Sea Conciente di Siguridad

BULA na un haltura di 11.000 meter por ta un experencia spantoso pa algun hende. E ta parce algo cu ta bai contra leinan di naturalesa. Pero cu mas y mas medida di siguridad y avionnan mas confiabel, e posibel peligernan di move rapidamente door di espacio den un aparato di metal a bira minimo. Sinembargo, de bes en cuando e realidad cruel ta recorda nos cu accidentenan por tuma luga.

Con pa Trata y Vence Miedo di Bula

Apesar di e realidad ei, hopi tempo pasa hende a expresa e deseo di bula. Un mil aña prome cu Cristo, Rei David a skirbi: “Mara mi tawatin hala manera paloma! Lo mi a bula bai.” (Salmo 55:6) Manera a keda proba caba, tecnologia moderno a haci bulamento cu avion un di e medionan di transporte mas safe cu tin. No, e no ta perfecto. Nada den e mundo aki no ta perfectamente safe. Tampoco ta posibel pa anticipa tur posibel fayo.

Ta importante pa corda esei si nos tin problema pa keda trankil ora un otro hende ta na control. Tin hende kisas ta pensa: ‘Mas mi por controla e situacion, menos spantoso lo e ta.’ Hendenan asina lo tin problema ora nan ta den situacionnan caminda nan no tin masha control, esta, si nan tin mes. Biaha cu avion ta un di e situacionnan ei.

Apesar di esfuersonan pa mehora siguridad di bula cu avion, nos no mag pasa por halto di e peligernan. Tur hende cu tin di aber cu biahamento cu avion por coopera pa minimisa e posibel peligernan di siguridad. Pero toch, autoridadnan ta spierta cu constantemente tin riesgo. Un proverbio biblico sabi ta bisa: “Un persona prudente ta premira e peliger su dilanti y ta tuma precaucion.” (Proverbionan 22:3, New Living Translation) Ta bon pa reconoce cu den casi tur actividad tin e factor riesgo. Pa pone cosnan den e perspectiva corecto, corda cu pa bula den avion bo tin cu demostra e mesun sentido comun cu lo bo a uza pa proteha bo siguridad den otro situacionnan.

Hende cu ta bula cu regularidad kisas ta miho prepara pa cuida nan curpa den e tempo dificil aki. Ta asina pasobra biaheronan frecuente ta mas familiarisa cu aeropuerto y avion cu e otro pasaheronan. Door di sigui e pasonan simpel cu tin describi den e cuadronan cu ta compaña e articulo aki, bo tambe por logra e trankilidad cu otro pasaheronan tin y sinti bo comodo na aeropuerto y den avion.

Pasa sin Problema

Aunke puntonan di control di siguridad ta util y necesario, tin pasahero—specialmente esnan cu ta pura—ta considera nan un molester. Teniendo na mente e aumento den medidanan di siguridad na mayoria aeropuerto, lo ta bon pa bo aplica e siguiente sugerencianan pa bo por pasa mas facil door di puntonan di control:

◼ Yega tempran. Plania pa bo tin algun tempo extra prome cu e ora di salida, ya asina bo por cana trankil y relaha y evita e stress cu cosnan inespera of inoportuno ta trece cu ne.

◼ Ora bo ta scohe un aerolinea, wak uno cu principalmente hende cu ta biaha pa negoshi ta uza. Nan sa e rutina caba, tin tiki ekipahe y kier move lihe.

◼ Prome cu bo pasa door di e detector di metal, kita for di bo curpa e articulonan cu bo ta pensa lo pone e alarma zona. Esakinan ta entre otro yabi, cen larga, hoya y telefon cellular. Entrega nan na e bewaker segun cu bo ta prepara pa pasa door di e detector.

◼ Pone tas y otro ekipahe na man mas plat posibel riba e mashin di scan; si e persona cu ta wak riba e pantaya mira un imagen tur bruha, kisas e ta pon’e bo saca tur cos for di bo tas of ta bolbe pas’e door di e mashin.

◼ Bisa e bewaker di antemano si bo tin un articulo straño cu bo ta kere lo hala nan atencion. Si e bewaker ta satisfecho cu un splicacion rasonabel pa e forma straño cu e ta mira riba pantaya, tin menos chens cu lo e insisti pa ristr’e. Si realmente bo tin pura, saca e articulo di antemano y pidi nan inspeccion’e na man.

◼ Si e alarma zona, sea cla pa coopera y duna un splicacion mesora. Si e bewaker sa cu ta un cos spesifico a pone e alarma zona, y tin un otro bewaker cu e palo di detecta metal, lo e manda bo serca esun ei.

◼ No haci wega tocante secuestro of un bom. Lo bo perde bo buelo sigur. Fuera di cu funcionarionan di siguridad di aeropuerto lo ristra bo cabalmente, bo por ser acusa tambe di un crimen.

Bon Biahe!

Ta posibel pa scohe un buelo safe? Claro cu si. No ta importa cua buelo bo scohe, bo tin hopi bon chens di yega sano y salvo. Si bo ta duda, wak e historia di e aerolinea cu bo tin pensa di uza. Corda cu apesar di accidentenan cu avion, bulamento te ainda ta ser considera como e manera mas safe pa biaha.

Mientras tanto, nos ta spera cu anhelo e tempo ora cu Dios ta goberna mundo y lo reina siguridad y confiansa. Den un famia humano pacifico y temeroso di Dios lo no tin luga pa ningun persona cu ta pone bida di hende na peliger. Hende “lo ta safe y sigur sin miedo di desaster.”—Proverbionan 1:33, Holy Bible—Contemporary English Version.a

[Nota]

[Comentario di e plachi na pagina 10]

Sea cla pa coopera na e puntonan di control

[Cuadro/Plachi na pagina 10, 11]

ALGUN TIP DI SIGURIDAD

Uza buelonan directo. Mayoria accidente ta sosode ora e avion ta lanta y subi, of baha y aterisa. Buelonan nonstop tin menos di e fasenan aki caminda mayoria biaha accidente sa tuma luga.

Scohe avion mas grandi. Avionnan cu tin mas di 30 asiento di pasahero por lo general ta diseña y certifica bou di reglanan mas estricto cu avionnan mas chikito. Tambe den e caso improbabel di un accidente serio, den avion mas grandi pasaheronan tin mas chens di sobrevivi.

Paga tino na e instruccionnan di siguridad duna prome cu lanta buelo. Aunke e informacion ta parce djis un ripiticion, e salidanan di emergencia mas serca kisas ta distinto, dependiendo di e avion y den cua stul bo ta.

No pone cos pisa den e compartimento riba bo cabes. E compartimentonan ei kisas lo no por carga e peso di cos pisa durante turbulencia, pesei si bo tin algo pisa cu lo bo tin problema pa hisa na laira y hinca den e compartimento, miho bo mand’e bagage na momento di check-in.

Tene bo faha di siguridad mara ora bo ta sinta. Keda cu e faha mara ora bo ta sinta ta duna bo e extra proteccion cu lo bo mester den caso cu e avion topa inesperadamente cu turbulencia.

Scucha e stewardessnan. E motibo principal cu tin stewardess na bordo ta pa garantisa siguridad, pesei si un di nan pidi bo haci algo, hacie prome y puntra despues.

No biaha cu ningun material peligroso. Tin un lista basta largo di materialnan peligroso cu no ta ser permiti den avion. Pero bo sano huicio mes ta bisa bo cu bo no por bai cu gasolin, acido, gas venenoso y otro cosnan similar na bordo di avion a menos cu e aerolinea ta permiti esei y bo ta transporta nan den e empake corecto.

No bebe di mas. Cualkier tipo di alcohol cu bo bebe lo afecta bo mas pisa den laira cu na nivel di lama. Bebe modera ta e proceder prudente na cualkier haltura.

Keda alerta. Den e caso improbabel cu surgi un situacion di emergencia, por ehempel un evacuacion di emergencia como un precaucion, bo mester sigui e instruccionnan di e stewardessnan y di e piloto y su asistentnan y sali for di e avion mas rapido posibel.

[Reconocemento]

Fuente: AirSafe.com

[Cuadro/Plachi na pagina 12]

CON PA TRANKILISA BO FAMIA

Si bo ta biaha, at’aki con bo por yuda bo famia trata cu loke ta precupa nan. Saca for di e website di United Behavioral Health

Papia cu bo famia. Prome cu bo sali di biahe, dedica poco tempo na bo sernan keri pa papia tocante bo siguridad y tambe di nan. Splica nan e medidanan nobo di siguridad cu ta na vigor y kico nan ta nifica pa bo siguridad durante biahe.

Permiti nan expresa loke ta precupa nan. Laga bo famia expresa nan ansiedad. Nan stima bo y kier pa bo ta sano y salvo. Scucha nan cu atencion. No critica nan, y mustra cu bo ta tuma tur nan temor y precupacion na serio.

Trankilisa nan honestamente. Splica nan con varios agencia ta purba preveni mas atake terorista. E esfuersonan aki ta inclui mas medida di siguridad na aeropuerto y tambe na bordo di avion. E chens pa algo malo pasa ora bo ta den un avion ta masha chikito.

Keda den contacto cu bo famia. Priminti nan cu lo bo bel nan ora bo yega bo destinacion, y sigui bel cas regularmente ora bo ta afo. Tambe ta importante pa bo famia sa con nan por haya contacto cu bo si surgi un emergencia.