Con e Cuestion A Cuminsa

STRATTON, OHIO, MERCA, ta un comunidad chikito situa serca di e Riu Ohio cu ta separa e estado Ohio for di West Virginia. Stratton ta ser considera un pueblito y e tin un alcalde. E comunidad chikito aki di menos cu 300 habitante, diripiente a bira un centro di controversia na 1999 ora cu autoridadnan a purba obliga, entre otro, Testigonan di Yehova pa busca un permit special prome cu nan bishita cas di e hendenan local cu nan mensahe basa riba Bijbel.

Dicon esaki ta un cuestion importante? Segun cu bo ta lesa nos informe di e desaroyonan, lo bo mira cu e tipo di ordenansa y control gubernamental aki de echo ta limita e derecho di libertad di expresion. Anto no solamente di Testigonan di Yehova, sino di tur hende cu ta biba na Merca.

Con e Conflicto A Desaroya

Pa hopi aña e habitantenan di Stratton a ricibi bishita di Testigonan di Yehova di e congregacion biciña di Wellsville. For di aña 1979 e Testigonan tawatin problema cu un par di funcionario local tocante e predicacion di cas pa cas. Na principio di añanan ’90, un agente policial di Stratton a core cu un grupo di Testigo for di e pueblito, bisando: “Mi no tin cu nes cu boso derechonan.”

E asunto a yega na un culminacion na 1998 ora cu e alcalde di Stratton personalmente a confronta cuater Testigo di Yehova. Nan tawata saliendo for di e pueblito despues cu nan a bishita algun habitante cu anteriormente a mustra interes den combersa tocante Bijbel. Segun un di e señoranan, e alcalde a bisa nan cu si nan tawata hende homber, lo el a encarsela nan.

E causa di e conflicto mas resien tawata un ordenansa of decreto di e pueblito pa “Regula Bendemento y Pidimento di Cos Indesea Riba Propiedad Priva.” Segun e ordenansa ei tur hende cu kier participa den un actividad di cas pa cas mester busca un permit special, gratis, serca e alcalde. Testigonan di Yehova a considera e ordenansa aki como un violacion di libertad di expresion, di libertad di religion y di libertad di prensa. Pesei nan a entama un caso den corte federal despues cu e pueblito a nenga di trece cambio den nan implementashon di e ordenansa aki.

Dia 27 di juli 1999 tawatin un audiencia dilanti un hues di corte di districto Mericano cu ta sirbi e Districto Sur di Ohio. E hues ei a respalda e pueblito su ordenansa tocante permit y a haya cu e ta na harmonia cu e constitucion. Despues di esei, dia 20 di februari 2001, e Corte di Apelacion Mericano pa Sircuito Seis tambe a afirma cu e ordenansa tawata na harmonia cu e constitucion.

Pa dicidi e cuestion definitivamente, Watchtower Bible and Tract Society of New York hunto cu e congregacion local di Wellsville di Testigonan di Yehova a haci un peticion pa Corte Supremo Mericano examina e caso.

[Mapa/Plachi na pagina 3]

(Pa e texto den su formato kompleto, wak e publicacion)

Los Angeles

New York

OHIO

Stratton