For di Nos Lectornan

Maternidad Danki pa e serie di articulo “Bo Mester Ta un Supermohe pa Bo Ta Mama?” (8 di april 2002) Awendia hopi hende ta kere cu mama cu ta na cas no ta mes druk cu mama cu ta traha. Boso articulo a yuda boso lectornan mira cu tur mama ta mama cu ta traha!

T. M., Merca

E prome cos cu a capta mi atencion tawata e plachi di un supermohe na pagina 2. Mi kier a lesa e articulo mesora. Siendo mama di dos yiu chikito, mi por bisa cu e articulonan a duna un descripcion realistico di e rutina diario di un mama.

C. L., Alemania

Mi ta un mucha mohe di 12 aña, y ora mi a haya e revista aki mi a les’e mesora. Awor mi ta compronde kico mi mama ta haci pa mi cu mi tata. Awor mi ta apreci’e y yud’e mas!

A. L., Merca

Dos aña pasa mi a haya un yiu homber. Prome cu esei mi tawata un predicado di tempo completo y tawata traha part-time. Como cu mi tawata anhela mi estilo di bida anterior, mi tawata sinti cu mi no ta digno di mi papel como mama. Mi tawatin mester di un confirmacion cu mi tawata haciendo bon, y esei ta loke mi a haya lesando e articulonan aki.

S. T., Italia

Poko tempo pasa mi a realisa cu mi mester traha tempo pa relaha, manera boso ta conseha. Mi a cuminsa haci esaki prome cu mi a haya e articulonan aki, y mi tawata sinti mi culpabel cu mi ta hacie. Danki cu boso a yuda mi mira cu mi no tin cu sinti mi culpabel tanten cu mi keda balansa.

C. C., Merca

Tin mama ta sinti cu nan no ta haya suficiente reconocemento pa nan trabou duro. E articulonan aki a duna nan e reconocemento cu nan merece. Mi ta mama di cuater yiu, y mi sa con dificil ta pa haya e balansa entre ser un ama di cas y traha. E echo cu Yehova a uza Salomon pa skirbi tocante mamanan cu ta traha duro, ta duna mi consuelo y ta anima mi pa sigui haci mi best.

E. S., Alemania

Mi ta mama di un yiu mohe di tres aña, y mi ta sinti mi culpabel pasobra tur ora mi ta cansa. E articulonan aki a yuda mi mira cu no ta ami so ta sinti asina, y nan a duna mi algun sugerencia hopi bon tocante kico mi por haci pa drecha mi situacion.

K. J., Merca

E portada di e revista aki ta mustra un mama cu un baby den brasa. Ta parce manera cu e baby ta comiendo un hotdog. Ami cu mi casa a caba di sigui un les di reanimacion y e instructor a bisa cu comemento di hotdog ta e causa principal di stikmento serca baby y mucha. El a pidi nos masha pa no laga mucha chikito come hotdog.

G. E., Merca

“Spierta!” ta contesta: Nos ta di acuerdo cu comemento di hotdog por pone baby y mucha chikito stik. Pero e mucha riba nos portada ta chupando un wortel den brasa di su mama.

Relato di Bida Mi a yora di goso y di tristesa ora mi a lesa e relato di bida “Apesar di Prueba, Mi Speransa A Keda Briyante.” (8 di mei 2002) Ruman Hanak su curashi na edad di 20 aña a recorda mi cu nos por confia cu Yehova ta duna asta hobennan e determinacion pa apoya su normanan husto. Danki cu boso ta sigui saca articulonan asina excelente cu ta duna nos e bon animacion cu nos mester den e tempo trabahoso aki.

K. G., Merca