Corte Supremo Ta Acepta e Caso

DEN ULTIMO AÑANAN, Corte Supremo a acepta rond di 80 pa 90 caso pa aña, for di mas cu 7.000 peticion cu nan ta ricibi, pa nan duna un opinion huridico por escrito. Kiermen, un tiki mas cu 1 porshento so nan a acepta!

Na mei 2001, Testigonan di Yehova a entrega na Corte Supremo un Peticion pa Writ of Certiorari (permiso pa reexamina e caso). E peticion tawatin e siguiente pregunta: “Segun constitucion Mericano, ministernan religioso cu ta participa den e obra di comunica nan creencianan religioso di cas pa cas—un practica di hopi siglo bieu y basa riba e Scritura—ta igual cu bendedonan di mercancia, y pesei ta obliga na obedece e restriccionnan predefini di obtene un permit municipal pa por papia tocante Bijbel of ofrece literatura basa riba Bijbel sin cobra p’e?”

Dia 15 di october 2001, e Departamento di Asuntonan Huridico di Sosiedad Watch Tower a ser notifica cu Corte Supremo Mericano a acepta pa reexamina e caso Watchtower Bible and Tract Society of New York, Inc., Versus Pueblito di Stratton!

Corte a acepta pa reexamina solamente un aspecto spesifico di libertad di expresion di e caso. Esta, si ta asina cu e Prome Enmienda di constitucion cu ta proteha libertad di expresion ta inclui e derecho di hende pa papia cu otronan tocante un asunto, sin cu nan tin cu identifica nan mes prome na un of otro autoridad gubernamental.

Awor e respectivo abogadonan mester a presenta nan argumentonan oralmente dilanti e nuebe huesnan di Corte Supremo di Estados Unidos. E Testigonan lo a bin cu nan abogadonan; y na e otro banda, e Pueblito di Stratton cu su team di abogado. Con cos a bai den e tribunal ei?

[Cuadro na pagina 5]

KICO TA E PROME ENMIENDA?

“ENMIENDA NUM. I (ESTABLECIMENTO DI RELIGION; LIBERTAD DI RELIGION, DI EXPRESION, DI PRENSA, DI REUNI HUNTO, DI PETICION) Congreso lo no traha ningun lei relaciona cu establecimento di religion, of cu ta prohibi libertad di practica un religion; of cu ta limita e libertad di expresion of di prensa; of e derecho di e pueblo di tene reunion pacifico, ni pidi Gobierno pa elimina e causa di kehonan.”—Constitucion di Estados Unidos.

“E Prome Enmienda ta e base di e proceso democratico na Merca. E Prome Enmienda ta prohibi Congreso pa pasa lei cu ta restringi libertad di expresion, di prensa, di tene reunion pacifico of di haci peticion. Hopi hende ta considera libertad di expresion e libertad mas importante y e fundeshi di tur otro libertad. Tambe e Prome Enmienda ta prohibi Congreso di pasa lei cu ta establece un religion di estado of cu ta restringi libertad religioso.” (The World Book Encyclopedia) Ta interesante cu den e caso Cantwell Versus Connecticut, 310 U.S. 296 (1940), un desision cu a marca pauta y cu tambe a envolve Testigonan di Yehova, Corte Supremo Mericano a dicta cu e garantia di e Prome Enmienda ta prohibi no solamente “Congreso” (gobierno federal) sino tambe autoridadnan local (di estado y di municipio) di pasa lei cu ta contra e constitucion y cu ta un violacion di e derechonan di e Prome Enmienda.

[Plachinan na pagina 5]

E cuestion ta afecta varios forma di acerca hende di cas pa cas

[Reconocemento pa Potret na pagina 4]

Potret di Franz Jantzen, Collection of the Supreme Court of the United States