otro actividadnan fisico, canamento ta stimula produccion di endorfin—kimiconan celebral cu ta alivia dolor y stimula relahamento—y di e manera ei ta produci un sintimento di trankilidad y bienestar.

Segun The Medical Post di Canada, asta un caminata trankil por produci beneficio pa salu. Un estudio publica den e revista The New England Journal of Medicine ta revela cu cana asta un distancia cortico di 800 meter pa dia por reduci e tasa di mortalidad. Estudionan resien ta indica cu haci ehercicio tres biaha pa dia, durante 10 minuut cada biaha, lo tin casi mesun beneficionan cu si bo haci ehercicio pa 30 minuut tras di otro. Pues podise bo por considera pa parker bo auto mas leu for di bo destinacion y cana e resto di e caminda. Of lo bo por haci un caminata cortico durante dia.

Lo bo tin beneficio mas grandi si bo cana duro. Dr. Carl Caspersen di e Centro Mericano pa Combati y Preveni Enfermedad, na Atlanta, Georgia, a bisa: “Si bo cambia di un bida di sinta hopi pa cana duro pa mei ora varios biaha pa siman, esei por reduci bo riesgo [di haya malesa] drasticamente.” Y loke ta asina bon di canamento ta cu hende di tur edad y practicamente tur tipo di salu por hacie. Ademas, canamento no ta rekeri entrenamento special ni habilidad atletico; unico cos cu bo mester ta un bon par di sapato.

Disfruta di un Bon Caminata

Bisti paña comodo y cu no ta preta. Si ta friu, bisti varios paña riba otro cu bo por kita facilmente. Uza sapato flexibel cu no ta pisa hopi y cu tin un hilchi plat cu manera cusinchi aden y percura pa bo tenchinan tin suficiente luga. Bo sapato of kets mester ta un tiki mas grandi cu bo sapatonan normal. Si bo tin pensa di cana mas cu mei ora y lo no tin caminda pa bebe awa riba bo ruta, lo ta bon pa bo bai cu un termo chikito cu awa. Warm up door di cuminsa cana e prome cinco minuutnan na un paso trankil. Tene bo curpa recht y bo elleboog- y rudianan un poco dobla y bo mannan un tiki sera pero no sera bo mokete.

Despues cu bo a warm up, cana na un paso natural y lihe den cua e hilchi di bo pia ta esun prome pa mishi cu suela, anto primi henter bo pia abou te na bo tenchinan. Ta pesei bo sapatonan mester ta flexibel. Tur esaki ta parce mucho hopi cos pa corda? Keda trankil, mayoria hende di naturalesa ta cana asina. Bo velosidad mester permiti bo hiba un combersacion sin perde rosea. Si ta awor bo ta bai cuminsa cana, aumenta bo tempo, distancia y velosidad gradualmente. Fria bo curpa door di baha bo velosidad ora bo ta serca di yega na final di bo caminata.a

Ta normal pa bo ritmo di curason y di hala rosea subi ora bo ta haci esfuerso, y tambe cu bo ta cuminsa soda suave- te moderadamente. E prome dianan kisas bo musculonan lo haci un poco dolor. Paga tino na e manera cu bo curpa ta reacciona. Si bo ta sinti cu bo ta haciendo demasiado esfuerso, baha bo velosidad of tuma un pauze cortico. Sinembargo, si bo sinti un presion of dolor den pecho, batimento di curason, casi bo no por hala rosea, biramento di cabes of di stoma, stop di cana y busca yudansa medico mesora.b

Como cu canamento no ta sagudi bo curpa hopi, definitivamente e ta mas miho cu actividadnan manera coremento y aerobics. Y como resultado, bo tin menos chens di lesiona bo scarnir- of musculonan. De echo, canamento ta e actividad number un cu expertonan di bon condicion ta recomenda. Pesei pa bo bienestar, dal un cana!

[Nota]

[Cuadro na pagina 27]

ALGUN CONSEHO PA CANAMENTO

● Cana recht, cu bo cachete na laira (paralelo cu suela), y wak un seis meter bo dilanti

● Mantene un velosidad modera. No sinti cu bo tin cu cana asina duro cu bo no tin rosea pa combersa normalmente

● No dal stapnan mucho largo. Pa mas velosidad, dal stapnan mas lihe y mas cortico

● Move bo brasanan di dilanti bai patras, cu bo elleboognan pega na bo curpa. Evita di zuai bo brasanan di un banda pa otro

● No pone bo pia plat abou. Baha riba bo hilchi y primi henter bo pia abou y pusha e siguiente stap cu bo tenchinan

● No sinti bo obliga na cana cu peso. Esakinan por desbalansa bo movementonan natural di cana y por verrek musculo y cabuya di bo scarnirnan