E Punto di Bista Biblico

Cristiannan Mester Ta Pober?

HESUS a yega di bisa un hoben gobernante rico cu e mester bai y bende tur loke e tin y duna hende pober. E relato ta bisa cu e homber a bira masha aflihi ora el a tende loke Hesus a bis’e y el a bai tur tristo, “pasobra e tawata doño di hopi propiedad.” Anto Hesus a bisa su disipelnan: “Ki dificil lo ta pa esnan cu ta rico drenta e reino di Dios!” Hesus a agrega: “Ta mas facil pa un camel pasa door di wowo di un hangua, cu pa un hende rico drenta e reino di Dios.”—Marco 10:21-23; Mateo 19:24.

Kico Hesus tawata kiermen? Rikesa cu adoracion berdadero no ta bai cu otro? Cristiannan mester sinti nan mes culpabel si nan tin placa? Dios ta rekeri di nan pa nan hiba un bida sin ningun comodidad y luho?

Dios Ta Acepta “Tur Clase di Hende”

Den tempo antiguo Dios no a exigi di e Israelitanan pa nan biba den pobresa. Pensa riba esaki: Despues cu nan a ocupa e tera cu a ser apunta na nan, e pueblo a cuminsa practica agricultura y comercio pa percura pa nan mes y pa nan sernan keri. Factornan manera e situacion economico, weer, salu of habilidad di haci negoshi lo a influencia e exito di nan esfuersonan. E Lei di Moises a manda e Israelitanan tene compasion cu esnan cu a haya nan cu problemanan economico y a bira pober. (Levitico 25:35-40) Di otro banda, algun Israelita a bira rico. Boaz, un homber di fe y integridad cu a bira un antepasado di Hesucristo, ta ser describi como “un homber masha rico mes.”—Rut 2:1.

Den tempo di Hesus e situacion a keda mescos. Ora Hesus a papia cu e homber rico menciona den e introduccion, no tawata su intencion pa promove un bida di abstene di tur placer, sin ningun comodidad y luho. Mas bien, e kier a siña su disipelnan un les importante: Cu for di un punto di bista humano, lo por parce imposibel pa hende rico desplega humildad y acepta Dios su medio di salbacion. Sinembargo, Hesus a bisa: “Serca hende esaki ta imposibel, ma serca Dios tur cos ta posibel.”—Mateo 19:26.

E congregacion cristian di prome siglo a acepta “tur clase di hende.” (1 Timoteo 2:4, NW) Esaki a inclui algun cu tawata rico, otronan cu tawatin un nivel di bida comodo, y hopi cu tawata pober. Kisas algun persona a acumula rikesa prome cu nan a bira cristian. Den otro casonan, sircunstancia faborabel y decisionnan sabi di negoshi kisas a haci nan rico despues cu nan a bira cristian.

Awe tambe e hermandad cristian ta consisti di hende di varios posicion economico. Nan tur ta haci esfuerso pa sigui e guia cu Bijbel ta duna encuanto asuntonan di placa, ya cu materialismo por afecta tur hende. E les cu Hesus a siña su disipelnan relaciona cu e hoben gobernante rico ta spierta tur cristian cu placa y propiedad material por tin un influencia poderoso riba un persona.—Marco 4:19.

Un Spiertamento pa Hende Rico

Aunke Bijbel no ta condena rikesa riba su mes, loke si e ta condena ta amor pa placa. E escritor biblico Pablo a bisa: “Amor pa placa ta raiz di tur sorto di maldad.” El a remarca cu algun hende a bandona interesnan spiritual debi na nan deseo pa bira rico y como resultado nan “a desvia for di e fe, y a traspasa nan mes cu hopi dolor.”—1 Timoteo 6:10.

Ta interesante cu Pablo a duna instruccionnan spesifico pa hende rico. El a bisa: “Instrui esnan cu ta rico den e mundo actual pa nan no ta soberbe y pa nan no fiha nan speransa riba e insiguridad di rikesa, ma riba Dios, kende ta provee pa nos tur cos na abundancia pa nos disfruta di nan.” (1 Timoteo 6:17) Evidentemente ta existi e peliger cu hende rico lo por bira arogante y sinti cu nan ta miho cu otronan. Ademas, nan por ser tenta pa pensa cu rikesa por duna siguridad berdadero, locual ta algo cu Dios so por duna.

Cristiannan cu ta bon para por proteha nan mes contra e peligernan aki door di ta “rico den bon obra.” E bon obranan aki ta inclui ser “generoso y dispuesto pa comparti”, yudando esnan cu ta den necesidad. (1 Timoteo 6:18) Cristiannan—sea rico of pober—por uza tambe un parti di nan recursonan pa yuda plama e bon nobo di e Reino di Dios, loke ta un di e cosnan cu mas ta interesa cristiannan berdadero djawe. E spirito generoso aki ta revela cu un persona tin e actitud corecto pa cu propiedad material y esei lo pone Yehova Dios y Hesucristo stim’e, ya cu nan ta stima esun cu ta duna cu alegria.—Mateo 24:14; Lucas 16:9; 2 Corintionan 9:7.

E Cosnan Mas Importante

Pues, ta bisto cu un cristian no mester ta pober. Ni e no mester “kier bira rico.” (1 Timoteo 6:9) Simplemente cristiannan tin cu traha duro pa nan tin un entrada rasonabel cu nan por biba di dje. Dependiendo di varios factor y di e sistema economico bou di cua nan ta biba, nan esfuerso lo logra diferente grado di exito.—Eclesiastes 11:6.

Sea cual sea nan sircunstancia financiero, cristiannan mester haci esfuerso pa “haci sigur di e cosnan mas importante.” (Filipensenan 1:10, NW) Door di pone balornan spiritual na prome luga, nan ta “montona pa nan mes e tesoro di un bon fundeshi pa futuro, pa nan gara loke ta bida berdadero.”—1 Timoteo 6:19.