En Busca di Maneranan Mas Safe pa Bula

DJIS un par di siman prome cu 11 di september, Alex a sinti cu e tawata a punto di vence su miedo di bula. Segun cu e avion di pasahero cu e tawata aden a lanta buelo for di Atenas rumbo pa Boston, Alex, di 42 aña y manager di relacionnan publico di su compania, a cuminsa sinti un atake leve di panico: su curason a cuminsa bati pura y el a cuminsa soda den su man y na su frenta.

Pero e tawata sa kico e mester haci. E terapista cu tawata purba yud’e vence su miedo di bula a bis’e cu e tin cu hala rosea profundo, pensa riba un paisahe placentero y tene e man di e stul duro y lag’e los cuater biaha pa minuut. Ora cu Alex casi no por a soporta mas e turbulencia den laira y zonidonan spantoso, el a imagina cu e tawata canto di un lama trankil. “Mi a pensa cu mi a bai hopi dilanti”, Alex a declara.

Miyones di pasahero di avion tawatin miedo di bula. Ultimo añanan hopi di nan a sigui cursonan pa vence miedo di bula. Hopi bes ta miembronan di famia, doñonan di trabou y companianan di aviacion ta esnan cu a combence nan pa haci esei, ya cu nan tur tawatin motibo pa pone nan bula. Pa mayoria pasahero e lesnan tawata probechoso; hopi clinica ta gaba cu 90 porshento di esnan cu sigui e lesnan ta vence nan miedo.

Pero 11 di september a cambia tur esei. Alex a stop di bai les mesora. Y su doño di trabou a keda decepciona ora cu el a cansela tur plan pa bula bai topa un potencial cliente prestigioso. Alex a bisa: “Mi miedo di bula, combina cu atake terorista, tawata demasiado pa mi. E terapia no a prepara mi pa esei.”

Un Analisis di Medidanan di Siguridad

Biaheronan nervioso ta mustra tambe cu ta e mesun preguntanan cu sa haci pasaheronan prome cu nan drenta avion, a haci e secuestradonan dia 11 di september. Pregunta manera: “Hende cu bo no conoce a pidi bo bai cu un paki pa nan riba e buelo aki? Parti di bo ekipahe no tawata bou di bo supervision na cierto momento for di ora cu bo a paket’e te awor?” E secuestradonan sin duda a contesta mescos cu mayoria hende: “No!” Algun experto di siguridad tambe ta considera e echo cu e secuestradonan a subi avion sin problema como muestra di e fayo den control di siguridad den biahamento cu avion. Jim McKenna, exdirector di Aviation Safety Alliance, a bisa: “Niun hende ni nada por a forsa un cambio. Pero e combinacion di cuater avion secuestra y destrui cu a causa morto di miles di hende, kisas ta suficiente pa forsa e cambio ei.”

A consecuencia di e accidentenan mortal ei, henter e asunto di siguridad di aeropuerto y avion ta bou di un examinacion intenso. Na un audiencia di congreso Mericano, e inspector general di Departamento di Transporte, Kenneth M. Mead, a declara: “Apesar di medidanan di siguridad existente y nobo, toch ainda tin buraco grandi den e sistema di siguridad y algun . . . punto debil cu nos mester haci mas safe.” Kico ta ser haci pa sera e buraconan ei?

Control Riba Posibel Menasanan di Siguridad

Ora nan a puntra un funcionario di siguridad di alto rango di un compania di aviacion grandi na Merca si e tin miedo di bula, el a bisa “no” sin basila. El a splica cu e tin confiansa den e sistema di screen of controla pasahero via computer (CAPS), un sistema cu ta registra tur ticket bendi pa e companianan di aviacion cu ta uz’e. E sistema ta indica si un ticket ta cumpra na oficina dje aerolinea of na un agencia di biahe of via Internet. Ademas, e ta registra otro informacion manera si e pasahero ta bula su so of cu miembronan di famia of cu otro compañero, y tambe detayenan manera si e pasahero tin conexionnan criminal of si el a yega di comporta su mes malo cu e aerolinea of cu personal of propiedad di e aerolinea.

Kada bes cu un pasahero check-in na un aeropuerto, nan ta verifica e informacion aki y pon’e al dia cu e mas reciente informacion, incluso e persona su contesta riba e preguntanan di control. Detayenan spesifico di e informacion recompila y cua ta e metodonan cu ta ser uza pa procesa y identifica e caracteristicanan di personanan cu ta forma un menasa pa siguridad, ta keda un di e secretonan miho warda di e industria di aviacion. Rond mundo nan ta uza varios sistema paresido na CAPS, y algun ta directamente conecta cu otro agencianan gubernamental of di polis internacional, manera Interpol. Na hopi aeropuerto Europeo e sistemanan di controla paspoort por registra y sigui precis un pasahero su ruta cu avion di un pais pa otro y tambe unda y ki dia el a biaha.

E sistema aki di analisa informacion ta sali for di e punto di bista cu hendenan cu mente maligno ta un menasa hopi mas grandi cu articulonan manera ekipahe na man y maleta cu ta bai bagage. Pesei, pa mas siguridad na aeropuerto, algun compania ta uzando caba y otronan tin pensa di uza aparatonan biometrico (metodonan di identificacion cu ta uza caracteristicanan personal unico manera fingerprint, variacion di stem, etc.) y tarhetanan electronico.

Un otro precupacion grandi di siguridad na aeropuerto, fuera di identifica pasaheronan cu por forma un posibel menasa pa siguridad, ta pa evita cu articulo- y substancianan peligroso ta yega na bordo di avion. Controlnan haci cu mashin di scan tin nan limitacion. No ta facil pa personal di siguridad di aeropuerto keda atento pa periodonan largo, ya cu ta masha laf mes pa sinta wak pa oranan largo e imagennan wazig riba pantaya. Y e aparatonan di detecta metal ta keda bati alarma falso bes tras bes, detectando yabi di cas, cen larga y hesp di faha.

Leinan Mas Estricto

Pa contraresta e limitacionnan ei, gobiernonan a bini cu leinan pa haci siguridad na aeropuerto mas estricto. Na Merca, esaki ta nifica cu nan mester implementa e siguiente medidanan prome cu fin di 2002: haci sigur cu no ta bai cu maleta sin cu nan doño ta riba e buelo, inspeccion completo di tur cos cu ta bai den cabina y controla tur maleta pa mira si nan tin explosivo. Nan ta den proceso pa haci porta di cockpit mas fuerte y mas sigur. Personal di aerolineanan ta haya mas training pa ora di crisis. Y tambe nan a cuminsa uza polis federal arma riba buelonan comercial.

Den e simannan y lunanan despues di 11 di september, nan tawata listra pasahero y maleta na man den hopi aeropuerto rond mundo. Den algun caso, nan tawata haci un di dos control manual di pasahero y ekipahe di man. Biaheronan Europeo tawata conoce e tipo di precaucionnan aki caba, ya cu a implementa nan tur caminda for di e decada di 1970, tempo cu tawatin un cantidad record di secuestro di avion. Awor pasaheronan no mag subi abordo cu obhetonan skerpi y ta solamente esnan cu tin ticket por pasa control di siguridad. Hopi hende a bin custumbra cu e filanan mas largo di check-in y cu e presencia di personal militar arma na aeropuertonan.

Enfasis Riba Mantencion

Imagina e esena conoci aki: Despues di a lucha pasa door di un cantidad di control di aeropuerto, e pasahero porfin ta yega na sala di salida, en espera di e yamada pa aborda. Pero e pasahero na bachi para banda di dje ta bis’e: “B’a tende? Tin problema tecnico cu e avion.” E ta trek un cara y agrega: “Mi ta spera cu nan no ta laga nos bai cu un motor menos!”

Loke mayoria pasahero no ta realisa ta cu agencianan di aviacion tin sistemanan rigoroso y masha minusioso di inspeccion. Nan ta wak ki clase di reparacion ta necesario door di controla e avion su logboek mecanico, caminda ta registra tur buelo y detaye cuidadosamente. E agencianan ei de echo ta exigi pa drecha y mantene avion- y nan motornan a fondo segun un programa estricto—un programa hopi mas frecuente cu pa un auto—asta si e avion nunca no tawatin problema.

Un funcionario di mantencion na un compania grandi di aviacion a experencia esaki personalmente. El a bisa: “Mi tin casi 15 aña den e industria aki, y nunca mi no a mira, ni papia cu un hende cu ta traha den mantencion cu no a tuma siguridad masha na serio. Con cu bai bin, e trahado su amigo- y famianan tambe ta bula cu e avion cu e ta traha cu ne, pesei nan no ta tuma riesgonan imprudente.”

Tecniconan di avion y trahadonan di mantencion ta sinti un responsabilidad personal pisa. Un di nan ta corda: “Nunca lo mi lubida e anochi cu nos a perde un DC-10 na Sioux City, Iowa. Mi tawata traha como tecnico di avion e tempo ei, y mi trabou tawata pa inspecciona y service parti paden di e rabo di e mesun tipo di avion ei. Na e momentonan ei nos no tawata sa kico precis a pasa cu e avion cu nan a perde. Mi ta corda cu cuanto consentracion mi a haci mi trabou e anochi ei, puntrando mi mes: ‘Ta kico a pasa cu e avion ei? Acaso un hende a pasa por halto di algo cu ami lo por haya awor y asina evita un tragedia similar? Mi ta haciendo tur cos precis manera mi mester hacie?’ E anochi ei mi a keda hopi ora den e rabo, controlando y pensando.”

Tecniconan di avion constantemente ta haya training riba tur tereno di nan trabou, for di tareanan rutinario te na inspeccion hopi avansa y nan habilidad di identifica problema y soluciona nan. Tur aña nan ta actualisa e cursonan di entrenamento pa asina trata tur tipo di situacion cu nan lo por topa, for di cosnan comun y coriente te na cosnan extraordinario.

Despues di un accidente di avion, nan ta analisa tur e informacion cu nan compila y hinc’e den un simulator. Pilotonan di prueba y ingenieronan di avion ta bula e simulator pa wak ki otro posibel solucion nan por descubri, ya asina tecniconan por maneha problemanan similar miho den futuro. Ora caba, nan ta organisa un programa di training cu ta trata cu esaki pa asina nan por duna e tecniconan instruccion spesifico. E manera aki di analisa problema ta hiba tambe na cambionan den diseño di avion y partinan di avion, cu e speransa cu nan por siña for di e tipo di fayonan ei y preveni nan mas tanto posibel.

Un trahado di mantencion ta conclui: “Nan ta bisa nos tur cu ‘siguridad no ta sosode pa casualidad, mester plani’e.’”

Bulando Atrobe

Despues di un periodo di cuater luna—durante cua e no kier a bula—Alex a dicidi cu tawata tempo pa trata cu su miedo di bula. E presencia di agentenan policial y di guardia nacional na Logan International Airport di Boston aparentemente no a molesti’e, ni e filanan largo pa check-in ni e ristamento na man di su ekipahe.

Pa Alex e cosnan aki tawata señalnan cu a trankilis’e den su buskeda pa un buelo mas safe. Ainda el a soda un tiki y su curason a bati un poco mas duro, pero segun cu Alex tawata hinca su ekipahe di man den e compartimento riba su stul, el a bisa: “Mi ta sinti mi mucho mas miho awor.”

[Cuadro/Plachi na pagina 5]

Datonan di Bulamento

Segun calculo, 20% di pasahero tin miedo di bula. Sinembargo, no ta tur e hendenan aki ta haya cu bulamento no ta safe. Hopi bes nan miedo ta origina di otro fobia cu nan tin, por ehempel, miedo di haltura of di luga cu hopi hende.

[Tabel na pagina 8]

CUANTO CHENS TIN PA UN ACCIDENTE FATAL?

Vehiculo di motor 6.212 81

Asesinato 15.104 197

Causa pa mashin 265.000 3.500

Accidente cu avion 390.000 5.100

Hoga den badkuip 802.000 10.500

Bestia y mata venenoso 4,2 million 55.900

Lamper 4,3 million 56.000

[Reconocemento]

Fuente: Conseho Nacional di Siguridad

[Plachi na pagina 6]

AP Photo/Joel Page

[Plachi na pagina 7]

Kontròl i identifikashon di pasahero

[Plachi na pagina 7]

Miho mantencion

Mayor siguridad na aeropuerto

[Comentario di e plachi na pagina 7]

Control y identificacion di pasahero

[Comentario di e plachi na pagina 7]

Mihó mantenshon

[Plachi na pagina 8]

Pilotonan ta profesionalnan hopi bon entrena