Bo Por Descubri Diseño den Naturalesa

ORA nos ta keiro den cunucu, mayoria di nos ta ripara e beyesa di naturalesa. Kisas nos ta mir’e den un troshi di flor, un parha colorido, un palo mahestuoso of un panorama impresionante. Hopi hende ta atribui e beyesa ei na un Creador of Diseñador Maestral.

Kisas bo ta supone cu ta cientifico so por descubri e diseñonan complica cu tin den naturalesa. Sinembargo, bo no tin mester di ekipo cientifico sofistica pa nota diseño den naturalesa. Tur loke bo tin mester ta un bista skerpi, un poco imaginacion y aprecio pa beyesa y forma. Kisas tambe lo bo tin cu analisa mas djacerca obhetonan conoci cu prome aya bo no a paga masha tino na nan.

Un di e diseñonan di mas simpel ta e forma di spiral. Bo por mir’e den obhetonan conoci cu hende a traha manera e cabuya di man di telefon of un kurketrekker. Sinembargo, bo por haya spiralnan hopi mas elegante den cocolishi of fruta di palo di pino. Si bo wak e curason di un zonnebloem bon, atrobe bo ta mira e patronchi di spiral. E curason di un rosa of di cas di haraña tambe tin forma di spiral, maske nan ta menos riparabel.

Wak un cas di haraña djacerca. Na prome luga, e haraña ta traha e ‘balkinan’ principal di su cas, algo paresido na e spaknan di un wil. Caba e ta cuminsa meimei pa conecta e balkinan aki na otro uzando un hilo di seda cu ta pegapega. E haraña ta keda weef den circulo te ora cu e cas ta cla. E circulonan aki cu ta bira mas y mas grandi ta forma e spiral.

Un otro patronchi fasinante den naturalesa ta un mancha cu parce un wowo. Bo por haya e mancha aki na e luganan di mas straño: riba pluma di un parha, riba hala di barbulet of asta riba scama di pisca. Cientificonan ta kere cu e mancha manera wowo aki por yuda atrae un pareha, confundi un atacante of rechasa atencion indesea. Powis kisas ta e ehempel mas famoso di e mancha ei, y su show pa atrae su pareha ta un di e maraviyanan di e mundo di naturalesa. Alexander e Grandi tawata asina impresiona cu e beyesa di powis cu el a insisti pa proteha e parha aki den henter su dominio.

E forma di circulo y di un bola tambe ta patronchinan conoci. E bola colo di oro di solo cu ta baha of e bola platea di luna yen, semper ta masha bunita pa mira. Hopi flor di famia margarita of chrysanten ta parce solo, cu nan curason geel y blachinan di flor den varios colo radiante. E curason di e flornan colo di oro aki cu bo ta haya casi tur caminda, tin yen di nectar cu ta atrae barbulet, casi mescos cu un beach di santo blanco ta atrae turista.

Como cu e forma di bola ta e forma di volumen mas economico, bo ta haya mayoria fruta y beishi den forma rondo di diferente tamaño y colo. Nan colonan bibo ta atrae parha, y esakinan na nan turno ta plama e simiñanan a cambio di un plato suculento.

Claro cu forma di spiral, e mancha cu parce un wowo, circulo y bola ta solamente algun ehempel di e hopi diseñonan cu tin den naturalesa. Aunke algun tin un proposito spesifico, otronan kisas ta sirbi como decoracion of camuflahe. Sea cual sea e caso, busca nan pa mira y disfruta di nan.