Habri Wowo pa Abrolhos

DI E CORESPONSAL DI SPIERTA! NA BRAZIL

DEN siglo 16, nabegantenan cu tawata serca di e rifnan banda di costa di estado Bahia, Brazil, tawata spierta otro nabegante: “Abra os olhos!” (Habri wowo!) Segun tradicion, ta e spiertamento aki cu nan tawata ripiti tur ora bai a bira nomber di un grupo di cinco isla chikito den e region: archipielago di Abrolhos.

Abrolhos ta situa den Oceano Sur Atlantico, 80 kilometer so for di Caravelas y Alcobaça, dos poblacion canto di costa. Sinembargo, rif di coral ta rondona e archipielago y manten’e isola. Tormentanan violento di Atlantico y tambe rifnan cu no ta registra riba mapa lo tawata suficiente peliger pa desanima mayoria nabegante di bai eibanda. Pero tawatin un atraccion economico grandi cu a supera tur esei: bayena lomba corcobia (bultrug).

Yagmento y Observacion di Bayena

Durante siglo 19, bayenanan di Abrolhos a bira un fuente principal di entrada pa e poblacionnan di piscado a lo largo di costa. Despues di asisti na un sacrificio di misa special caminda un pasto local a bendiciona nan boto, e yagdonan tawata sali rumbo pa e archipielago den boto chikito y habri di rema of di bela. Con nan tawata logra mata un criatura asina grandi? Nan tawata probecha di e instinto maternal di e bayena. E piscadonan tawata tira e yiu cu harpun y despues uz’e como as pa trece e mama serca. E piscadonan tawata tou e bayenanan cu nan a mata hiba tera firme pa por a saca nan azeta balioso den un di e seis fabricanan di procesa bayena na Caravelas.

Sinembargo, ora e mercado local di azeta di bayena a fracasa meimei di siglo 19, e industria di yag bayena tambe a bai atras. Na comienso di siglo 20, despues cu hende tawata yag riba nan pa decadanan, bayena lomba corcobia practicamente a stop di brui na Abrolhos. Esei a pone cu e yagmento riba bayena rond di e islanan poco poco a bin stop. E ultimo biaha cu nan a mata un bayena cu harpun tawata na 1929.

Na 1983 un capitulo nobo den e historia di Abrolhos a cuminsa ora cu gobierno a declara e cinco islanan di e archipielago y e rif di Abrolhos un parke nacional marino, un area total di 910 kilometer cuadra. Hende tawatin 50 aña sin tende nada di e bayenanan, pero na 1987 investigadonan a informa cu nan tawata mira bayena den e awanan di e parke y nan a dicidi di investiga esei mas aleu. Pa nan sorpresa nan a descubri cu bayena lomba corcobia a bolbe cuminsa brui rond di e islanan.

Noticia di e regreso di e bayenanan, hunto cu e creciente reputacion di Abrolhos como un paradijs perdi, a cuminsa atrae un cantidad chikito di bishitante. Un mainta cu shelo cla den zomer, un famia a subi un boto chikito di piscado na Caravelas y a cohe rumbo pa Abrolhos, un biahe di seis ora. At’aki un di nan su descripcion di e biahe pa e islanan.

Un Muraya di Sombre Grandi

“Segun cu Manoel, nos capitan, a logra pasa door di e Rif di Muraya, mi a compronde dicon e nabegantenan Portugues di antes tawatin miedo di e lama aki. For di fondo di lama tawata sali pilar di coral yen di colo cu tawata yega te serca di superficie, tin di nan tawata 20 meter halto y 50 meter hancho. Debi na nan forma hancho ariba smal abou, hende local a yama nan sombre grandi. Hopi di e pilarnan aki a join bou di awa pa forma boognan y gangnan inmenso, y asta tin un muraya di 20 kilometer largo cu ta sali for di awa manera un plataforma di rif. E murayanan aki ta forma e Rif di Muraya.

Despues cu nos a pasa e rif, nos a mira Abrolhos nos dilanti. For di un distancia e cinco islanan parce palo gigante pa wanta porta cu ta drif riba lama. Geologonan a indica cu posiblemente leu den pasado e presion di lava cu tawata bini ariba a forsa e barancanan inmenso aki di subi for di fondo di oceano. Como resultado, e cinco islanan tin casi mesun forma di superficie: na banda suitost tin un sero stijl ta sali for di awa y cu ta baha suavemente bai caba den un beach smal na banda suitwest.

Nos por a mira awor e vuurtoren y un careda di casnan di dos piso riba e isla mas grandi, Santa Bárbara. E personal di e Instituto Brazilero di Medio Ambiente y Recursonan Natural Renobabel (IBAMA) y tambe e soldanan di marina di Brazil cu ta biba riba e isla ta depende di un barco di provision cu ta bini cada dos siman. Ta di compronde cu e poblacion local di cabrito tambe ta anhela yegada di e barco ei, ya cu nan lo sirbi como cuminda pa e hendenan di e isla den caso di emergencia. No ta permiti pension, hotel, bar ni restaurant riba e isla. Turistanan cu kier keda drumi mester haci esei riba boto cu tin mara rond di e isla.

Mientras cu Manoel ta tira anker cu cuidou pa e no daña e rif di coral, dos wardado di IBAMA ta subi nos boto y ta splica algun di e reglanan di e parke. Turista tin mag di bishita solamente e dos islanan Siriba y Redonda, nan mester sigui e camindanan marca y semper compaña pa un wardado. No tin mag di pisca ni bai cu souvenir, ni sikiera un pida piedra for di beach. E observacion di bayena tambe ta estrictamente regula. Te cu tres boto tin mag di yega serca di e bayenanan, y no tin mag di yega mas serca cu 100 meter di nan. Si un bayena acerca un boto, mester paga e motor y tin mag di start e atrobe solamente ora por mira e bayena na superficie. Botonan mester bandona e luga si un bayena duna cualkier indicacion di ta rabia.”

Un Poblacion di Parha Cu Ta Hala Atencion

“Tin masha hopi parha mes akinan. Diferente di nan tin colonia cu ta brui webo, por ehempel, parha tropico (keerkringvogel), bubi enmascara, skerchi y meuchi (bonte stern).

Segun cu nos tawata subi e costa yen di baranca di isla Siriba e prome dia di nos bishita, Yordan, un investigado di IBAMA, a mustra nos algun neishi di bubi y di parha tropico pik cora. Bubi ta keda contento cu neishi traha abou riba tereno habri, pero e parha tropico pik cora ta prefera nachinan den baranca cu ta duna proteccion contra rafaganan di biento fuerte cu lo por bolter e neishi facilmente.

Esun cu mas ta sobresali di e poblacion di parha sin duda ta skerchi (of macuacu), cu tin e tamaño di un galiña. Durante temporada di busca pareha, e saco yamativo na garganta di e macho ta bira cora bibo y ta hincha te na e tamaño di un bala di futbol. Pa straño cu por parce, skerchi ta depende di lama pero e tin miedo di awa. E tin masha tiki azeta pa hunta su plumanan cu ne, pesei si e sambuya pa cohe pisca e ta bira mucho pisa door di awa.

Skerchi su habilidad di bula ta compensa e echo cu su plumanan no ta waterproof. Imagina bo, e hanchura di su halanan di span ta 2 meter! Su halanan ta gara coriente di aire cayente y e por keda zweef den laira casi sin move, mientras cu e ta vigila e bubi, su socio obliga den piscamento. Asina cu e bubi cohe un pisca, e skerchi ta baha abou y atak’e cu su pik largo y dobla. Tin biaha e ta ranca e pisca for di boca di e bubi. Si e bubi morto spanta laga e pisca cai, e skerchi ta baha lihe y coh’e prome cu e cai den awa. Awor kico si e bubi a guli e pisca caba? Hende a yega di mira skerchi agresivo persigui bubi y fors’e saca su cuminda!”

E Esena bou di Awa

“Nos a pasa e di dos dia di nos bishita explorando bou di awa. E temperatura di awa den e archipielago nunca ta baha bou di 24 grado Celsius, y tin visibilidad te cu 15 meter. Bo no tin mester di ekipo caro di sambuya pa bo explora e awanan calmo y seco serca di e islanan. Tur loke bo mester ta un snorkel, un duikbril y zwemvin. Segun cu solo ta briya riba e mundo bou di awa aki, e ta refleha riba gruponan di pisca, riba coral colo berde, lila y geel, y riba spons y lima cora. Nos a landa den lus yen di colo. Aunke e cantidad di sorto di coral ta chikito na comparacion cu otro rifnan tropical, tin algun sorto cu bo ta haya akinan so.

E awanan blou remarcabel cu ta rondona e isla ta abunda cu mas di 160 sorto di pisca. Tin tur forma y tamaño di criatura: de bes en cuando un turtuga kawama, pisca sheu, cleinfeshi, guepi, gutu, zaagbaars masha grandi y congla (of colebra di lama). E piscanan ta asina manso cu literalmente nan ta come for di bo man, y ora e cuminda caba, nan ta cuminsa morde bo dedenan suavemente, en busca di mas.”

Regreso di Bayena

“E atardi di nos di tres dia na e archipielago, nos a cohe rumbo bek pa Caravelas cu sintimentonan mixto. Mi tawata encanta cu Abrolhos, pero toch desapunta cu ainda nos no a mira ni un solo bayena. Sinembargo, ora nos tawatin mei ora ta nabega, Manoel a grita diripiente: ‘Ata bayena! Ata bayena!’ Tres bayena lomba corcobia a presenta un 200 meter nos dilanti, nan tawata dos adulto y un yiu. Nos por a mira cla cla e colo blanco bou di nan halanan inmenso. Podise ta curiosidad a pone un di nan bini mas serca y landa banda di nos pa un par di minuut. Mi no por a kere mi bista ora cu e bayena a dal un salto. El a saca mita di su curpa grandi for di awa y a bin dal abou riba su lomba. Esei a habri un canal masha grandi den lama! Segun cu e islanan tawata bira chikito den distancia, nos por a mira e bayenanan su rabo ainda y tambe e columna di awa cu de bes en cuando nan tawata spuit saca. Nos a keda contento pa mira cu e bayena lomba corcobia a regresa.”

Un Futuro Insigur

Kisas e menasa di yagdo di bayena no t’ei mas, pero tin otro menasa. Lo ta irealistico pa pensa cu e islanan aki por mantene nan mes isola for di e problemanan di medio ambiente. Un experto di oceano a expres’e asin’aki: ‘No ta basta pa conserva un archipielago y restringi acceso na dje, si tur cos rond di dje ta ser destrui.’

Hopi cientifico ta kere cu un aumento di e temperatura mundial ta pone cu e Rif di Muraya ta blikiando, locual ta un señal cu su limanan chikito ta disparciendo. Ta parce inevitabel cu e destruccion di mondi y e erosion riba tera firme cu tempo lo afecta e coralnan di e isla, como cu esei ta aumenta e cantidad di lodo cu e riunan ta basha den lama. Y claro cu segun cu e cantidad di bishitantenan ta subi tur aña, protectornan di medio ambiente mester keda masha alerta pa evita cu Abrolhos ta sufri e consecuencianan di su propio beyesa bon conserva.

Pero, te asina leu ningun di e nubianan scur aki no a tira sombra riba e beyesa puro di Abrolhos: su bayenanan impresionante y acrobatico, parhanan fasinante y coral unico. Despues di casi 500 aña di su descubrimento, ainda Abrolhos ta un luga caminda ta bale la pena pa bo tene bo wowonan habri. Un bishita na e archipielago ei ta un delicia pa bo bista y un experencia inolvidabel.

[Mapa na página 23]

(Pa e teksto den su formato kompleto, wak e publikashon)

BRAZIL

ABROLHOS

[Mapa na pagina 23]

ARCHIPIELAGO DI ABROLHOS

Siriba

Redonda

Santa Bárbara

Guarita

Sueste

[Plachi na pagina 23]

E vuurtoren di Abrolhos, construi na 1861

[Plachi na pagina 24]

Skerchi

[Plachi na pagina 24]

Hersen coral

[Reconocemento]

Enrico Marcovaldi/Abrolhos Turismo

[Plachi na pagina 24]

Sheu

[Plachi na pagina 24, 25]

Bubi enmascara

[Plachi na pagina 24, 25]

Redonda

[Reconocemento]

Foto da ilha: Maristela Colucci

[Plachi na pagina 25]

Congla

[Plachi na pagina 25]

Cleinfeshi

[Plachi na pagina 25]

Parha tropico pik cora

[Plachi na pagina 26]

Bayena lomba corcobia cu su yiu