Ta Safe Ainda pa Bula cu Avion?

CUATER avion grandi secuestra. Cuater accidente. Destruccion di edificionan mundialmente conoci. Television ta blo ripiti e imagen di un Boeing 767 ta dal den un di e edificionan di Twin Towers.

E atakenan di 11 di september 2001 a introduci nos den un era nobo y spantoso di agresion terorista. Teroristanan a cuminsa uza companianan di aviacion como e medio pa alcansa nan meta di mata hende, y avion a bira bom pa causa destruccion masal.

Como resultado, awor tin un tipo nobo di hende cu tin miedo di bula: Esnan cu antes tawata sinti nan mes safe, pero cu awor ta teme posibel atakenan terorista. Ademas, despues di 11 di september un serie di accidente aereo fatal cu no tawata relaciona cu terorismo a duna hopi hende mas miedo ainda di bula.

Biahamento cu avion ta un luho cu miyones di hende na mundo no por permiti nan mes. Sinembargo, tin otronan cu mester bula cu regularidad. Hende cu tin cu biaha hopi pa trabou, ta haya nan obliga di drenta avion. Misionero- y sirbidonan cristian hopi bes tin cu haci buelonan largo pa bai nan asignacion y tambe pa bin bek. Asta pa hende pober, tin biaha avion ta e unico medio di transporte durante un emergencia medico. Y miles di piloto y tripulante di avion ta gana nan pan bulando.

Hopi di e biaheronan aki, siendo kisas nervioso caba, awor tin cu calma nan casa y yiunan prome cu nan sali di cas pa bai bula. Y awor cu mester pasa den asina tanto cos pa check-in y drenta avion, na comparacion cu e sistema facil di antes, biaheronan ta puntra nan mes si ainda bula cu avion ta e manera mas deseabel pa biaha.

Pa analisa e cuestionnan aki, Spierta! a consulta cu expertonan di siguridad, personal di aeropuerto, funcionarionan di companianan di aviacion y trahadonan den mantencion di avion. Tin un cos cu nan tur aparentemente ta di acuerdo cu ne: Aunke bulamento a keda un di e medionan mas safe pa biaha, menasanan nobo ta rekeri medidanan nobo pa aumenta siguridad di e hendenan cu ta biaha.

E siguiente articulonan lo trata e problemanan cu tin y loke abo personalmente por haci pa aumenta bo siguridad y comodidad ora bo ta bula cu avion.