Hobennan Sa Puntra . . .

Con Mi Por Trata cu e Presion di Mi Pareunan?

“Presion di mi pareunan ta tur caminda.”—Jesse di 16 aña.

“Presion di mi compañeronan di scol tawata un di e cosnan mas dificil cu mi mester a confronta den mi hubentud.”—Johnathan di 21 aña.

PRESION DI BO PAREUNAN sigur ta un influencia cu bo tin cu tene cuenta cu ne. Pero e ta algo cu bo por resisti. Es mas, bo por control’e y asta saca algo bon for di dje. Pero con?

Den un articulo anterior di e serie aki, nos a trata un prome paso importante: Reconoce cuanto poder e presion di nos pareunan tin y cua ta nos puntonan debil caminda nan por influencia nos.a Ki otro pasonan positivo bo por dal? Bo ta haya e guia util cu bo mester den e Palabra di Dios. Proverbionan 24:5 ta bisa: “Un homber di conocemento ta aumenta poder.” Cua ta e conocemento cu por aumenta bo poder pa resisti e presion di bo pareunan? Prome cu nos contesta esei, laga nos trata prome un problema cu por duna bo pareunan poder riba bo.

Falta di Confiansa Ta un Peliger

E estilo di bida di hobennan Testigo di Yehova ta encera papia cu otro hende tocante nan religion. Pesei pa nan, tin biaha e presion di nan pareunan ta forma un desafio special. (Mateo 28:19, 20) Abo ta haya cu tin biaha ta dificil pa papia tocante bo religion cu otro hobennan cu bo ta topa? Wel, bo no ta bo so. Melanie di 18 aña ta bisa: “Ora mi mester a bisa e muchanan cu mi ta un Testigo, esei tawata mas duro cu mi a verwacht.” El a sigui bisa: “Mi tawata tuma un curashi pa bisa e muchanan cu mi ta un Testigo, pero ora e momento presenta mi tawata cobardia.” Aparentemente, presion negativo di su pareunan tawata strob’e di papia di su religion.

Bijbel ta trankilisa nos pasobra e ta mustra cu asta homber- y mohenan cu tawatin fe extraordinario a basila pa papia cu hende tocante Dios. Por ehempel, e hoben Yeremias tawata sa cu nan lo tent’e y persiguie si e obedece e ordo cu Dios a dun’e di papia cu curashi. Ademas, Yeremias tawata falta confiansa. Dicon? El a bisa Dios: “Mira, mi no sa con pa papia, pasobra mi ta un mucha.” Dios tambe a pensa cu Yeremias no por a papia pasobra e tawata jong? No. Yehova a trankilisa e profeta cu e palabranan: “No bisa: ‘Mi ta un mucha.’” Anto Yehova a duna e hoben vasilante un asignacion importante.—Yeremias 1:6, 7.

Ora nos falta confiansa, y no ta sigur di nos mes, por ta masha duro pa resisti e presion di nos pareunan. Investigacionnan tambe ta indica esaki. Por ehempel, na aña 1937 un cientifico cu yama Muzafer Sherif a dirigi un experimento famoso. El a pone hende den un camber scur, mustra nan un solo punto di lus, anto a puntra nan con leu e lus a move.

En realidad e lus no a move mes; esaki tawata simplemente un ilusion optico. Ora a test e hendenan individualmente, nan a duna nan opinion en particular relaciona cu e supuesto movemento di e lus. Sinembargo, ora nan tawata den grupo nan mester a duna nan opinion na bos halto. Kico tawata sosode? Como cu nan no tawatin confiansa den loke nan a mira, nan a influencia otro. Despues di a ripiti e test varios bes, nan tur a cuminsa contesta casi mescos te ora cu nan a yega na un “norma di e grupo.” Asta despues ora nan a bolbe test e personanan individualmente, tawatin algun cu ainda tawata bou di influencia di e opinion colectivo di e grupo.

E experimento aki ta demostra un punto importante: Falta di siguridad of confiansa ta crea mas chens pa hende ser influencia door di nan pareunan. Esei ta algo pa pensa ariba, no ta berdad? Pasobra e presion di nos pareunan por influencia nos relaciona cu asuntonan importante, manera entre otro, nos punto di bista di relacion sexual prome cu matrimonio, uzo di droga, y asta e metanan cu nos lo busca pa alcansa den bida. Si den e asuntonan aki nos bai adopta e “norma di e grupo”, nos lo por afecta nos propio futuro drasticamente. (Exodo 23:2) Kico nos por haci anto?

Wel, con lo a bai cu bo cu e test menciona ariba si bo tawata sa sigur cu e punto di lus no tawata move? Probablemente lo bo no a laga e grupo influencia bo. Si, nos tin mester di confiansa. Pero ta di ki clase di confiansa nos ta papia y con nos por hay’e?

Haci Yehova Bo Confiansa

Podise bo ta tende hende papia hopi tocante desaroya confiansa propio. Pero pa loke ta trata con pa desaroya confiansa y cuanto bo mester tin, cada hende ta bisa un cos. Bijbel tin e conseho balansa aki: “Mi ta bisa cada un di boso pa no pensa mas halto di su mes cu e mester pensa; ma pa mas bien pensa di su mes cu sano huicio.” (Romanonan 12:3) Un otro traduccion di e versiculo aki ta bisa: “Mi por bisa cada un di boso: no pensa cu boso ta mas di loke boso ta, pero sea realistico. Cada ken mester tin un concepto humilde di su mes.”—Beibel na papiamentu koriente.

Ser “realistico” y tin “un concepto humilde di bo mes” ta evita cu bo ta haya idea of demasiado confiansa. Di otro banda, un punto di bista balansa ta nifica cu bo tin un grado di confiansa den bo berdadero capasidad di pensa, di rasona y di tuma decisionnan sabi. Bo Creador a duna bo e “facultad di rasona”, y esei ta un don precioso. (Romanonan 12:1, NW) Si bo tene esei na mente e por yuda bo resisti e deseo pa laga hende rond di bo dicidi pa bo. Sinembargo, tin un tipo di confiansa cu lo proteha bo mas miho.

Rei David a skirbi bou di inspiracion: “Bo ta mi speransa; o Señor DIOS, bo ta mi confiansa for di mi hubentud.” (Salmo 71:5) Si, David a pone confiansa absoluto den su Tata celestial, y el a cuminsa haci esei for di tempo cu e tawata jong. David tawata “un hoben ainda”—kisas un teenager—ora cu Goliat, e gigante filisteo, a reta cualkier solda di Israel pa bin bringa contra dje. E soldanan a cobardia. (1 Samuel 17:11, 33) Podise un a cuminsa desanima otro, creando un presion negativo. Casi sigur nan a papia den un manera pesimista tocante Goliat su tamaño y forsa extraordinario y a declara cu e homber cu acepta e reto ei mester ta loco. Pero e tipo di presion ei no a afecta David ningun tiki. Con bini?

Tuma nota di loke David a bisa Goliat: “Bo ta bin riba mi cu spada, cu lansa y cu jabalina, ma ami ta bin riba bo den e nomber di e SEÑOR di ehersitonan, e Dios di e ehersitonan di Israel, kende bo a reta.” (1 Samuel 17:45) No ta asina cu David no a mira Goliat su tamaño, su forsa of e armanan cu e tawatin. Pero David tawata masha sigur di algo, mes sigur cu e tawata sa cu shelo ta riba su cabes. E tawata sa cu Goliat no tawata nada compara cu Yehova Dios. Si Yehova tawata na David su banda, pakico lo e mester tin miedo di Goliat? E confiansa ei den Dios a laga David sinti su mes safe. Ni maske cuanto presion el a haya di su pareunan, esei no a pon’e cambia di opinion.

Abo tin mesun confiansa den Yehova? For di tempo di David te awe, Yehova no a cambia. (Malakias 3:6; Santiago 1:17) Mas bo siña tocante Yehova, mas sigur lo bo ta di tur loke e ta bisa bo den su Palabra. (Huan 17:17) Den su Palabra lo bo haya normanan fiho y confiabel pa guia bo den bida y pa yuda bo resisti presion di bo pareunan. Fuera di haci Yehova bo confiansa, tin un cos mas cu bo por haci.

Scohe Bon Consehero

E Palabra di Dios ta enfatisa e necesidad di scohe bon guia. Proverbionan 1:5 ta bisa: “Un hende di comprondemento lo adkiri bon conseho.” Bo mayornan, kendenan ta profundamente interesa den bo bienestar, por ta un fuente di guia. Indira ta bon conciente di esaki. El a bisa: “Ta pasobra mi mayornan constantemente a uza e Scritura pa rasona cu mi y nan a haci Yehova un persona real den mi bida, mi ta canando den e caminda di berdad te awe.” Hopi hoben ta sinti mescos.

Si bo ta miembro di e congregacion cristian, bo tin un fuente di apoyo maraviyoso einan: e superintendentenan nombra (e ancianonan) y tambe otro cristiannan maduro. E hoben Nadia ta corda: “Mi tawata echt respeta y admira e ancianonan den mi congregacion. Ainda mi ta corda un discurso cu e superintendente presidente a duna special pa hobennan. Despues di reunion ami cu mi amiga tawata masha emociona pasobra loke el a menciona tawata precis loke nos tawata experencia.”

Un otro arma poderoso contra presion negativo di bo pareunan ta presion positivo di bo pareunan. Si bo scohe bo amigonan na un manera sabi, nan por yuda bo tene na metanan bon y normanan husto. Con nos por scohe bon? Tene e conseho aki na mente: “Esun cu anda cu hende sabi lo ta sabi, ma un compañero di hende bobo lo sufri daño.” (Proverbionan 13:20) Nadia a percura scohe amiga y amigo sabi na scol: rumannan den fe cu tawata sigui e mesun normanan moral cu ne. Nadia ta corda: “Ora cu e mucha hombernan na scol tawata pasa pa ‘papia’ cu nos, nos un tawata apoya otro.” Bon amigo por yuda revela nos miho cualidadnan. Ta bale la pena haci e esfuerso necesario pa haya nan.

Pues, bo por ta sigur cu si bo desaroya bo confiansa den Yehova, busca guia di cristiannan maduro y scohe bo amigonan na un manera sabi, bo por tin exito den trata cu e presion di bo pareunan. De echo, bo por tin un influencia positivo riba bo amigonan y yuda nan keda hunto cu bo riba e caminda cu ta hiba na bida.

[Nota]

[Comentario na pagina 16]

Busca bon amigo, cu tin mesun amor cu abo tin pa Dios y pa su normanan

[Plachi na pagina 16]

“Mal compania ta daña bon custumber.”—1 Corintionan 15:33

“Esun cu anda cu hende sabi lo ta sabi.” —Proverbionan 13:20