Un Trabou Straño Pero Mi Stim’e

E ZONIDO steady di e motor di mi boto specialisa ta kibra e silencio di mainta, segun cu mi ta bandona e haf di Gibson. Ta mainta tempran y ora pa mi sali en busca di mi “prooi.”

Na costa west di Canada, hopi empleo—incluso esun di mi—ta conecta cu cultivo y capmento di palo. Pero masha tiki di nan ta straño manera esun di mi. Mi ta recupera of recohe troncon di palo. E no ta un trabou nobo. De echo, tin algun di nos cu ta dje di cuater generacion cu ta haci e trabou di recupera troncon di palo. Bo por bisa cu nos tawata haci reciclahe prome cu el a bin na moda! Mi ta traha den e area di Howe Sound y e Estrecho di Georgia, entre Isla Vancouver y e costa di e provincia British Columbia. E region aki ta djis un parti di Vancouver su Districto di Recupera Palo.

Un di e maneranan principal cu companianan cu ta cap palo ta transporta e tronconnan di palo, ta door di tene nan hunto uzando kabel flotante of boto cu bom plaat. Ta mas economico pa transporta palo via awa y danki na Oceano Pacifico, tin awa na abundancia aki banda. Sinembargo, tin hopi factor cu ta pone cu e proceso no ta bai asina facil. Biento y marea ta cambia lihe, y tormentanan sa lanta diripiente. Pues, hopi troncon ta los for di e kabelnan y ei ta caminda e papel di e recuperado di troncon ta cuminsa.

Con Ta Recohe Troncon Perdi

Solamente personanan cu permit tin mag di recohe tronconnan bendibel cu a los for di e kabelnan of barconan. Nos ta paga tur aña pa e permit, y e prome biaha cu bo sac’e bo ta haya un stempel estilo di martiu cu tin bo number di permit. Cualkier troncon cu bo haya ta drif of canto di un playa bou dje marca di marea halto, bo por recohe pa ser uza atrobe. Prome cos cu nos ta haci ta stempel nos number di identificacion riba dje.

Nos tin mester tambe di un boto bon ekipa. Esaki no ta manera un boto normal pa placer. Nos ta uza botonan chikito pero fuerte, cu ta varia di boto cu motor pafo te na toubot, pero cu frame of body masha diki. Na cabes di e boto tin “djente” di hero cu ta ser uza pa pusha e tronconnan, y semper nos tin un bon stock di kabel. Nan ta kabel fuerte di aproximadamente 4,5 meter largo cu un clabo grandi di metal pega na su punta. Ora nos haya un troncon cu nos por recupera, nos ta claba e clabo bon den e troncon y ta pega e kabel na un palo na e boto. Tambe nos tin tur ekipo di siguridad necesario na bordo.

Un persona cu caba di cuminsa recohe troncon perdi ta descubri umbes cu e trabou aki ta mas complica cu e ta parce. Nos ta traha henter aña y ta cuminsa mainta tempran, sin importa con weer ta. Den winter tin biaha nos tin cu kibra ijs pa nos por sali for di haf.

Unda nos ta haya troncon di palo? Esei ta depende hopi di dos factor principal: marea di lama y biento. E recuperado cu experencia ta consulta un mapa di marea prome cu e sali mainta. Cambionan extremo den nivel di lama ta miho pa nos, pasobra esei ta trece mas troncon. Ademas ta mas facil pa hala troncon for di playa ora lama ta halto.

Semper ta importante pa tene cuenta constante cu e weer. Constantemente nos ta midi biento, wak shelo y movecion di e nubianan y controla e colo di lama. Biento di suitost ta trece awasero, mientras cu biento di west hopi bes ta nifica shelo cla pero ola grandi. Biento di nortost, conoci localmente como biento squamish, den winter ta nifica temperatura masha friu mes, awa bruto, sneu y—nos ta spera—tronconnan perdi.

Claba e clabo di un kabel na un troncon cu ta drif semper ta emocionante, pero loke ta realmente excitante ta ora di hala e tronconnan for di playa. Baranca scondi net bou di superficie di awa por bora e bom di nos boto y causa hopi daño. Nos mester keda alerta.

Segun cu nos ta recohe troncon, nos ta tou nan hiba na varios area proteha caminda por mara nan hunto. Nos ta laga nan einan te ora ta e dia semanal pa tou nan. Riba e dia ei nos ta recohe y entrega tur e tronconnan cu nos a recupera—entre 50 pa 100 troncon—na cierto stacionnan pa ricibi troncon caminda ta pisa nan y calcula nan balor riba mercado. E ora ei nan ta paga nos segun e balor di e tronconnan cu nos a recupera.

Esaki por parce un dushi manera pa gana bo pan, pero tene cuidou! E trabou aki no ta pa hende sin curashi. E tin hopi riesgo y peliger. Si bo no tene cuenta cu e weer, bo por haya bo den peliger. Afortunadamente Howe Sound tin hopi luga caminda bo por sconde y warda te ora un tormenta pasa. Un otro riesgo: Si un rekuperado di troncon descuida y cai na awa den winter, djis un par di minuut den e awa friu ei por ta fatal. Y bo ta corda e kabelnan cu clabo cu mi a describi caba? Wel, si bo no claba e clabo bon den e troncon, e por sali y bin dal duro den direccion di e boto. Menos mal cu ta un par di rekuperado so a yega di haya sla di e clabo ei, y asina mes esei ta un experencia cu bo no ta lubida.

Recompensanan Personal y di Medio Ambiente

Dicon mi ta stima mi trabou? E canal di Howe Sound ta un area popular pa pasa facansi, caminda hende ta pusta den diferente tipo di boto di bela. Y como cu tin asina hopi isla, tin centenares di cas di zomer y pues masha hopi boto di motor. Tin ferry ta core constantemente den dia pa transporta bishitante y habitante di isla pa tera firme y viceversa. Debi na e peligernan cu e tronconnan ta forma, ta facil pa mira e importancia di nos trabou.

Nos ta contribui na e siguridad di e trafico di boto ora nos ta piki e tronconnan perdi. Troncon cu tin hopi dia den awa ta cuminsa zink y kisas ta solamente un par di centimeter di e troncon ta sali riba awa, y esei ta forma un peliger serio pa hende den boto. Sinembargo, pa nos e ta bon pasobra nos por recuper’e y bend’e. Asina nos ta haci e awanan mas safe y tambe ta yuda tene medio ambiente limpi.

Mi ta haya e trabou aki excitante y fasinante. Cada dia ta diferente. Ora mi ta riba lama, e panorama rond di mi ta cambia constantemente. Mi a mira solo sali masha bunita mes den winter, cambiando e sneu riba e seronan den un colo ros briyante. Na momentonan asina mi gusta e aire friu y yen di salpeter.

Ta masha normal pa mira bestianan di mondi. Mi a yega di mira otter, marter, y varios tipo di cacho di awa y na gran cantidad. Mi a yega di wak aguila ta pisca y bina ta landa bai of bini for di e islanan canto di costa. Ta masha impresionante pa mira un dolfein hunga den e olanan cu e chapaleta di mi boto ta crea, mira bayena shinishi pasa bai of grupo di orca corta door di e olanan!

Mi welo a cuminsa recupera troncon den decada di 1930. El a pasa su amor pa lama y pa e trabou di recupera tronconnan perdi pa su yiu hombernan. Mi tata na su turno a pasa su amor y respet pa e trabou aki pa su yiunan. Ora mi tawatin suficiente edad, mi tambe a scohe e trabou aki. Claro cu e no ta e trabou mas importante den mi bida. Mi sirbishi na Dios ta bini na prome luga, y esei ta duna mi hopi mas satisfaccion. Pero afortunadamente mi gusta mi trabou tambe, anto pa casi 50 aña caba. Ainda mi ta ansioso pa bai traha y busca troncon.

Mi famia mes tambe ta traha hunto cu mi. Tin biaha den zomer ora anochi ta calor, nos tur ta sali bai traha na un playa. Anto ora nos ta tou e tronconnan hiba haf y nos tras tin un bahada di solo masha bunita, meuchi ta grita den laira, olanan cu ta briya tras di e boto y e lusnan cu ta cuminsa sende na canto, wel, tur esei ta duna bo un sintimento di pas y intimidad cu e Creador. Mi ta kere cu esaki ta e motibo principal dicon mi ta stima mi trabou.—Contribui.

[Plachi na pagina 21]

Momento cu ta mara un troncon pega na playa

[Plachinan na pagina 21]

Ta normal durante e trabou di recuperacion pa mira bestia di mondi

[Plachi na pagina 22]

Howe Sound su stacion pa ricibi troncon ta sigui funciona asta den winter