Mas y Mas Famia cu un Mayor So

“Hopi anochi mi tawata resa cu awa na wowo y bisa Dios: ‘Mi no sa kico pa haci mañan.’”—GLORIA, UN MAMA SOLTERO CU TIN TRES YIU.

FAMIA cu un mayor so a bira un fenomeno permanente y notabel den hopi sosiedad awe.a Expertonan cu ta studia cambio den poblacion y sociologonan na hopi parti di mundo ta puntra nan mes ta con bin e structura di e famia tradicional cu ta consisti di esposo, esposa y yiunan a ser remplasa pa otro formanan di bida di famia.

E profesornan di sociologia, Simon Duncan y Rosalind Edwards, ta remarca cu tin “cambionan di largo alcanse ta tumando luga den e areglonan di famia y den e manera cu homber y mohe ta trata otro.” Dicon? Segun algun observado, esaki ta resultado di e manera cu hende ta scohe pa hiba nan bida den un ambiente caminda tin cambionan economico, cultural y social.

Laga nos considera algun di e cambionan aki y tambe e manera cu hende ta dirigi nan bida. Presion di bida ta un factor principal cu ta influencia bida di hende. Loke ta sosode pafo di cas ta afecta miembronan di e famia for di ora nan lanta mainta te ora nan bai drumi. Tempo cu antes nan tawata dedica na actividadnan di famia, awor nan ta dedica na Internet, dilanti television, na telefon, den auto y moviendo di un actividad pa otro.

Presion economico tambe tin su influencia. E bida comodo djawe ta costa placa, pesei mas y mas mayor ta traha. Como parti di un sosiedad den cua hende por move facilmente, hopi miembro di famia ta biba y traha leu for di e otro miembronan di famia cu por duna nan yudansa, y den algun caso asta e casanan ta biba y traha leu for di otro. Y den hopi pais, pelicula, musica y otro entretenimento popular ta haci e cos piyo, ya cu hopi bes nan ta promove menosprecio pa net e institucionnan, manera matrimonio y famia, cu ta duna un sentido di stabilidad.b

E Mama Soltero Moderno

E mama soltero di awendia no necesariamente ta cuadra cu e concepto bieu di ta un teenager soltero cu ta biba di onderstand. Awendia si bo ta un mama cu no ta casa, esei no ta un berguensa mas manera antes. Al contrario, streyanan di farandula cu ta sirbi como role model ta asta promov’e como algo ideal. Ademas, hopi hende mohe tin mas educacion cu antes y nan ta den miho condicion pa percura pa nan mes—pues si nan kier bira mama, nan no tin nodi casa pa motibonan financiero.

Algun mama soltero, specialmente adultonan cu a bini di mayornan diborcia, ta keda soltero pasobra nan no kier pa nan yiunan sufri e dolo di wak un di nan mayornan bandona e famia. Tin otro hende mohe cu ta bira mama soltero sin cu ta nan mes a scohe esei, mas bien ta nan casa ta bandona nan. Segun e Fundacion Joseph Rowntree di Gran Bretania: “Por lo general no ta e persona mes ta scohe egoistamente pa e ta un mayor soltero, ni no ta asina cu e yiunan di un famia cu tin un mayor so ta muchanan neglisha cu no ta haya disiplina.”

Sinembargo, e echo cu tin hopi famia cu un mayor so ta un motibo di precupacion pasobra mayornan soltero y nan yiunan por haya nan cu tension emocional, necesidad economico y desbentahanan social. Algun hende kisas ta duda cu un mayor so por lanta su yiunan bon. Kico ta algun di e problemanan particular cu famianan cu un mayor so por haya nan cu ne? Con un cristian por logra cumpli cu e tarea di cria yiu como un mayor soltero?

[Nota]

[Cuadro na pagina 4]

Algun Clarificacion

Rond mundo nan ta uza varios expresion pa describi mamanan cu ta lanta nan yiunan nan so. Den cierto paisnan nan ta uza e expresion “mama soltero” pa referi solamente na mamanan cu no a casa nunca. Sinembargo, tin tambe otro mamanan cu ta lanta nan yiunan sin un partner masculino. Esakinan por ta mamanan cu a diborcia, separa of cu a bira biuda.

Den e serie di articulo aki nos ta uza e expresionnan “un mayor so” y “mama soltero” pa referi na mayornan cu ta cria nan yiunan sin un casa.

[Cuadro/Mapa na pagina 4, 5]

MAYOR SOLTERO—UN TENDENCIA DEN HOPI PAIS

Merca: “Di 1970 pa aña 2000, e cantidad di mama soltero a aumenta di 3 miyon pa 10 miyon; durante e mesun lapso di tempo, e cantidad di tata soltero tambe a aumenta di 393.000 pa 2 miyon.”—Oficina di Censo di Merca.

Mexico: Segun e corant La Jornada, rond di 27 porshento di tur embaraso den e pais ta di mamanan teenager.

Irlanda: E porsentahe di hogarnan cu un mayor so a aumenta di 5,7 na 1981 pa 7,9 porshento na 1991. “Matrimonionan kibra ta keda un factor masha importante cu ta contribui na e cantidad di mama soltero.”—Single Mothers in an International Context, 1997.

Gran Bretania: “Pa prome bes e cantidad di famia cu un mayor so, a pasa 25 porshento di e totalidad di famia. Esei ta mustra un aumento drastico den e cantidad di mamanan cu no a casa nunca y un aumento significativo den e porsentahe di diborcio atrabes di e ultimo 30 añanan aki.”—The Times, Londen, 2 di maart 2000.

Francia: “Desde final di añanan ’70 di siglo 20, e porsentahe di famia cu un mayor so a aumenta cu mas cu 50 porshento.—Single Mothers in an International Context, 1997.

Alemania: “Den e ultimo dos decadanan, e cantidad di mayor soltero a bira dobel. Casi tur famia cu un mayor so . . . ta ser dirigi door di e mama.”—Single Mothers in an International Context, 1997.

Hapon: E cantidad di famia cu ta ser dirigi door di mama so a cuminsa aumenta desde añanan ’70 di siglo 20. Na 1997, di tur e famianan, 17 porshento tawatin un mama soltero na cabes.—Single Mothers in an International Context, 1997; The World’s Women 2000: Trends and Statistics.

Grecia: “For di 1980, e cantidad di mama soltero na [Grecia] a aumenta cu 29,8 porshento. Y di acuerdo cu e cifranan di Union Europeo, na 1997 e porsentahe di yiunan cu a nace pafo di matrimonio tawata 3,3 porshento, siendo cu na 1980 e tawata solamente 1,1 porshento.”—E corant Ta Nea, Atenas, di 4 di september 1998.

Australia: Casi 1 di cada 4 mucha ta biba cu solamente un di su mayornan biologico. Generalmente esaki ta pa motibo cu e mayornan su relacion of matrimonio a kibra. Ta ser calcula cu den e proximo 25 añanan, e cantidad di famia cu un mayor so lo crece cu un porsentahe di 30 pa 66 porshento.—Bureau di Statistiek Australiano.